9
Saulus Iparisaa Tau Yesus
1 Ne Saulus inehu iawana iahata nanie ihunu Upuri ne mampusua, reiso ieui roe ia aihuhue tau sio mamkenu makapanau osi Anahatana. 2 Ieui roe ia aihuhue rei, nanie iainisi surate na isupu kawasa na ieui pani kota Damsyik pani sio onata tau numa manouna osi sio Yahudiu pani rei. Nanie isupu kawasa na munata isupu sio wasoni oparisaa tau Yesus, sio pinau te sio hanaia pusiso, ia mka inotaso, oyo iroriso roe Yerusalem. Isupu surate rei, oyo ieui.
3 Reiso Saulus ieui pani Damsyik. Hoka pani haineke nea oyo, mata huni oyo, ita-itane wani rinane on roe noiyaha eresita-sita sani isoe erehori Saulus. 4 Ita-itane eresita oyo, iamnahui poe tuamane, oyo iatinu ia isa nioni iasau osiki sanrei, “Saulus, Saulus! Ano mo nanie auna sinsaraku, nanie ta hae?”
5 Saulus on poe iasei honu, “Upu, ano mo ano seia rei?”
Iahata, “Au reini mo, au Yesus ano wani auna sinsaraku. Auna we mampusua sinsaraso, areimo sani auna au ruaku sinsaraku. 6 Ne hanu nea, oyo aeua poe kota rei. Hoka poe oyo, ano mka aatinu rerihoni kahurae auna sae.”
7 Sio wasoni okata Saulus rei osira, reiso niono tewa, oasau runa sae isa tewa. Oatinu nioke rei, ne onoo ia isa tewa. 8 Oyo Saulus ihitio roe, iheka matai usena, ne inoo sae isa tewa nea. Matai usena raputiso. Reiso sio orime tau hanai samatoro oeu oautunui poe Damsyik. 9 Inoo mosa tewa runa iai sae isa tewa, ininu sae isa tewa rotu-tu onona tonu.
10 Poe Damsyik waini ia mampusue isa nanai Ananias. Upuri ianamana osiki tau masasua nea. Iahata, “Ananias!”
Iahata, “Upu, au reini.”
11 Iahata, “Ananias, masi aeua pani Yudas ne numa, pani arena wani sio oaoiki tau Arena Katopue. Aasei tanuso rerihoni ia isa waini nanai Saulus. Saulus rei iamrai pani nia Tarsus. Waini iainisi tau au. 12 Ia mo, inoo masasua nea. Inoo ia isa waini nanai Ananias ihokai tanui, oyo iahusiei na inoo honu.”
13 Iahata, “Upu, au mo, uatinu sio panesi oruni-runi nea runa sapani na iuna ano me mansiau roe kota Yerusalem sinsaraso. 14 Muie reini mo ihokai mai runa kawasa rerihoni sio onata tau sio mamkenu makapanau osi Anahatana na isota sio pusiso wasoni oainisi na ano aakahaiso.”
15 Ne Upuri iasau sanrei, “Masi aeua. Au mo, unini ia rei nea na ianori runaku. Mka isima runa au osi sio wasoni oationa Anahatana tewa, osi sio no aiau, runa sio Israel oi. 16 Au mo, mka uatuhetei sapani na kahurae sinsarai tau iparisaa tau au.”
17 Reiso Ananias ieui pani numa rei. Hoka pani oyo, iahusie Saulus, oyo iasau, “Waniku Saulus, Upuri Yesus waini anooi kua arena tihue rei tau ano wani ahokaya mai, iaisosiku ueuku mai na anoo honu. Mka asupu kawasa rerihoni Anahatana Ne Inaha. 18 Oyo sae isa, nooi sani ika unaya, rarenu rerihoni matai usena, oyo inoo iake honu. Inoo iake, reiso ihanui, oyo Ananias isohu heu ne rosau. 19 Ananias isohui oyo, Paulus iaiki, oyo iamkona honu.
Saulus Iaunauso Pani Kota Damsyik, Oyo Roe Kota Yerusalem
Saulus iararane ikata sio mampusua pani kota Damsyik rotu-tu onona inasa rai. 20 Ananias isohu heu Saulus ne rosau oyo, mata huni oyo, Saulus ieu iaunauso sui numa manouna osi sio Yahudiu isima iahata, “Yesus mo, ia waini Anahatana anai.”
21 Sio pusiso osira oatinu tau Saulus. Oasei tau umau sanrei, “Ia reini sahoro ihunu sio pusiso wasoni oparisaa tau Yesus roe Yerusalem, tea? Ihokai mai, nanie isota sio wasoni oparisaa, oyo iroriso roe sio onata tau sio mamkenu makapanau osi Anahatana, tea?
