10
Kornelius Runa Petrus Onoo Masasuau
1 Poe nia Kaisarea waini ia hanaie isa nanai Kornelius. Ia waini ia kapitane tau sio soratatua utuni. Oaoi ne tikane tau, “Tikane Italia.” 2 Iamuira Anahatana. Ia runa ne numa pusiso oainaa runa Anahatana. Iamanane iaka-kahai sio Yahudiu wasoni omosokiniso. Iana-anamana runa Anahatana. 3 Taue isa, tau ranie manne inoo masasua. Inooi manisate. Inoo ia maisosie on roe Anahatana isa ihokai, oyo ioiki. Iahata, “Kornelius!”
4 Kornelius inoo ia maisosie rei, ikaitaui, oyo iasei, “Sae rei, upu?”
Iahata, “Anahatana iatinu tau me mainisie iake nea. Inoo ata ano aamanane asama sio mosokinia. Reiso anoi erepeka runaya. 5 Reiso aaisosi ia isa na ieui pani niane wani nanae Yope na aanaha runa Simon. Nanai naue Simon Petrus. 6 Ia waini iararane pani Simon ne numa. Simon rei, ia ne tanei tau makapana unta. Iruei nau nuae nusue.” 7 Ia maisosie rei ianamana runa Kornelius suka, oyo ieui. Ieui oyo, Kornelius ianaha runa ne makahaia ua runa ia tantara isa. Ia tantara rei iai-ainaa runa Anahatana. 8 Kornelius iruni osiso runa ne masasua rei, oyo iaisosiso oeuso pani Yope.
9 Hanr roe oyo, sio wasoni oeuso pani Yope asi. Wasoni haineke nea. Oyo Petrus isaa roe numa hahae tau ranie katopu, nanie ianamana runa Anahatana. 10 Oyo imakaneai mainae, nanie iaiki. Sio wasoni oatanunu osiki, oyo inoo masasua sanrei. 11 Inoo nante erehekai, oyo sae isa nooi sani nipa hekani, sio oratiki. Nooi sani sio oakatanai tau nene susua ate. 12 Pani nipa anoe isupu makapanau nene ai atua ate nitaya pusire, sae waroni rausu te raeu nene tiaya rahanunu pusu tuamane nitaya pusire. Isupu manu seaya oi. 13 Oyo iatinu nioke isa ereasau sanrei, “Petrus, hanu roe. Hunure na aire.”
14 Petrus on poe iasau, “Upu, au upeneku! Au mo, uai muaine wani repaputiki te monne isa tewasi. 15 Iahata, “Pene aasau ata sae wani Anahatana iasau ata ano aaiki iake, pene aasau ata monne.” 16 Sani rei nai tonu oyo, Anahatana iapusaa nipae rei roe noiyaha honu.
17 Petrus iasei pani anoi, “Masasua rei, Anahatana nanie iasau sae osiku pusui?” Waini iarinii asi, oyo sio maisosia on poe Kornelius osupu ne numa. Oasei tau sio umau rotu-tu osupui. Sio wasoni oooso poe mitanunue nea. 18 Sio ooi, oyo oasei, “Waini ia isa iararane mai numa reini nanai Simon Petrus?”
19 Petrus waini iarinii ne masasua rei asi, oyo Anahatana Ne Inaha iasau osiki, “Ee, Petrus. Sio tonu wasopo oninaya. 20 Hitio! Sipu poe! Aeu akataso iake. Pene aarinii ata kani apusu ia waini ia Yahudi tewa, apusui iake te tewa. Au sahoro uaisosiso.” 21 Reiso Petrus isipui poe, oyo iasau osiso sanrei, “Au reini mo sahoro omi wani oninaku. Ohokamo mai, onina au nanie ta hae?”
22 Iahata, “Kornelius, ia kapitane, iaisosima mai. Ia mo, anoi manisate. Iamuira Anahatana. Reiso sio Yahudiu pusiso oamuirai mainae. Ia maisosie on roe noiyaha waini ia manisate onate isa iaisosiki na iainisi ata ano aeua pani ne numa na iatinu tau me maunaune.” 23 Reiso Petrus iaisosiso sanrei, “Mai, onusu mai. Oararanemo mai numa reini mkane.”
Petrus Ieu Poe Kornelius Ne Numa
Hanu roe oyo, Petrus ihanui, oyo ieu ikata sio on poe Kornelius ne numa. Sio umau wasoni oparisaa tau Yesus pani nia Yope rei oeu okatai oi. 24 Oyo nene hanu roe honu samatoro ohokaso poe nia Kaisarea. Poe rei Kornelius waipo inapa-napaso ikata ne mansiau runa ne netau iaka wasoni ianaha runaso nea. 25 Hoka poe oyo, Petrus inusui pani ne numa. Oyo Kornelius ieu iatapeai, oyo iamnohoi mai Petrus uai anoe iainaa runai. 26 Ne Petrus ihetui ihitioi roe, oyo iasau, “Hitio roe! Au reini mo, au tumata oi sani ano rei tea?” 27 Petrus waini ianamana asi, oyo inusui pani kakaranae isa. Oyo inoo ata sio panesi oamanouso nea. 28 Oyo iasau osiso, “Wea amau, wea kakau, wea waniu. Omi ruamo oanei nea ata ami Yahudiu mani monne eresopo na pene anusu ia tamene ne numa te pene akata ia tamene. Ne Anahatana iatuheteku nea ata au uahata ia sia mani iapaputiki te monne. Uahata sanrei, areimo iake tewa. 29 Reiso ano aanaha runaku, uhokaku mai. Uasau tea ata, ‘Upeneku.’ Reiso nanie uanei nea. Aanaha runaku, nanie ta hae?”
