4
Petrus Runa Yohanes Oamanane Sio Ona Yahudiu
1 Petrus runa Yohanes wasoni oanamana osiso asi, oyo sio mamkenu makapanau osi Anahatana, no ia polisi tau Anahatana ne numa mainisie runa sio Sadukiu umau ohokaso mai tanuso. 2 Sio rei oakapuku tau sio ua rei tau sio wasoni oatuheteso ata Yesus waini iamahaiki honu rerihoni sio matana. Arei nene manariti sio matana mka oamahaiso honu. 3 Reiso osotaso, samatoro onususo pani pui anoe. Pumono nea reiso osakaso pani pui anoe rotu-tu manahane. 4 Ne sio panesi sahoro oatinu no maunauna oparisaa. Reiso sio nihu nima wasoni oparisaa nea.
5 Hanu roe oyo, sio onata tau sio wasoni okenu makapanau osi Anahatana, sio matuhete Musa ne maunauna runa sio ona Yahudi nesia rei oamanouso mai kota Yerusalem. 6 Oamanouso runa ia mamkenu makapanau aihuhue waini nanai Hanas runa Kayafas, Yohanes, Aleksander, runa ia ona aihuhue rei ne enau umau honu. 7 Oyo orori sio ua rei oamananeso, samatoro oasei tanuso sanrei, “Ia seia irui kawasa osimo na osuisene ia waini naone italai rei? Ohete ia seia nanai?”
8 Oyo Petrus isupu kawasa rerihoni Anahatana Ne Inaha reiso iasau sanrei, “Omi ona Yahudiu. 9 Omi wani oasei tanuma ranie hatae reini tau ami auna iake. Aakahai ia waini naone italai rei. Reiso nanie oanei sapani na asuisenei rotu-tu ia iake nea. 10 Reiso kahurae omi runa sio Yahudiu pusimo oanei ata ia rei waini ioo iamananemo mai rei tinaini iake nea, tau Yesus Kristus, ia waini on pani nia Nasaret rei, ne kawasa. Yesus reimo, omi orerei roe hini wani reniene. Ne Anahatana iapuhaiki honu. 11 Yesus rei, sio oanamana tanui tau Anahatana ne anamanaya sanrei,
‘Hatu tinipae wani sio mamnana numa openeso tanui
ereuna hatu mataanoe. Ereuna numa makae nea.’
12 Yesus ruai mani pisa iapuheuta na iamahaita rotu-tu ria supani. Mai tuniai reini pusiki mo, ia isa iae ne kawasa iapuheu na iamahaita tewa. Hasae Yesus sahoro ne kawasa.” 13 Sio onata oatinu ata Petrus runa Yohanes uaso okaitau oanamana tewa. Masike sio mainaya tewa, okaitau tewa. Masike sio isikola tewa, okaitau tewa. Reiso osira. Oyo sio anoo rapeka runa naone uaso okata-kata Yesus. 14 Ne sio mka oasau sapani? Ia waini naone italai rei waini ioo iamananeso ikata Petrus runa Yohanes. Ia waini ieui iake nea. 15 Reiso sio onata oaisosi uaso ohokaso onapa pani manahane na sio ruao oanamana osi umau. 16 Oyo oasei tau umau, “Kahurae ita iuna sae runa sio ua rei? Sio pusiso mai kota Yerusalem reini oanei nea ata sio ouna sima-simane rei. Sapani na ita iauhaa? 17 Ne mai, ita iputa isauso na pene oanamana osiso ohete Yesus nanai nea na pene sima-simane rei, sio panesi oatinu rerihoniki honu.
18 Reiso sio oanaha runa uaso na onususo honu, oyo osopo uaso na pene ohete Yesus nanai nea runa pene oatuheteso rerihoni Yesus.
