5
Anahatana Ihunu Ananias Runa Safira Tau Sio Oakarotai
1 Ia hanaie isa waini nanai Ananias. Ia runa sahai, waini nanai Safira, uaso, oaheni no tuamane otoe isa oi. 2 Kepeni waroni isupure rai, inana umau osi ruai, umau honu iruire osi sio maisosia. Iuna sanrei, sahai ianeiki oi. 3 Reiso Petrus iasei tanui, “Ananias, sapani na atapi ia aia sakahatene inusu anomu pusiki rotu-tu aakarota Anahatana Ne Inaha. Tewa mo, aauhuni ata anana kepeni umau waroni asupure tau tuamane rei? 4 Tuamane rei, ruamu me tuamane on aaheniki tewasi? Oyo aaheniki ne kepeni rai waroni asupure rei, ano me kepeni tea? Ruamu apusu me maue tau kepeni rai, iake. Auna kahatene rei nanie ta hae? Ano aakarota tumata tewa. Ne aakarota Anahatana.” 5 Ananias iatinu tau rei, oyo iamnohoi imatai. Reiso sio pusiso wasoni oatinu tau rei, okaitau hunu ruao. 6 Reiso sio honua umau ohokaso, oyo oopa Ananias ne hatae samatoro ororiki poe manahane. Ororiki poe manahane nanie okaniki.
7 Oyo yam tonu ereniku nea oyo, Ananias sahai ihokai. Ianei tewasi ata sahai imatai nea. 8 Petrus iasau osiki, “Masi aasau, tuamane reimo wani oaheniki, osupu hunonie sanrei sirinia?” Iahata, “E-e. Hunonie wani sani ano aasau rei.”
9 Iahata, “Sapani na ano runa sahamu oheu, nanie orea Anahatana Ne Inaha? Atinu! Sio sahoro okani sahamu wasoni ohokaso nea. Mka orori ano poe manahane oi.” 10 Mata huni oyo, iamnohoi imatai mai Petrus uai anoe. Sio honua onususo, oyo osupui imatai nea. Reiso ororiki poe manahane samatoro okaniki. Okaniki poe sahai nusui. 11 Reiso sio pusiso wasoni oparisaa rei, runa sio tamena pusiso wasoni oatinu tau rei. Oatinu oyo, okaitau hunu ruao.
Sio Maisosia Ouna Sima-simana Panesi
12 Sio panesi onoo sio maisosia ouna sima-simana waroni ratuhete ata no kawasa rerihoni Anahatana panesi runa sima-simana waroni raasiraso panesi. Sio pusiso wasoni oparisaa oamanouso anoo osa pani Salomo Ne Teune roe Anahatana ne numa mainisie. 13 Masike sio tamena okaitau oamanouso runa sio wasoni oparisaa rei, sio panesi oamuiraso. 14 Sio panesi honu oparisaa tau Yesus, oyo oamanouso runa sio wasoni sinasi rei. Tau sio panesi rei wasoni mansia hanaia runa sio pinau oi.
15 Reiso orori sio kupua roe naniao te roe no kinoa na oautueso sui arenau. Oautueso na munata Petrus ieui sui arena rei, onoi eresahuso. 16 Mansia panesi ohokaso on noi niana waroni haineke Yerusalem. Ohokaso orori sio kupua runa sio wasoni sakahatena rasuniso. Osuisene sio pusiso.
Sio Onata Osota Sio Maisosia Honu
17 Ne ia mamkenu makapanau osi Anahatana no ia ona aihuhue runa ne mansiau oanana. Ne mansiau reimo wasoni rerihoni sio tikane Sadukiu. 18 Reiso osota sio maisosia. Osotaso oyo, onususo pani pui osi sio kahatena. 19 Ne nene pumono pani sanrei oyo, ia maisosie on roe Upuri isa iheka pui nene mitanunua pusire. Ihekare oyo, iautunu sio maisosia pani manahane. Ia maisosie on roe noiyaha rei iasau sanrei, 20 “Masi oeumo roe Anahatana ne numa mainisie, oyo oaunauso rerihoni sapani na Anahatana iapuhaiso rotu-tu ria supani.”
