2
Anahatana Ne Inaha Irui Kawasa Osi Sio Wasoni Oparisaa
1 Tau umete mainae rei sio oaoiki tau Pentakosta oyo, sio wasoni oparisaa oamanouso tau numa osa. 2 Sira tau oatinu tinunue on roe noiyaha. Tinunue rei sani ihu mainae erehoka. Sio wasoni orueso pani numa rei, oatinui sui numa anoe rei pusiki. 3 Oyo onoo sani usa nene itana waroni rahori numa anoe rei. Rahori oyo, rakahuuso sana osa-osa. 4 Anahatana Ne Inaha irui kawasa osi pusiso, oyo oanamana tau sou waroni sio ruao oaneire tewa.
5 Tau muie reini sio Yahudiu panesi ohokaso on noi niana pusire mai tuniai reini. Sio wasoni oararane mai kota Yerusalem. Sio rei opusu Anahatana ne maunauna. 6 Sio panesi rei oatinu tinunue rei, oyo oamanouso. Taa oatinu sio wasoni oparisaa rei oanamana tau sio ruao no sou, osira. 7 Osira naiosa reiso oasau, “Ira oe. Sio wasoni oanamana sanrei, sio pusiso on poe otoe Galilea tea. 8 Sapani na au uatinu sio oanamana tau ruaku we sou? Ne sio rei honu oatinu sio oanamana tau sio ruao no sou. 9 Ita reini rerihoni:
otoe Partia,
otoe Media,
otoe Elam,
otoe Mesopotamia,
otoe Yudea,
otoe Kapadokia,
otoe Pontus,
otoe Asia,
10 otoe Frigia,
otoe Pampilia,
otoe Mesir,
otoa pani Libia haineke nia Kirene,
sio umau wasoni okata ita rerihoni kota Roma oi.
11 Sio umau wasoni sio Yahudiu, sio umau tewa ne onusu Yahudi nea. Sio umau honu wasoni on nau nusa Kreta runa otoe Arab. Au uatinu sio oanamana tau ruaku we sou. Sio rei honu oatinu sio oanamana tau ruao no sou. Sio rei wasoni osima runa Anahatana iuna sae runa ne kawasa.”
12 Sio osira, reiso oasei tau umau, “Ira oe. Areini mo nene manariti sapani?”
13 Ne sio umau honu oaumaniso, reiso oahata, “Oninu, reiso omukeso.”
Petrus Iatuheteso Rerihoni Anahatana Ne Inaha Sapani
14 Petrus ihitioi roe ikata sio maisosia hutusa rahana osa tamena, oyo ianamana nioi mainae osi sio panesi rei. Iahata, “Omi Yahudiu. Pusimo utumo wani oruemo mai kota Yerusalem. Au nanie uatuhetemo tau rei, reiso oatinu ia-ia. 15 Omi oahata ami reini mo, amukema. Aikee amukema tewa. Ranie mato erehiti-hiti, reiso amukema tewa, tea. 16 Ne areini sani masuae ia mamsima runa Anahatana ne anamanaya waini nanai Yoel isima runa pani muie mka sapani. Iasau sani Anahatana iasau sanrei,
17 Mka tuniai reini haineke tihoniki,
oyo urui-rui We Inaha osi sio pusiso.
Reiso moa hehuka mka oaunauso tau we anamanaya,
Sio honua onoo masasua rerihoni au,
Au mka uuna sio mtuana oneke oamnii.
18 Osi we manorina iae, sio hanaia runa sio pinau pusiso, mka urui-rui We Inaha osiso tau umetene reinau
na oaunauso tau we anamanaya.
19 Mka au uuna sima-simana na sio osira. Mka onoore roe nante.
Mka au uuna sima-simana tau we kawasa mai tuniai reini na onoo nasi, usa, runa wenue kapitorone.
20 Mka ranie erepumonoi.
Hunane, sio onooi msinae sani nasi,
samatoro umete mainae rei erehokai.
Tau umetene rei mka uatuheteso tau we kawasa mainae. Mka uapasana sio pusiso.’
21 Ne ia seia mani iainisi na uapuhaiki,
mka uapuhaiki sirinia.
22 Omi Israel! Oatinu tau we anamanaya rai! Anahatana iatuhete osi omi ata ihiti Yesus waini on pani nia Nasaret. Oaneiki nea tau Anahatana irui kawasa osiki na iuna sima-simana tau matamo kahutua. 23 Aikee orui Yesus osi sio umau ohunui, oyo omi otapi sio kahatena opakui roe hini wani renienei. Reiso omi ohunui. Ne areini erepusu Anahatana ne kaheute. Ianeiki naone. 24 Omi ohunui oyo, Anahatana iapuhaiki honu rerihoni sio matana. Inanai na pene sinsarai runa sio matana. Ia mka imatai rotu-tu ria supani tewa. 25 Masuae aia Daud isima runa ruai tewa. Ne isima runa pani muie mka Yesus iamahaiki honu. Iasau sanrei,
‘Uno-noo Upuku haineke,
waini ikataku.
