11
Petrus Isima osi Sio wasoni Oparisaa roe Yerusalem
1 Sio maisosia runa sio wasoni oparisaa sui otoe Yudea pusiki oatinu ata sio wasoni sio Yahudiu tewa oparisaa tau Anahatana ne maunauna nea. 2 Petrus ieui roe Yerusalem, oyo sio Yahudiu wasoni oparisaa rei oasau tanui. 3 “Aeua poe ia Yahudi tewa waini sio orehiki tewasi ne numa, nanie ta hae? Oyo aai akataso oi.” 4 Reiso Petrus iatuheteso rerihoni pusire, on mataanoe rotu-tu pusiki. Iahata,
5 “Wea amau, wea kakau, wea waniu. Taue isa, au mo, au wani uanamana runa Anahatana nau nia Yope, oyo unoo masasua isa. Unoo sae isa sani nipae hekani, noo sani sio oratiki on roe nante. Nooi sani oakatanai tau nene susua ate rei. Oyo retaehei mai nusuku. 6 Unoo pani nipae anoe ia-ia, oyo unoo makapanau waroni nene ai atua ate, makapanau waroni rasea, sae waroni rausu te raeu nene tiaya rahanunu pusu tuamane runa manua rasea. 7 Oyo uatinu nioke ereasau sanrei, ‘Petrus, hanu roe. Ahunure na aaire.’ 8 Ne au on poe uasau, ‘Upu, upeneku. Au mo, uai muaine wani repaputiki te monne isa tewasi.’ 9 Ne uatinu nioke rei on roe nante ereasau honu, ‘Sae wani Anahatana iasau nea ata ano aaiki iake, pene aasau ata monne.’ 10 Sani rei nai tonu oyo, Anahatana iapusaa pusire roe noiyaha honu. 11 Mata huni tewa oyo, sio tonu ohokaso on poe nia Kaisarea. Kornelius iaisosiso poe tanuku. Ohokaso poe numa wani uararane tanui. 12 Oyo Anahatana Ne Inaha iaisosiku ueu ukataso. Ipenei tau au uuna ano-ano ata kani iake te tewa. Sio nome wasoni oparisaa reini mo, opusu oi, rotu-tu poe Kaisarea. Hoka poe oyo, anusuma pani Kornelius ne numa. 13 Anusu pani, oyo Kornelius isima osima runa sapani na inoo ia maisosie on roe noiyaha isa ioo pani ne numa, oyo iasau, ‘Aaisosi ia isa ieui pani Yope na aanaha runa ia hanaie isa waini nanai Simon Petrus. 14 Ia mka isima osia runa maunauna rerihoni sapani na Anahatana iapuheua na aamahaia rotu-tu ria supani. Ano runa me mansiau pusimo. 15 Au mato uanamana, oyo Anahatana Ne Inaha ikaisunu inusui tanuso sani naone runa ita oi. 16 Oyo anoku erepeka ata naone Upuri iasau sanrei, ‘Yohanes isohu heu mo rosau tau tihu, ne mka Anahatana inusu Ne Inaha osimo.’ 17 Reiso Anahatana irui Ne Inaha osi sio rei, sani iruiki osi ita Yahudiu oi pannuhu ita iparisaa tau Upuri Yesus, Ia Anahatana Iratiki Iapuheuso. Reiso sapani na usopo Anahatana? Anahatana mato iatuheteku ata ita Yahudiu runa sio wasoni sio Yahudiu tewa, inoo pusita osa.” 18 Sio oatinu tau rei, oyo oasau tanui tewa nea. Oyo oainaa runa Anahatana. Oasau sanrei, “Reiso ita ianei nea ata Anahatana itapi sio wasoni sio Yahudiu tewa oarihoni no rosau runa oamahaiso rotu-tu ria supani.”
Sio wasoni Oparisaa poe Kota Antiokhia
19 Naone sio ohunu Stefanus, oyo ouna sio wasoni oparisaa sinsaraso rotu-tu sio pusiso oruma owena-wenaso. Sio umau orumaso poe otoe Fenisia, sio umau orumaso nau nusa isa wani nanae Siprus, sio umau honu orumaso poe kota Antiokhia. Sio oau-aunau sio Yahudiu mani tau Sou Iake rerihoni Anahatana. 20 Ne sio umau rerihoni sio rei wasoni on nau nusa Siprus runa sio rerihoni nia Kireneu. Sio rei oeuso poe Antiokhia. Hoka poe oyo, oaunau sio wasoni sio Yahudiu tewa. Oaunauso rerihoni Upuri Yesus. 21 Upuri irui kawasa osiso reiso sio panesi oparisaa. Orui ruao osi Upuri na opusui.
22 Sio wasoni oparisaa roe Yerusalem oatinu tau rei, reiso oaisosi Barnabas ieu poe Antiokhia. 23 Hoka poe oyo, Barnabas inoo ata Anahatana irui iake osiso, reiso anoi mirike. Oyo iaunauso na sio rei opusu Anahatana runa anoo pusire. 24 Ia rei, ia waini anoi iake. Isupu kawasa rerihoni Anahatana Ne Inaha na iparisaa mainae tau Anahatana. Sio Antiokhiau onoo Barnabas waini sanrei, reiso sio panesi opusu Upuri.
25 Oyo Barnabas ieui nau nia Tarsus, nanie inina Saulus. 26 Hoka nau oyo, isupui, oyo iautunui ria Antiokhia. Reiso hoka ria oyo, sio oamanouso runa sio wasoni oparisaa. Oatuhete sio panesi rotu-tu musum osa. Ria Antiokhia rei sio mato oaoi sio wasoni oparisaa tau sio Kristen.
27 Tau muie rei, sio mamsima runa Anahatana ne anamanaya umau ohokaso poe Antiokhia on roe kota Yerusalem. 28 Ia mamsimane isa waini nanai Agabus iamanou runa sio wasoni oparisaa, oyo ihitioi roe. Isupu kawasa rerihoni Anahatana Ne Inaha na isima runa pani muie mka sapani. Iahata, “Potuina tewa nea, oyo sio pusiso sui tuniai reini mo, osupu muaine tewa nea.” (Poe oyo, ereeu sanrei sirinia pannuhu Klaudius waini ia natu.) 29 Reiso sio mampusua oapamata sou nanie oauwatu kepeni osi no netau wasoni oparisaa rei pani otoe Yudea. Sio pusiso orui pusu ruao no kepeni waromo sapani. 30 Ouna sanrei oyo, oaisosi Barnabas runa Saulus orori kepeni rai osi sio onata tau sio wasoni oparisaa pani rei.