21 Reiso tau kinoke, ohokaso roe Anahatana ne numa rei, oyo oatuhete sani ia maisosie iaisosiso rei.
Ia aihuhue tau sio mamkenu makapanau osi Anahatana runa ne mansiau ohokaso nanie oapisara. Reiso oanaha runa sio ona Yahudi nesia pusiso, samatoro oaisosi sio umau oeu onana sio maisosia na oasei tanuso. 22 Ne ohokaso poe pui, oyo osupu sio maisosia tewa nea. Osupuso tewa, reiso onuniso roe sio onata, samatoro osima osiso sanrei, 23 “Ahokama poe pui, samatoro anoo ata sio okatunepa mitanunua pusire ia-ia nea. Sio mamsakaya wasoni osaka mitanunue. Ne aheka mitanunue rei oyo, asupu ia osa-sa pani pui anoe tewa nea. Pui rei huie nea.” 24 Sio onata tau/rerihoni sio mamkenu makapanau osi Anahatana runa no ia ona polisi oatinu sanrei, oyo oasei pani anoo, “Tutuso tewa. Sio rei, kaneta wasoni sui supa, omi?” Anoo rauponu runa mka sapani. 25 Oyo ia isa ihokai iasau sanrei, “Masi atinu. Sio rei, omi onususo pani pui, ne wasoro oatuhete roe Anahatana ne numa mainisie nea.” 26 Reiso ia ona polisi rei runa ne mansiau oeu onana sio maisosia rei. Ne otentene tanuso tewa. Tewa mo, okaitau sio panesi roe rei. Mka sio rei orauso tau hatu nanie ohunuso.
27 Sio orori sio maisosia poe sio onata, oyo oaisosiso ooo oamananeso. Ooo oamananeso oyo, ia aihuhue tau sio mamkenu makapanau osi Anahatana iaunauso sanrei, 28 “Ami asopo na pene oatuhete rerihoni ia rei nea. Ne oatuhete sui Yerusalem pusiki. Samatoro nanie oapasanama oasau ata ami ahunui.”
29 Oyo Petrus runa sio maisosia tamena oasau sanrei, “Anahatana mo, kahurae apusu ia naone. Apusu tumata tewa. 30 Anahatana waini rea upu oainaa runai iapuhai Yesus honu. Yesus rei, omi ohunui tau opakui roe hini wani reniene. 31 Ia rei, Anahatana irui muirani manetane runa kawasa mainae osiki nea na iuna Natu runa Ia Sahoro Iapuheuso. Iuna sanrei na sio Israel oarihoni no rosau na Anahatana isiru heure. 32 Anoo runa asima runa rai pusire. Anahatana Ne Inaha waini Anahatana iruiki osi sio wasoni opusu ne maunauna isima runare oi.”
33 Sio onata oatinu tau rei, oyo anoo ranuku-nuku ranaka-naka. Reiso nanie ohunu sio maisosia rei. 34 Ne ia onate isa waini nanai Gamaliel. Ia rei, ihitio roe, oyo iaisosiso orori sio maisosia onapa poe manahane mka-mka. Ia onate rei waini ia onate rerihoni akama Yahudiu. Ia waini ia matuhete Musa ne maunauna isa. Sio pusiso oamuirai. 35 Reiso sio maisosia ohokaso oyo, iasau osi sio onata sanrei, “Omi Israel. Ainati. Oarinii ia-ia rerihoni nanie ouna sae runa sio reini. 36 Naone ia isa waini nanai Teudas ihokai iahata ruai ia mainae, nanie iatana runa kupania. Sio utuni ate opusui. Ne ohunui, oyo ne mampusua orumaso sakakau, oyo ne maunauna tihonire. 37 Ita tau sio wasoni orekeni tau tumatau, ia isa waini nanai Yudas ihokai, nanie iatana runa kupania oi. Ia rei, ia rerihoni otoe Galilea. Iaunauso rotu-tu sio panesi opusui oi. Ne sio ohunu ia rei oi, oyo ne mampusua orumaso sakakau. 38 Reiso muie reini mo, tau parakana rei, au we maunaune sanrei. Pene ouna sae isa osiso. Sio ruao. Tau sae, munata sio no maunauna runa no taneiu rai, osupure rerihoni tumata mka tihonire. 39 Ne munata Anahatana sahoro iaisosiso, omi mka otentene tanuso na oarihonire tewa. Mka onoo ata omi wani oatana runa Anahatana ruai.”
Oyo sio onata oapamata sou na opusu Gamaliel ne maunaune. 40 Reiso oanaha runa sio maisosia ohokaso honu, oyo osapuso. Osapuso oyo, osoposo na pene oatuheteso rerihoni Yesus nea. Oyo sio onata ohokaso. 41 Reiso ohokaso oarihoni sio onata rei. Oeuso anoo miri-mirika. Tau sae, Anahatana iahata sio iaka, reiso itapiso ouna sinsaraso noso Yesus. 42 Ranie hatae isa ereeu mai poua tonu rei suiosa sio oatuhete runa oaunauso tau Sou Iake ata Yesus waini Ia Anahatana Iratiki Iapuheuso. Oaunauso pani Anahatana ne numa mainisie, oaunauso sui sio no numau.