22 Saulus iaunauso iake, reiso sio wasoni oparisaa rei okikasi oasinena suiosa. Iaunauso rei iahata, “Yesus mo, Ia waini Ia Anahatana Iratiki Iapuheuso.” Iaunauso rotu-tu sio oanei tewa nea otuntana runai sapani.
23 Onona inasa rai oyo, sio Yahudiu orue oheu nanie ohunu Saulus. 24 Ne Saulus iatinu rerihoni kaheute rei. Osaka-saka kota rei nene mitanunua pusire onone ranie nanie ohunui. 25 Ne taue isa tau pumono, Saulus ne mampusua onanai, oyo oratiki tau pakune on roe, sui kota nene pakelo tinaie.
26 Oyo Saulus ieui roe Yerusalem. Hoka roe oyo, nanie iamanou tau osa runa Yesus ne mampusua. Ne okaitaui. Oparisaa tewa ata manisate ia waini ia mampusue nea. Oahata iakarota mani. 27 Oyo Barnabas ihokai noi tanui, oyo iautunui pani sio maisosia. Barnabas iruni osiso runa sapani na Saulus inoo Upuri kua arena tihue. Iruni runa sapani na Upuri ianamana osiki. Isima osiso runa sapani na Saulus iatuheteso rerihoni Yesus poe Damsyik. Iatuheteso ikaitau tewa. 28 Reiso Saulus iruei ikataso. Iaunauso rerihoni Upuri sui Yerusalem pusiki. Ikaitau tewa. 29 Ianamana iawaru oi runa sio Yahudiu wasoni oanamana sou Yunani, ne sio onina rea, nanie ohunui. 30 Sio wasoni oparisaa oatinu tau rei, reiso sio oautunu Saulus nau nia Kaisarea, oyo oaisosiki ieui pani nia Tarsus.
31 Oyo sio wasoni oparisaa rei sui otoe Yudea, otoe Galilea, runa otoe Samaria sinsaraso tewa nea. Anahatana Ne Inaha iakahaiso reiso okikasi oasinena. Oparisaa ia-ia. No hali oamuira Upuri.
Petrus Isuisene Eneas Runa Dorkas
32 Petrus ieu ihori iaunau Anahatana ne mansiau sui supani-supani mani. Taue isa ieui nau nia Lida, nanie inoo Anahatana ne mansiau nau niane rei. 33 Hoka nau oyo, isupu ia hanaie isa waini nanai Eneas. Ia rei ia waini italai. Musum wanu nea inekei mani. Ihanu kua tewa nea. 34 Reiso Petrus iasau osiki, “Eneas, Yesus Kristus waini isuisenea nea. Hanu roe. Aautotu naniamu reino.” Mata huni tewa oyo, ihanui. 35 Sio pusiso nau Lida runa otoe Saron onoo Eneas, oyo pusiso oparisaa tau Upuri.
36 Nau nia Yope waini ia pina isa nanai Tabita. Ia pina rei, iparisaa tau Yesus. (Tau sou Yunani, Tabita nene manariti Dorkas, nene manariti maiyanane.) Ia iuna-una iake runa iaka-kahai sio mosokinia. 37 Tau muie rei ikupui, oyo imatai. Imatai oyo, sio osohu tinaini, oyo oautuei roe kakaranae roe naue. 38 Yope runa Lida waroni haineke umau. Reiso sio mampusua nau Yope oatinu ata Petrus waira Lida, oyo oaisosi sio ua oeuso ria tanui. Hoka ria oyo, oasau osiki sanrei, “Masi aeua san-sana nau.” 39 Reiso Petrus ihitioi roe, oyo ieu ipususo. Hoka nau oyo, oautunui roe kakaranae rei. Sio pina uhanu wasoni ooo ohoriki orani, oyo oatuhete papita runa apia tamena osiki. Apia rai, Dorkas ihonire on waini iamahaiki asi. 40 Oyo Petrus iaisosi sio pusiso ohokaso, oyo irike tune nanie ianamana runa Anahatana. Ianamana runa Anahatana oyo, iuniki inoo ia matane rei, iahata, “Tabita, hanu roe!” Oyo Dorkas iheka matai usena inoo Petrus. Inooi oyo, ihanui iru-ruei. 41 Oyo Petrus isopa hanai osiki irimei ihitioi roe. Ihitioi roe oyo, Petrus ianaha runa sio pina uhanu runa sio pusiso wasoni oparisaa rei, oyo iatuhete ia pina onate rei osiso. Waini iamahaiki honu. 42 Sio panesi sui Yope pusiki oatinu tau rei, reiso sio panesi oparisaa tau Upuri Yesus. 43 Petrus iruei potuina nau Yope. Iruei tau Simon ne numa. Simon mo, ia ne tanei tau makapana unte.