8
1 Ohunui, oyo Saulus anoi iake.
Saulus Iuna Sio Wasoni Oparisaa Sinsaraso
Ranie hatae rei oimo sio ouna sio wasoni oparisaa roe Yerusalem sinsaraso mainae naiosa. Reiso sio wasoni oparisaa rei oruma pusiso. Orumaso sui otoe Yudea runa otoe Samaria pusire. Hasae sio maisosia sahoro oruma tewa. 2 Sio umau wasoni ouna-una sae waroni Anahatana ne suka okani Stefanus orani anoo rapunoko ruao.
3 Ne Saulus mo iuna rea sio wasoni oparisaa rei tihoniso. Ihori no numau pusire inesa sio pinau, sio hanaia pusiso pani manahane, oyo inususo pani pui anoe.
Filipus Iaunauso Poe Samaria
4 Sio wasoni oparisaa orumaso oyo, oaunauso tau Sou Iake rerihoni Yesus sui supani-supani. 5 Filipus ieui poe niane isa poe Samaria, oyo iaunau rerihoni Ia Anahatana Iratiki Iapuheuso. 6 Sio oatinu Filipus ianamana, onooi iuna sima-simana, sio panesi oatinui ia-ia. 7 Tau sae, sakahatena panesi rahoka rerihoni sio panesi nea. Sio reimo oakapona, oyo sakahatena rahoka rerihoniso. Isuisene sio wasoni otalaso runa sio panesi wasoni oeu seu-seu oi. 8 Reiso sio poe niane rei anoo mirika naiosa.
Simon Waini Ne Kawasa Rerihoni Ia Aia Sakahatene
9 Poe niane rei waini ia isa nanai Simon. Sio pusiso poe Samaria osira potuina nea tau ne kawasa rerihoni ia aia sakahatene. Iasau osiso iahata, “Au mo, au mansia mainae.” 10 Sio mainaya, sio ikina, pusiso sui niane rei oatinui ia-ia. Oahata, “Ia reimo, isupu Anahatana ne kawasa waini sio oaoiki tau ‘Kawasa Mainae.’” 11 Potuina nea osira tau ia ne kawasa, reiso oatinui ia-ia. 12 Ne Filipus iaunauso tau Sou Iake rerihoni sapani na Anahatana iuna natu mai tuniai reini. Iaunauso rerihoni Yesus, Ia Anahatana Iratiki Iapuheuso. Oparisaa tau Filipus ne maunauna rai, oyo isohu heu no rosau. Isohu sio hanaia, sio pinau pusiso. 13 Simon oi iparisaa. Sio osohui, oyo ieu ikata-kata Filipus. Isira tau inoo Filipus iuna sima-simana runa sima-simana waroni retuheteso ata ne kawasa on roe Anahatana.
14 Sio maisosia roe kota Yerusalem oatinu ata sio Samariau oparisaa tau Anahatana ne anamanaya nea, oyo oaisosi Petrus runa Yohanes uaso oeu poe tanuso. 15 Hoka poe oyo, uaso oainisi na sio Samariau rei osupu Anahatana Ne Inaha. 16 Tau sae, Anahatana Ne Inaha isipu inusui tanuso tewasi. Hasae sio osohu heu no rosau on oparisaa tau Upuri Yesus. 17 Reiso uaso oahusieso, oyo sio rei osupu Anahatana Ne Inaha.
18 Simon inoo ata Anahatana irui Ne Inaha osiso pusu sio maisosia oahusieso, reiso irori kepeni osiso. 19 Iahata, “Rui kawasa reini mo osi au oi, na uahusieso oi, oyo osupu Anahatana Ne Inaha.”
