7
Stefanus Iaunau Sio Onata
1 Oyo ia aihuhue tau sio mamkenu makapanau osi Anahatana iasei tau Stefanus, “Oasau sanrei, areimo manisate te tewa?”
2 Iahata, “Wea amau, wea kakau, wea waniu. Masi oatinu! Anahatana waini ne rinane wani ita-itane eresita iatuhete ruai osi upuri Abraham tau ia waini iruei ria otoe Mesopotamia asi. Isuka irura niane wani nanae Haran tewasi. 3 Iasau osiki iahata, ‘Aeu arihoni me niane rei runa me enau pusiso. Aeu pani tuamane otoe isa mka uatuhetei osia.’ 4 Reiso Abraham ieu iarihoni otoe Kasdim, oyo isuka irura Haran. Iruei ria Haran rotu-tu amai imatai. Amai imatai oyo, Anahatana iaisosiki isuka mai tuamane reini, ita wani irueta tanui. 5 Ne Anahatana irui tuamane otoe osi Abraham ruai tewa. Tuamane mkane iae, iruiki tewa. Ne Anahatana iahata, “Mka urui tuamane rei pusiki osi ano runa mea upu.” Iasau sanrei, masike ne hehuka tewasi oi. 6 Ne Anahatana iasau osiki ata, ‘Mea upu mka orueso sani sio rakana tau sio umau no tuamane. Sio wasoni no tuamane rei, mka onanaso tau manianeu oyo ounaso eresuniso rotu-tu musum utuni ate. 7 Ne au mo, mka uapasana sio rakana rei wasoni onanaso tau manianeu. Oyo mea upu rei oeu oarihoni sio wasoni no tuamane reipa, oyo oainaa runa au mai tuamane reini. Sio mka oainaa runa au sanrei, ‘Anahatana, ano iake naiosa. Ano arori ami anunima mai tuamane rei honu. Reiso ano iake tunne naiosa.’ 8 Itotoe sanrei oyo, iaunutu akakinae. Tau akakinae rei, kahurae orehi nea upu pusiso. Orehiso na sio pusiso oanei ata oamanaku opusu sae wani Anahatana itotoe rei. Reiso Ishak, Abraham anai, iamrai poe, oyo onona wanu oyo, orehiki. Ita Ishak irehi anai Yakub oi. Ita Yakub ne hehuka, sio hutusa rahana ua. Sio rei wasoni rea upu mataanoe.
9 Rea upu mataanoe rei, sio osaturuu oanana noa wani Yusuf, reiso oaheniki na iuna maniane pani otoe Mesir. Ne Anahatana iakahaiki. 10 Inana ne susau pusire rerihoniki. Iuna ia natu Mesir iahata ne hali iake. Tea mo, Anahatana iunai ianei pusire iake. Iasau pusire iake. Reiso ia natu rei, ihitiki tau mansia mainae. Irui kawasa osiki na isaka Mesir runa ne numau pusire.
11 Oyo pani Mesir runa otoe Kanaan pusire, osupu muaine tewa nea. Reiso eresuniso panesi. Rea upu osupu muaine tewa nea. 12 Yakub iatinu ata pani Mesir muaina waropa. Reiso iaisosi ne hehuka, rea upu rei, oeu pani mataanoe. 13 Ita oeu honu, samatoro Yusuf isima runa ruai osi nea kakau ata ia mo, ia Yusuf. Oyo ia natu Mesir rei mato ianei rerihoni Yusuf nea enau. 14 Oyo Yusuf iaisosiso oeu oanaha runa amai Yakub runa ne enau pusiso na osuka orura Mesir. Sio pusiso sio hutu itu rahana nima. 15 Reiso Yakub sio osuka orura Mesir. Oru-rueso pani rei rotu-tu Yakub runa rea upu pusiso omataso pani Mesir. 16 Oyo tau muie orori no hataya poe nia Sikhem honu, oyo okaniso poe hatu nohue wani naone Abraham ihanei rerihoni Hemor ne ipane poe Sikhem. Isenui tau kepeni.