19 Ne Petrus runa Yohanes oasau sanrei, “Ruamo oarinii. Nene manisate tau Anahatana matai usena wani sapani? Apusu omi mo maunaune te apusu Anahatana ruai ne maunauna? 20 Ami aarihoni iake tewa. Kahurae asima rerihoni ruama anoo sae runa aatinu sapani.” 21 Sio onata rei osupu manaete isa tewa nea na oapasanaso. Reiso oputa osauso honu, oyo ohokaso. Tau sae, sio pusiso mka openeso tau rei. Sio wasoni oainaa runa Anahatana tau sima-simane rei. 22 Ia waini naone italai rei wani ia iake nea tau sima-simane rei, ne musum hutu ate nesi nea.
Sio Wasoni Oparisaa Oainisi Na Pene Sio Okaitau
23 Sio onata ohoka Petrus runa Yohanes arihoni pui anoe, samatoro uaso onuniso pani no netau wasoni oparisaa rei. Hoka pani, oyo osima runa sio onata tau sio mamkenu makapanau osi Anahatana runa sio ona Yahudi nesia rei oasau sapani. 24 Satinu tau no anamanaya rai, oyo oainisi tau Anahatana anoo osa. Oahata, “Mania Upu. Ano ahaye tau nante, runa tuniai reini, runa nuae runa pusire waroni. 25 Tau Me Inaha, auna mania upu aia Daud, ia rei waini me manorine, aunai iasau sanrei,
‘Sio wasoni oationa Anahatana tewa anoo ranuku-nuku ranaka-naka, nanie ta hae?
Sio tumatau ouna kaheuta nanie ohunui. Aikee kaheuta rai, raeu tewa, nanie ta hae?
26 Sio aiau mai tuniai reini mo osaka nanie oapuoo manahitane.
Sio onata oamanouso nanie onesi Upuri runa Ia Anahatana Iratiki Iapuheuso.’
27 Poe oyo, ereeu sani iasau rei sirinia. Herodes runa Pontius Pilatus oamanouso mai kota reini nea. Oamanouso runa sio wasoni oationa Anahatana tewa runa sio Israel oi. Oamanouso nanie otuntana runa me manorine, Yesus waini ia manisate onate rei. Ia rei, ano ahitiki tau Ia Anahatana Iratiki Iapuheuso nea. 28 Oamanouso na ouna pusire waroni ano aaunuture tau me kawasa runa me kaheute naone na ereeu sanrei. 29 Reiso, Upu, muie reini mo, masi aatinu sapani na oputa osauma. Aakahaima, me manorina rei, na aaunauso tau Sou Iake rerihoni Yesus na pene akaitau. 30 Aatuheteso rerihoni me kawasa sapani. Asuisene sio kupua, auna sima-simana tau me kawasa runa sima-simana raasiraso runa kawasa rerihoni ahete Yesus nanai. Yesus me manorine waini manisate onate.”
31 Oainisi pusi oyo, naniao manoune rei erekoka. Oyo Anahatana Ne Inaha irui kawasa osiso na osima runa Anahatana ne maunauna. Okaitau tewa.
Sio Wasoni Oparisaa Osama No Apia Osi Umau
32 Sio pusiso wasoni oparisaa, oarinii sani sio osa, anoo osa. Ia isa iasau tewa ata, “Au we apia rei, osi au ruaku mani.” Ne osama no apia pusire osi umau. 33 Tau kawasa mainae, sio maisosia osima osiso ata Yesus waini iamahaiki honu. Anahatana irui iake osiso. 34 Waini ia isa tewa rerihoni sio rei waini ne apia tewa, ne muaine tewa. Tau sae, sio pusiso sahoro no tuamana, no numau, taue isa oahenire, oyo orori kepeni waroni osupure. 35 Ororire oyo, oruire osi sio maisosia na osamare osi sio wasoni no apia tewa, sio wasoni no muaio tewa.
36 Sani rei oi runa Yusuf. Sio maisosia oaoiki tau Barnabas (nene manariti ‘Ia Sahoro Iaunau Sio Wasoni Anoo Mtinta’). Ia ne ipane Lewi. Iamrai nau nusa wani nanae Siprus. 37 Ia rei, iaheni ne tuamane isa, oyo irori kepeni waroni isupure na iruire osi sio maisosia. Iruire na osamare osi sio wasoni no apia tewa, sio wasoni no muaio tewa.