20 Ne Petrus on poe iasau, “Masi amataya aarihoni tuniai reini runa me kepeni raino. Ano ata mka asenu tau kepeni, oyo auna Anahatana Ne Inaha ihokai tanuso? 21 Ano me kawasa tewa na apusu tau ami mani tanei rei. Anomu katopue tewa tau Anahatana matai usena. 22 Pene aainisi sanrei ne aarihoni me kahatene rei runa aainisi tau Anahatana na iuna heu me kahatene rei. 23 Tau sae, au mo, uanei ata ano asaturuu aanana naiosa. Ano me rosau rahehea.”
24 Iahata, “Masi oainisi tau Upuri osiku na pene sae isa ereeu sani omi oasau rei.”
25 Sio osima runa sae wani oaneiki rerihoni Yesus runa oaunauso tau Upuri ne anamanaya, oyo onuniso roe Yerusalem honu. Sui arena oaunauso tau Sou Iake rerihoni Yesus sui niana-niana panesi sui Samaria.
Filipus Iaunau Ia Mainae Isa On Pani Otoe Etiopia
26 Ia maisosie isa on roe Upuri iasau osi Filipus sanrei, “Masi aeu pani na apusu arena on mai kota Yerusalem rotu-tu erehokai nau nia Gaza.” Arena rei wapani otoe huie. 27 Reiso ieui. Hoka poe arena tihue rei oyo, isupu ia mansia mainae on pani otoe Etiopia isa. Ia rei isaka Kandake ne kepeni. Kandake waini ia aia Etiopia. Ia reimo, ia pina. Ia ne ia mansia mainae rei mato ieui roe Yerusalem nanie iainaa runa Anahatana. 28 Waini inuniki iru-ruei pani kareta anoe wani nene numa koropou erenesai. Waini inoo Yesaya, ia mamsima runa Anahatana ne anamanaya isa, ne surate. 29 Oyo Anahatana Ne Inaha iasau osi Filipus, “Masi aeu ahaineke kareta reinau.” 30 Reiso iruma haineke kareta rei oyo, iatinu ia mainae rei ibaca rerihoni Yesaya ne surate. Filipus iasei tanui, “Upu. Abaca surate rei, aanei nene manariti te tewa?”
31 Iahata, “Sapani na uaneiki? Ia isa iatuheteku tewasi!” Oyo ianaha runa Filipus na isaa roe tanui na irue ikatai pani kareta anoe rei.
32 Ia waini inoo mamrunie reini rerihoni Anahatana ne anamanaya,
“Ia mo sani rompa wani onesai na ohunui.
Ia mo sani rompa anae wani oatori nene hunua.
Iasau sae isa tewa. Anamanae isa iae iasaui tewa.
33 Orati osohiki ne ia isa inetei tewa.
Imatai iarihoni tuniai reini,
reiso ia seia mka iruni rerihoni nea upu?”
34 Ia mainae rei iasei tau Filipus sanrei, “Masi aasau poe, ia waini iruni reini mo, ianamana rerihoni rompa rei, ia seia? Ianamana rerihoni ruai te ianamana rerihoni ia isa honu?” 35 Reiso Filipus iaunaui. Inana mamrunie rei sani aikune nanie iaunau ia rei tau Sou Iake rerihoni Yesus. 36 Sio wasoni pani arena tihue, oyo osupu waene. Reiso ia mainae iasau, “Masi anoo waene reipo. Nesi sae asi na asohu heu we rosau?”
37 Iahata, “Munata aparisaa runa anomu pusiki, au mka usohua.”
Iahata, “Uparisaa ata Yesus Kristus waini Anahatana anai.”
38 Oyo iaisosi kareta rei retaehe samatoro uaso osipuso on roe kareta rei. Osipuso oyo, oeuso poe waene rei. Hoka poe oyo, Filipus isohui. 39 Ohokaso on poe waene rei, oyo Upuri Ne Inaha inana Filipus iarihoniki. Ia mainae rei inooi tewa nea. Oyo ieui honu anoi mirike. 40 Mata huni oyo, Filipus waini poe nia Asdod nea. Oyo ieu ihori niana-niana iaunauso tau Sou Iake rerihoni Yesus rotu-tu ihokai poe nia Kaisarea.