17 Haineke nea Anahatana nanie irui sae wani itotoe osi Abraham. Rea upu okikasi oasinena pani Mesir nea. 18 Oyo ohiti ia natu honue na iuna natu pani Mesir. Ia rei, iationa Yusuf tewa. 19 Iakarota rea upu. Iuna mtinte tanuso. Itentene tanuso na opesi sio ikina wasoni mato oamrai mai tuniai. Opesiso pani manahane na omataso. 20 Tau muie rei, Musa iamrai. Ia ikine rei ia iake tunne naiosa. Inai runa amai opakananai pani no numa hunana tonu, 21 oyo oauhuniki. Oauhuniki oyo, ia natu rei anai pina isupui, oyo ihetei roe. Ihetei roe oyo, ipakananai sani ia ruai anai. 22 Oatuhete Musa tau pusire waroni sio Mesir oaneire. Isupu kawasa na ianamana iake runa iuna pusire iake.
23 Musa ne musum hutu ate oyo, iapamata sou pani anoi, nanie inoo ne mansiau, sio Israel. 24 Hoka poe oyo, inoo ia Mesir isa iuna eresuni-suni ia Israel isa, reiso inetei. Ihita hunu ia Mesir rei. 25 Iahata ne mansiau oanei ata Anahatana waini iaisosiki na ialapasiso. Ne oanei tewa. 26 Ita hanroe honu inoo sio Israel ua oatanaso. Inina na osota hanao na ohunu nisa, reiso iasau, ‘Omi mo, omi kaka wani. Omi oatanamo, nanie ta hae?’ 27 Ne ia waini ihita ne neta iruru Musa hae nusui, oyo iasei, ‘Ia seia ihiti ano na aaisosima? Ia seia ihitia na aapasanama? 28 Ano nanie ahunu au oi sani potusi ahunu ia Mesir rei?’ 29 Musa iatinu tau rei, oyo irumai iarihoni Mesir. Irumai rotu-tu ihokai pani otoe Midian. Hoka pani oyo, iausahai pani rei. Ne hehuka, sio ua.
30 Musum hutu ate oyo, ia maisosie on roe noiyaha iatuhete ruai osiki pani otoe huie haineke tinetae wani nanae Sinai. Ia maisosie rei, iatuhete ruai osiki pani ai pukune, wani nooi sani usa ereai tanui. 31 Musa inoo ai rei, oyo isira. Reiso ihainekei, nanie inooi ia-ia. Oyo iatinu Upuri nioi. Iahata, 32 ‘Au wani Anahatana tau mea upu. Au Anahatana wani Abraham, Ishak runa Yakub oainaa runaku.’ Musa ikaitau hunu ruai, reiso ikana-kananunui. Ikaitau reiso ipenei inoo ai rei nea. 33 Oyo Anahatana iasau honu, ‘Nosu me sanraliu rai. Tuamane rei, ano wani aheta tanui, monne. Tau sae, au wani tanui. 34 Unoo nea sapani na sio Mesir ouna mtinte tau we mansiau. Uanei nea sapani na eresuniso. Reiso ukaisunu nea nanie ualapasiso. Reiso mai. Au wani uaisosia anunia poe Mesir.
35 Musa reini mo, sio Israel openeso tanui, reiso oasau sanrei, ‘Ia seia ihiti ano na aaisosima. Ia seia ihitia apasanama?’ Aikee Anahatana iaisosiki na iautunu sio Israel na iapuheuso. Ia maisosie on roe noiyaha waini iatuhete ruai osiki pani ai pukune wani usa ereai tanui rei iakahaiki. 36 Musa reini mo, iautunu sio Israel ohokaso oarihoni Mesir tau iuna sima-simana waroni rasiraso runa sima-simana waroni retuheteso ata ne kawasa on roe Anahatana. Iuna sima-simana rai pani Mesir, nau Nua Msinae, pani otoe huie rotu-tu musum hutu ate. 37 Musa reini sahoro iasau osi sio Israel, ‘Anahatana mka iaisosi ia mamsima ne anamanaya osimo rerihoni ruamo mo mansiau. Ia rei, sani au. Mka iapuheumo na oamahaimo rotu-tu ria supani.’ 38 Musa reini mo, iautunu sio Israel tau sio wasoni oeu ohori pani otoe huie. Ia maisosie on roe noiyaha ianamana osiki roe tinetae wani nanae Sinai, oyo Musa iatuhete ne anamanaya rai osi rea upu. Isupu Anahatana ne maunauna waroni rakawana oyo iatuhetere osi ita oi.
