3
1 Oyo Yesus ieu pani numa manoune honu, oyo isupu ia hanaie isa. Ia reimo, hanai atue erematai. 2 Sio umau pani rei wasoni oaka-akaohu Yesus, nanie oamanarui. Nanie onoo ata kani isuisene ia rei tau ranie hatae wani iaranahata rei te tewa. 3 Oyo Yesus iasau osi ia kupue rei. Iahata, “Aeu mai na ooa kua tihue reini.” 4 Yesus iasei tau sio panesi rei. Iahata, “Nene iake tau ranie hatae wani iaranahata reini mo, iuna sae? Iuna iake? Iuna kahatene? Iuna karihuru? Te ihunu? Te sae?”
Ne sio panesi rei oamaturuso mani. 5 Oyo iasumataso. Anoi eresaa. Anoi runaso tau sio unuo onata. Oyo iasau osi ia kupue rei iahata, “Asasona hanamu mai.”
Oyo iasasona hanai. Hanai iake nea. 6 Oyo sio ona Farisiu rei ohokaso arihoni sio Yahudiu no numa manoune rei, oyo oanamana runa Herodes ne mampusua, na nanie ohunu Yesus.
Sio panesi oahata Yesus mo, ia iake reiso opusui
7 Yesus runa ne mampusua oeuso oarihoni sio hutue rei, oyo oeuso pani waene. Ne sio Galileau panesi oeu opusu Yesus oi, runa sio on pani otoe Yudea, 8 sio on pani kota Yerusalem, sio on pani otoe Idumea, runa sio on ria Wae Yordan on ria hae, runa sio on nau nia Tirus runa nia Sidon. Sio pusiso ohokaso pani Yesus tau oatinu rerihoni iuna sae. 9 Reiso Yesus iaisosi ne mampusua onoo na arupae isa matane osiki. Oyo orurui hainekei. Ikaitau pene tutu sio mansia hutue wasoni sinasi rei oesei reiso iainisi arupae rei. 10 Isuisene kupua inaya panesi, reiso sio kupua pusiso oruru heu umau, na oeu haineke Yesus na oakahuui. 11 Sakahatena ranoo Yesus, ranoo ata ia mo, ihokai arihoni Anahatana. Reiso oakapona oahata, “Ano sahoro Anahatana Anai!”
12 Ne Yesus isoposo na pene osima runa ia, ata ia mo, ia seia.
Yesus ihiti ne sio maisosia hutusa rahana ua
13 Yesus isuisene sio kupa pusi, oyo inoai roe pupue, samatoro ianaha runa sio umau wasoni ruai ne maue na opusui. Sio rei ohokaso roe, 14 oyo ihiti sio hutusa rahana ua. Iahata, “Uhitimo na okataku sui supani na uaisosimo oaunau runa Sou Iake wani on roe Anahatana. 15 Mka Anahatana irui kawasa osimo na onei sakahatena.”
16 Sio hutusa rahana ua wasoni Yesus ihitiso rei mo, nanao:
Simon (Simon mo, Yesus ihete nanai tau Petrus),
17 Yakobus runa wanini Yohanes (uaso noa ama tau Zebedeus, Yesus ioiso tau Boanerges, nene manariti ‘sio sani tinaa’),
18 Andreas,
Filipus,
Bartolomeus,
Matius,
Tomas,
Yakobus (amai tau Alfeus),
Tadeus,
Simon ia Zelot,
19 runa Yudas Iskariot, ia waini mka iaheni Yesus na sio ohunui.
Sio matuhete Musa ne maunauna oamanaru Yesus
20 Yesus inuniki on roe pupue, oyo inusu pani numa isa. Ne mansia hutue ohoka oamanouso honu rotu-tu Yesus runa ne mampusua oai mosa tewa. 21 Ne mansiau oatinu sanrei, oyo oeu osotai, tea mo, sio panesi oasau oahata, “Iarirunei nea.” Sio oasau sanrei tau iai tewa.
22 Sio matuhete Musa ne maunauna wasoni ohokaso on roe kota Yerusalem oasau oahata, “Beelzebul eresuniki!” (Beelzebul mo, ia aia sakahatene.) “Reiso Ia aia sakahatene rei irui kawasa osiki na inei sakahatena rei tea!”
23 Oyo Yesus ioi sio hutue rei, samatoro iaunauso tau mamruni matuhetena. Iahata, “Sapani na sakahatene erenei sakahatene? 24 Munata sio niane owena-wenaso, areimo niane rei huie nea. 25 Munata ipane isa erewena-wenai, areimo ipane rei tihoniki nea. 26 Reiso munata ia aia sakahatene inei ruai ne mansiau na owena-wenaso, mka ne kawasa mainae tewa nea.
27 Noo sani ia isa nanie inusui pani ia mkonae isa ne numa na ikimanaka ne apia. Ne kahurae ikanihoo ia mkonae rei ee. Ikanihooi, samatoro inusui ikimanaka ne apia.” (Yesus ianamana rerihoni ruai sani ia waini ikanihoo ia mkonae rei. Ikanihooi, areimo sani inana ia aia sakahatene ne kawasa.)
28 “Areini mo, anamana manisate. Anahatana isiru heu rosa sae mani runa isiru heu sio no anamana kahatena rerihoni Anahatana pusire. 29 Ne munata sio oanamana kahatene rerihoni Anahatana Ne Inaha, Anahatana isiru heu no rosa rei tewa rotu-tu ria supani.”
30 Iasau sanrei tau sio oasau oahata, “Sakahatene eresuniki.”
Yesus inai runa nea waniu
31 Yesus iatuhete pani numa anoe, inai runa nea waniu ohokaso. Ooso pani mui, oyo oaisosi ia isa ioi Yesus. 32 Sio mansia hutue wasoni orue ohori Yesus. Oyo ia rei iasau osiki iahata, “Masi anoo. Inamu runa mea waniu wasoni pani mui oninaya.”