Reiso ukaitau tewa.
26 Akataku reiso anoku miri-mirike.
Roe hohaku uainaa runaya.
Unapa anoku kaie runa tinaiku.
27 Tau sae, ano atapiku tewa
na mka umataku rotu-tu ria supani.
Atapiku tewa
na au wani au manisate onate, tinaiku erekopui.
28 Ano aatuheteku nea tau arena na uamahaiku rotu-tu ria supani.
Anoku mirike mainae tau ano akata runaku.’
29 Wea kakau, wea waniu. Unina na oanei ia-ia rerihoni upuri waini nanai aia Daud. Daud imatai, okaniki nea. Ia ne kupuro wani asi. 30 Masuae Anahatana itotoe osi Daud ata mka ihiti upui tau natu. Daud waini ia mamsima runa Anahatana ne anamanaya. 31 Ianei mka Anahatana iuna sae on iunai tewasi. Reiso iaunutu anoi ata mka Ia Anahatana Iratiki Iapuheuso imatai, oyo iamahaiki honu. Daud iasau sanrei,
‘Anahatana itapiki
na ikata sio matana rotu-tu potuina tewa.
Itapiki rotu-tu tinaini erekopui tewa.’
32 Yesus rei, Anahatana iapuhaiki honu. Ami ruama anoo ata waini iamahaiki nea. 33 Anahatana iapusaai roe noiyaha. Wairo isupu muirani manetane rerihoni Anahatana nea, reiso waini iruei hae hanai wanane. Anahatana irui Ne Inaha osiki nea sani masuae itotoe. Oyo Yesus iruiki osima sani omi wani onoo runa oatinu reini. 34 Daud ruai isaa roe noiyaha tewa, reiso ianamana rerihoni ruai tewa. Ne iaunutu anoi rerihoni Yesus iasau sanrei,
‘Anahatana iasau osi Upuku.
Rue hae hanaku wanane
35 rotu-tu aheta tau me nisau.’
36 Reiso omi Israel pusimo utumo kahurae oanei manisate ata Yesus mo, omi opakui roe hini wani renienei, ne Anahatana ihitiki tau Upuri runa Ia Anahatana Iratiki Iapuheuso nea.”
37 Sio panesi rei oatinu tau rei, oyo oatamisi. Reiso oasei tau Petrus runa sio maisosia tamena. “Mania kakau, mania waniu. Kahurae ami auna sae?”
38 Iahata, “Arihoni mo rosau, oyo ami asohu heure sana osa-osa na sio oanei ata anomo osa runa Yesus Kristus. Aarihoni mo rosau na Anahatana iuna heure. Oyo asupu Anahatana Ne Inaha waini Anahatana iruiki osia. 39 Tau sae, Anahatana itotoe nea. Nanie irui Ne Inaha osia runa mea upu runa sio wasoni hainau. Itotoe osi sio pusiso sahoro mka ianaha runaso.”
40 Petrus iaunauso tau anamanaya panesi. Iaisosiso sanrei, “Tapi Anahatana iapuheua na pene iapasanaya tau mka iapasana napisi sio wasoni no kahatene reini. Iapuheua na aamahaia rotu-tu ria supani.”
Sio Wasoni Oparisaa Tau Yesus
41 Sio panesi oparisaa tau Petrus ne maunauna rai, reiso sio mampusua osohu heu no rosau. Tau ranie hatae rei, sio nihu tonu ouna osa runa sio wasoni oparisaa nea. 42 Sio opusu-pusu sio maisosia no maunauna, oama-amanouso tau osa. Oai poroti tau osa anoo rapeka runa Yesus imatai. Oanamana runa Anahatana tau osa.
43 Anahatana irui kawasa osi sio maisosia na ouna sima-simana suiosa, reiso sio pusiso osira. Okaitau. 44 Sio wasoni oparisaa rei, oamanouso tau osa suiosa. Osama no apia osi umau. 45 Reiso taue isa, oaheni no tuamane isa te? No apia te? Oyo osama kepeni waroni osupure rei osi sio wasoni no apia tewa, no muaio tewa.
46 Anoo miri-mirika. Oamanane osama no muaina osi umau. Reiso oamanouso ranie hatae isa ereeu mai poua tonu rei oamanouso honu suiosa pani Anahatana ne numa mainisie oai poroti sui no numau tau osa anoo rapeka runa Yesus imatai. 47 Sio oainaa runa Anahatana. Sio pusiso oahata sio iaka. Ranie hatae isa ereeu mai poua tonu rei Upuri iapuheu sio umau na oamahaiso rotu-tu ria supani. Reiso ouna osa runa sio wasoni oparisaa nea.