39 Ne rea upu openeso oatinu tau Musa. Openeso tanui, nanie onuniso pani Mesir mani. 40 Reiso oasau osi Harun, ‘Nana siaie na ami aainaa runai na erekata runama. Tea mo, Musa waini iautunuma aarihoni Mesir waini sui supa nea?’ 41 Reiso tau muie rei onana anahatana wani titue tewa isa. Nitae sani koropou anae nene siaie. Onanai oyo, ohunu makapanau, nanie oainaa runa siaie rei. Oyo anoo mirika onoo sae wani sio ruao onanai, reiso ouna karisaa. 42 Reiso Anahatana ipenei tanuso. Ieu iarihoniso na oainaa runa oneu roe nante sani naone ia mamsima runa Anahatana ne anamanaya waini nanai Amos ikanu tau ne surate. Ikanu sani Anahatana ianamana sanrei,
‘He omi Israel! Tau omi wani pani otoe huie rotu-tu musum hutu ate rai
omi orehi makapanau osi au tewa.
43 Ne omi onana oyo orori-rori Molok nene naniae runa one wani nanae Repan nene siaie. Molok runa Repan waroni sio rakana anahatanau waroni titue tewa.
Uare, omi onanare runa oainaa runare.
Reiso mka uanenamo hainau pani nia Babel pani hae.’
44 Tau rea upu wasoni pani oto huie rei, orori numa unte wani Anahatana iasau ata iruei tanui. Numa unte rei, onanai sani Anahatana iaisosiso osi Musa. Ounai opusu siaie wani Anahatana iatuhetei osi Musa. 45 Oyo tau muie honu, rea upu runa Yosua orori numa unte rei rotu-tu mai tuamane reini. Ororiki mai tau sio wasoni onana tuamane rei rerihoni sio niana. Anahatana waini inei sio niana rai oanaoneso. Numa unte rei wani mai rei rotu-tu aia Daud ne naene. 46 Anahatana anoi iake tau Daud, reiso iainisi nanie inana numa osi Anahatana waini Yakub iainaa runai. 47 Ne anai Salomo waini ikatiki tau aia sahoro inana numa rei osiki.
48 Ne Anahatana ia aihuhue iruei tau numa wani tumata inanai tewa. Masuae ia mamsima runa Anahatana ne anamanaya waini nanai Yesaya isupu anamanae isa rerihoni Anahatana sanrei,
49 ‘Au uuna natu on roe noiyaha.
Au uuna natu osi sio pusiso poe tuniai.
Ano nanie auna numa nitae sae osiku?
Naniaku uaranahaku wani sui supa?
50 Au ruaku mo, uhaye tau pusire uture, tea?’
51 Omi mo, unumo onata. Omi sani sio wasoni oationa Anahatana tewa. Openemo oatinu tau Anahatana. Omi sani moa upu oatana runa Anahatana Ne Inaha suiosa. 52 Moa upu ouna sinsara sio mamsima runa Anahatana ne anamanaya pusiso. Ohunu sio wasoni oasau ata mka pani muie ia waini anoi manisate naiosa ihokai. Muie reini mo omi mato oruiki osi sio ohunui. 53 Sio maisosia on roe noiyaha orui Anahatana ne maunauna osimo nea. Ne omi reini mo openemo opusure.”
Sio Orau Stefanus Tau Hatu Nanie Ohunui
54 Sio onata rerihoni akama Yahudi oatinu Stefanus oasau ata ohunui, oyo anoo ranuku-nuku ranaka-naka. 55 Ne Stefanus isupu kawasa rerihoni Anahatana Ne Inaha, oyo iamrou roe nante. Iamrou roe nante oyo, inoo Anahatana ne rinane wani ita-itane eresita. Inoo Yesus waini ioo hae Anahatana hanai wanane. Naniai rei nene manariti ia ne kawasa. 56 Iahata, “Masi onoo! Unoo noiyaha erehekai. Ia Tumata Rei, Anahatana Ihitiki waini ioo hae Anahatana hanai wanane.”
57 Sio onata rei onopa tinao ukuna. Oakapona na pene oatinu Stefanus ianamana rerihoni Yesus sanrei. Oyo pusiso oruma oamanouso mai Stefanus. 58 Onesai hae kota nene muie. Onesai rerihoni kota rei oyo, oraui tau hatu nanie ohunui. Sio wasoni osima oakarota rei nanie oraui, reiso oautue no papita osa-osa osi ia honue waini nanai Saulus. 59 Tau sio wasoni orau-raui, Stefanus iainisi tau Yesus sanrei, “Upuku Yesus, aararuma we inaha.” 60 Oyo irike tune. Irike tune oyo, iakapona nioi mainae, “Upuku, asiru heu sio no rosa rei!” Iasau sanrei, oyo imatai.