3
Petrus Isuisene Ia Waini Italai
1 Petrus runa Yohanes wasoni oeuso roe Anahatana ne numa mainisie tau ranie manne pannuhu sio oanamana runa Anahatana. 2 Roe ne numa rei, onoo sio wasoni orori ia waini italai isa. Ia rei, italai on ia iamrai asi. Ranie hatae isa ereeu mai poua tonu rei oautuei haineke mitanunue wani nanae, “Mitanunu Iake” na iainisi kepeni rerihoni sio wasoni onusu pani Anahatana ne numa mainisie nusue. 3 Ia waini italai rei inoo ata Petrus runa Yohanes nanie onusu pani Anahatana ne numa nusue, oyo iainisi sanrei, “Samaku tau kepeni inate isa ee.” 4 Uaso ono-nooi, oyo Petrus iasau osiki, “Masi anoo mai.” 5 Reiso iariniiso iahata kani nanie orui kepeni osiki. 6 Oyo Petrus iasau, “Au we kepeni inate isa tewa. Ne nanie urui sae isa honu osia. Tau Yesus Kristus waini on pani nia Nasaret ne kawasa, masi ruamu aeu.”
7 Oyo isota hanai wanane, iakahaiki ihitioi roe. Iakahaiki ihitioi roe oyo, mata hun tewa oyo, ia waini italai rei aini atua makaya nea. 8 Oyo isomani roe, samatoro ruai ieui suru ria, suru nau. Oyo inusui pani Anahatana ne numa mainisie ikata sio ua rei. Ieu isoman-somani iainaa runa Anahatana. Iahata, “Anahatana, ano mo, ano iake tunne naiosa. Ano asuiseneku nea rotu-tu ueu iake reini. Ano me kawasa mainae.” 9 Sio pusiso onoo ata waini ieui iainaa runa Anahatana. 10 Sio oationai tau ia iru-ruei iainisi kepeni haineke Anahatana ne numa mainisie nene mitanunue wani nanae “Mitanunu Iake.” Reiso osira hun ruao onoo ia sapani nea rei.
Petrus Iaunauso Roe Anahatana Ne Numa
11 Ia waini naone italai rei waini ikata Petrus runa Yohanes asi, oyo sio pusiso oruma oamanouso mai tanuso tau sio wasoni mai teune wani oaoiki tau “Salomo Ne Teune.” Sio pusiso osira. 12 Petrus inooso, oyo iasau osiso sanrei, “Omi Israel. Osira tau rei, nanie ta hae? Oasumatama, nanie ta hae? Oahata ia reini waini ieui tau ami ruama mani kawasa te? Tau ami manisata onate te? 13 Anahatana waini Abraham, Ishak, Yakub, runa rea momou rea upu pusiso oainaa runai iuna mainae tau Yesus, ia ne manorine nea. Yesus rei, omi oruiki osi sio wasoni no kawasa ohunui. Pilatus nanie ialapasiki ne omi openemo. 14 Ia rei, ia manisate. Ia manisate onate. Ne omi openemo tanui oyo oainisi na Pilatus ihoka ia mamhunue osimo. 15 Reiso ohunu ia waini iapuhaiso. Ne Anahatana iapuhaiki honu rerihoni sio matana. Ami anoo ata waini iamahaiki honu, reiso asima osimo. 16 Tau ami aparisaa tau Yesus, Yesus iuna ia waini naone italai iamkona nea waini omi onooi runa oationai. Tau ami aparisaa tau Yesus runa ne kawasa, isuisenei. Waini ieui iake nea inoo tau matari kahutue.
17 Wea kakau, wea waniu. Uanei nea ata omi runa sio ona Yahudiu ouna sanreini mo, tau oanei tewa ata Yesus waini Ia Anahatana Iratiki Iapuheuso. 18 Ne Anahatana itapi sanrei sani naone sio mamsima runa Anahatana ne anamanaya oasau ata mka pani muie sapani. Oasau ata mka Ia Anahatana Iratiki Iapuheuso sinsarai. 19 Reiso oarihoni mo rosau. Onunimo mai Anahatana na iuna heure, 20 na Upuri ihokai tanumo na oahana mo inahau honua. Mka iaisosi Yesus ihokai tanumo honu. Yesus rei, waini Ia Anahatana Iratiki Iapuheuso. Naone ihitiki nea. 21 Kahurae iruei roe noiyaha rotu-tu Anahatana iuna pusire sani naone iuna sio mamsima runa ne anamanaya wasoni manisata onate oasau. 22 Oarihoni mo rosau. Tau sae, naone Musa iasau osi sio Israel sanrei,
‘Upumo Anahatana mka iaisosi ia mamsima runa ne anamanaya isa osimo rerihoni ruamo mo mansiau.
Ia rei, sani au sirinia.
Saka oatinu tau ne anamanaya pusire waroni iasau osimo.
23 Sio sahoro oatinu tau ia tewa, sio rei, sio osa runa Anahatana ne mansiau tewa nea.’
24 Oarihoni mo rosau. Tewa mo, Samuel runa sio mamsima runa Anahatana ne anamanaya wasoni ohokaso tau muie pusiso osima runa mka sapani pani muie runa napisi reini. 25 Sio mamsimana oasau ata Anahatana itotoe irui Ia Waini Iratiki Iapuheuso. Osupui nea. Anahatana itotoe osi rea upu. Iruiki osi omi nea. Iasau osi Abraham sanrei, ‘Pusu upumu, mka au urui iake osi sio pusiso mai tuniai reini.’ 26 Reiso Anahatana inini Yesus tau ne manorine, oyo iaisosiki ihokai mai tanumo naone na irui iake osimo. Irui iake rei tau iunamo oarihoni mo arena kahatena rai.”