6
Sio Ohiti Sio Itu Na Oakahai Sio Maisosia
1 Tau muie rei, sio panesi honu ouna sio mampusua sana ua-ua, sana wanu-wanu. Oyo sio Yahudiu wasoni oanamana tau sou Yunani oakarupu rerihoni sio Yahudiu wasoni oanamana tau sou Yahudi. Oahata, “Ta osama sio pina uhanu mo, osama ami ma sio pina uhanu tewa.” 2 Reiso sio maisosia hutusa rahana ua oanaha runa sio mampusua pusiso, oyo oasau sanrei, “Mania kakau, mania waniu. Ami aarihoni aaunauso tau Anahatana ne anamanaya na asama sio tau muaine, areimo iake tewa. 3 Reiso nene iake, omi onini sio itu rerihoni omi reini. Nini sio wasoni oanei ata Anahatana Ne Inaha irui kawasa osiso nea. Kahurae oanei sae wani iake, sae wani iake tewa. Oyo ami ahitiso na onana tanei rei. 4 Ne ami ruama aanamana runa Anahatana runa aaunauso tau Anahatana ne anamanaya.”
5 Oatinu tau rei iake, reiso onini:
Stefanus. Ia rei, iparisaa mainae. Anahatana Ne Inaha irui kawasa osiki.
Filipus,
Prokhorus,
Nikanor,
Timon,
Parmenas,
Nikolaus. Ia rerihoni kota Antiokhia. Iamrai, ia Yahudi tewasi, ne inusu Yahudi nea.
6 Oyo oautue ituso mai sio maisosia, oyo sio maisosia oainisi tau Anahatana runa oahusieso, nanie ohitiso tau sio makahaia.
7 Sio panesi honu oatinu Anahatana ne anamanaya, reiso sio mampusua sui Yerusalem okikasi oasinena rotu-tu sio panesi honu. Sio mamkenu makapanau osi Anahatana panesi oi oparisaa tau Sou Iake rerihoni Yesus.
Sio Ona Yahudiu Osota Stefanus
8 Stefanus rei, Anahatana irui iake osiki. Irui kawasa osiki, reiso iuna sima-simana waroni rasiraso runa sima-simana waroni retuhete ata ia ne kawasa on roe Anahatana. Sio panesi onoore. 9 Ne sio umau nanie otuntana runai. Sio rei rerihoni numa manoune osi sio Yahudiu wani sio oaoiki tau numa manoune osi sio manianeu wasoni naone rei. Sio rei wasoni sio Yahudiu on pani nia Kirene runa nia Aleksandria, runa sio on poe otoe Kilikia runa otoe Asia. Reiso sio rei otuntana runai. 10 Ne okuai tewa. Tau sae, Anahatana Ne Inaha irui anamana iaka osiki. 11 Reiso oanamana oauhuni runa sio umau onana anoo. Oawaruso na osima oakarota. Oahata, “Ami aatinui ianamana kahatene rerihoni Musa runa Anahatana.”
12 Reiso onana sio rei anoo, oawaruso. Oawaru sio matuhete Musa ne maunauna runa sio ona Yahudi nesia rei oi. Oyo osota Stefanus, samatoro ororiki iamanane sio ona Yahudiu. 13 Hoka roe oyo, osupu sio umau osima oakarota runa Stefanus. Oahata, “Ia rei, ianamana kahatene rerihoni Anahatana ne numa mainisie wani monne tau Anahatana waini tanui. Ianamana kahatene rerihoni maunauna waroni Musa isupure rerihoni Anahatana oi. 14 Ami aatinui. Iahata, ‘Yesus mo, ia waini on pani nia Nasaret rei, mka ikuka Anahatana ne numa rei, oyo ipesi pusi re monna rairo waroni isupure arihoni Musa.’”
15 Sio onata pusiso oroui, oyo onoo uai anoe sani ia maisosie on roe noiyaha uai anoe.