30 Iahata, “Kakaku Petrus. Onnaha tonusi, ranie sanrei, au wani uanamana runa Anahatana mai numa tau ranie manne. Mata huni oyo, ia hanaie isa waini ioo mai uaku anoe. Ia rei, ne papite erekino-kinoi. 31 Iahata, ‘Kornelius! Anahatana iatinu me mainisie nea. Anoi erepeka ata ano aamanane asama sio mosokinia. 32 Reiso aaisosi ia isa ieui pani Yope na aanaha runa ia isa waini nanai Simon Petrus na ihokai mai iaunaumo. Waini iararane pani ia isa ne numa. Ia rei ne tanei tau makapana unta. Nanai Simon. Ne numa wanau nuae nusue. 33 Reiso uaisosiso san-sana na oanaha runaya. Anomu mo, anomu iake mainae ahokaya mai. Muie reini mo, aamanouma mai rei na aatinu pusire waroni Anahatana iaisosia aasau osima. Anahatana waini mai rei ikata ita oi.’”
34 Reiso Petrus iaunauso sanrei, “Wea amau, wea kakau, wea waniu. Muie reini mo, au mato uanei ia-ia ata Anahatana irui osa osi pusita. 35 Anahatana iararuma ia seia mani, rerihoni niane sae mani. Hete sae, iamuirai runa iuna sae wani manisate. 36 Omi oanei nea. Oanei maunauna waroni Anahatana iruire osi ami Israel. Maunauna rai waroni Sou Iake rerihoni sapani na Yesus Kristus imatai, oyo ihunu re nisa runa Anahatana. Yesus rei mo, ia Upuri waini irime sio tuniai reini pusiso. 37 Oanei nea sapani pani otoe Yudea pusiki. Yohanes iasau ata isohu heu no rosau, oyo Sou Iake rerihoni Yesus nene aikune ria otoe Galilea. 38 Oanei nea ata Anahatana ihiti Yesus, ia Nasaret rei nea. Oanei ata irui Ne Inaha osiki reiso isupu kawasa. Ieu ihori sui supani-supani iuna iake. Isuisene sio pusiso wasoni ia aia sakahatene iakarotaso. Tau sae, Anahatana ikata runai. 39 Ami ruama anoo ne atata pusire pani kota Yerusalem runa ami Yahudiu mani tuamane pusiki. Ne sio opakui roe hini wani reniene reiso ohunui. 40 Ne nene pouarei oyo, Anahatana iapuhaiki honu rerihoni sio matana, oyo iatuhetei osi sio umau na onooi. 41 Sio pusiso onooi tewa. Hasae ami wani Anahatana ininima naone sahoro anooi. Asima osi sio pusiso. Aaima akatai on iamahaiki honu rerihoni sio matana. 42 Yesus iaisosima na aaunauso runa asima ata ia waini Anahatana ihitiki na iapasana sio pusiso, sio wasoni oamahaiso runa sio wasoni omataso nea. 43 Sio mamsima runa Anahatana ne anamanaya pusiso oanamana rerihoni ia rei. Sio oasau ata sio pusiso wasoni oparisaa tau Yesus, mka Anahatana isiru heu no rosau tau kawasa rerihoni Yesus.”
44 Petrus waini ianamana asi, oyo sira tau Anahatana Ne Inaha isipu. Isipu oyo, sio pusiso wasoni oatinu tau maunaune rei osupu kawasa. 45 Sio Yahudiu wasoni oparisaa tau Yesus wasoni opusu Petrus on pani Yope, sio pusiso osira onoo ata Anahatana irui Ne Inaha osi sio wasoni sio Yahudiu tewa oi. 46 Tea mo, oatinu sio rei oanamana tau sou waroni ruao oaneire tewa. Sio wasoni oainaa runa Anahatana oahata, “Anahatana! Ano mo, ano iake naiosa! Ano arui Yesus osima na aparisaa tau ia na asiru heu mani rosau. Ano iake tunne naiosa.”
Oyo Petrus iasau, 47 “Masi onoo, sio rei osupu Anahatana Ne Inaha sani ita nea. Sapani na ia isa isopo na pene osohu heu no rosau tau tihu?”
48 Reiso Petrus iaisosiso na osohu heu no rosau tau sio oparisaa tau Yesus Kristus. Osohuso, oyo oainisi na Petrus iararane ikataso onona inasa rai.