12
Ia Maisosie On Roe Noiyaha Isa Ihoka Petrus On Pani Pui Anoe
1 Barnabas runa Saulus wasoni poe kota Antiokhia oyo, ia aia Herodes iaisosi sio umau osota sio onata tau sio wasoni oparisaa rei, nanie iunaso sinsaraso. 2 Iaisosiso ohunu Yohanes kakai waini nanai Yakobus tau tunue. 3 Herodes inoo ata iuna sanrei, sio Yahudiu okaumini, reiso iaisosiso osota Petrus oi. Osotai tau karisaa sio Yahudiu oai poroti eresaa tewa. 4 Osotai, oyo onusui pani pui anoe. Sio tantarau tikana ate osaka-sakai. Tau tikane osa wasoni sio tantarau ate. Herodes ne kaheute nanie inapa rotu-tu karisaa anoo rapeka runa noa upu oarihoni Mesir pusiki, samatoro iasei tanui. Iasei tanui, sio pusiso oasumata. Nanie iasei tanui na ihunui.
5 Reiso osaka-saka Petrus pani pui anoe. Ne sio wasoni oparisaa rei, wasoni oai-ainisi runa anoo pusire tau Anahatana osiki.
6 Nene hanu roe Herodes nanie iasei tanui, oyo pumono pani sanrei oyo, Petrus waini inekei ikata sio tantarau ua. Petrus waini pakatihue. Okanihooi tau ranteu tau sio tantarau ua rei. Sio tantarau tamena wasoni osaka-saka pui nene mitanunue oi. 7 Mata huni oyo, ia maisosie isa on roe Upuri ioo pani rei, oyo rinane eresita sui pui nene kakaranae rei pusiki. Ia maisosie rei ihita Petrus nusui, nanie ihanui. Iahata, “He, hanu san-sana roe!” Oyo ranteu rai suru poe ramnahuso rarihoni hanai atua. 8 Oyo ia maisosie iasau, “Ausahu me apia. Kanihoo me sanraliu.” Oyo Petrus iuna sani iasau rei. Oyo iasau honu, “Ausahu me papi titie na aeu mai akataku.”
9 Reiso Petrus ieu ipusu ia maisosie rei rotu-tu ihokai pani manahane rerihoni pui anoe rei. Ne Petrus ianei tewa ata manisate waini ihokai rerihoni pui anoe rei. Iahata kani inoo masasua mani. 10 Sio oniku sio mamsakaya mataanoe. Ita oniku sio mamsakaya umau honu samatoro ohokaso poe mitanunu mamono wani opusui rotu-tu ohokaso poe kota. Mitanunue rei ruae erehekai, oyo ohokaso samatoro oeuso sui arena isa. Mata huni oyo, ia maisosie ieu iarihoni Petrus.
11 Oyo Petrus mato ianei ata manisate ihokai rerihoni pui anoe nea. Iahata, “Muie reini mo, uanei ia-ia nea ata Upuri iaisosi ne maisosie on roe noiyaha na inanaku rerihoni Herodes ne kawasa. Inanaku rerihoni pusire waroni sio Yahudiu nanie ouna osiku.”
12 Petrus ianei nea, oyo ieui ria Maria ne numa. Maria rei sahoro Yohanes inai. Yohanes, sio oaoiki tau Markus oi. Ria ne numa rei, sio panesi oamanouso nea. Sio wasoni oainisi. 13 Petrus iakapeti mitanunu pakelo, oyo ia pina makahaie waini nanai Rode, ihokai, nanie inoo runa ia seia waini iakapeti mitanunue rei. 14 Iationa Petrus nioni, reiso anoi mirike. Anoi mirike, reiso iheka mitanunue tewa. Ne inusui pani numa rei honu, oyo isima osiso. Iahata, “Petrus waipa manahane.” 15 Oahata, “Amukea.”
Ne Rode iasau-iasau ata, “Titue, Petrus waipa manahane. Petrus waipa nea.”
Ne sio on poe oasau oahata, “Areimo ne maisosie on roe noiyaha. Naone isakai. Ihokai nea, nanie isima ata Petrus imatai nea.”
16 Oasau sanrei Petrus waini iaka-kapeti mitanunue sirinia. Reiso oheka mitanunue rei, oyo onooi. Osira hunu ruao. 17 Petrus isopo tau hanai na oamaturuso, oyo isima runa sapani na Upuri iautunui rotu-tu ihokai rerihoni pui anoe rei. Oyo iahata, “Asima osi Yakobus runa rea kakau rea waniu tamena oi.” Oyo Petrus ieu iarihoni naniai rei, oyo ieui noi naniai tamene.
18 Nene hanu roe oyo, sio tantarau poe pui rei ouna purie naiosa. Oasei tau umau, “Petrus waini sui supa rei omi?” 19 Oyo Herodes iatinu tau rei, reiso iaisosiso onina Petrus. Oninai, ne osupui tewa. Reiso Herodes ianaha runa sio mamsaka pui rei, nanie iasei tanuso. Iasei tanuso, oyo iaisosiso ohunu sio mamsaka pui rei.
Oyo Herodes ieu iarihoni otoe Yudea, nanie iararane nau nia Kaisarea mkane.
Herodes Imatai
20 Herodes iakapuku naiosa tau sio nia Tirus runa sio nia Sidon. Reiso oamanouso nanie oeu pani tanui. Hoka pani oyo, oapamanu Blastus na iakahaiso. Blastus rei waini ia mamsaka Herodes ne numa. Oapamanu Blastus na ianamana osi Herodes na sio ruao mka oanamana runai. Ianamana osiki, oyo Herodes iamanaku, oyo oanamana runai, nanie ohunu nisa. Tea mo, sio pusiso noi sio no niana osupu muaine rerihoni Herodes ne niana. 21 Tau ranie hatae isa wani ihete umetene, Herodes iausahu api aia, oyo iruei tau katera aia. Iaunau sio pusiso. 22 Oyo sio wasoni oatinui rei, oakapona, “Ia waini ianamana rei, ia Anahatana, ia tumata tewa!” 23 Mata huni tewa oyo, ia maisosie on roe Upuri iunai ikupui mtinte. Tea mo, itapi sio panesi rei oainaa runai sani ia Anahatana rei. Iaisosiso oainaa runa Anahatana ruai tewa. Reiso nikonaka raaiki, oyo imatai.
24 Sio wasoni oaunauso tau Anahatana ne maunauna rarihoni Yesus sui supani-supani honu. Reiso sio wasoni oparisaa okikasi oasinena honu.
25 Barnabas runa Saulus orori kepeni pani otoe Yudea osi sio wasoni oparisaa, oyo onuniso on roe kota Yerusalem. Onuni okata Yohanes Markus.