2
Daud Iaunau Salomo tau Muie
1 Haineke Daud ne ukuro nea oyo ianaha runa anai hanaie Salomo. Hoka mai samatoro iaunaui. 2 Iahata, “Eu mai na uaunaua. Wani haineke we ukuro nea reiso amkona anomu kurute. 3 Atinu tau Anahatana waini ano ainisi ainaa runai ne maunauna. Apusu ne arena wani katopue. Arime kuru ne maunauna waroni Musa ikanure. Arime kurure na anana me sae mani oo asupu pusire iake. Aeu sui supa mani asupu iake sirinia. 4 Arime kurure na Anahatana irui pusu sae wani itotoe osiku. Itotoe iahata, ‘Sani mea upu mea momou osaka ruao ia-ia na oatinu tanuku suiosa tau anoo pusire mka mea upu mea momou orime Israel ia isa pusi ia isa rotu-tu ria supani.’
5 Ne ano ruamu iae anei tea. Yoab waini amai tau Zeruya rei iuna kahatene tanuku. Ihunu sio soratatua Israel no kapita onata ua. Ihunu Abner waini amai tau Ner runa Amasa waini amai tau Yeter. Ihunu uaso aikee manahitane tewa. Ihunu uaso reiso isohu ruai ne koropou unte tau nasi runa ne sandaliu oi tau nasi. 6 Reiso aunai pusu ruamu anei. Ano ruamu anei nea sae wani iake sae wani iake tewa. Ne pene atapiki imatai tau sanan.
7 Isa honu mo, arihoni Barzilai ia Gilead rei ne hehuka mo aunaso iake. Asaka anoo runaso apakeso apanaso. Tea mo sio sahoro oakahaiku iake tau urumaku arihoni kakamu Absalom.
8 Isa honu mo, arihoni Simei waini amai tau Gera, ia Benyamin arihoni nia Bahurim. Taue isa au ueuku poe Mahanaim mo inehu iawanaku. Ne tau on ria nanie ununiku mo inapaku ria Wae Yordan iainisi iripa koku arihoniku ata nanie pene uhunui. Reiso au usopa tau Anahatana ata mka uhunui tewa. 9 Ne muie reini pene anooi sani isana tewa. Ano anei sae wani iake sae wani iake tewa. Ano anei sae wani mka kahurae unai osiki. Ahunui. Apasanai na pene imatai tau sanan.”
10 Iaunau suka sanrei oyo Daud imatai reiso okaniki haineke nea upu nea momou no kupuro roe Yerusalem wani oaoiki tau Daud ne kota. 11 Daud imatai reimo irime sio Israel rotu-tu musum hutu ate. Irimeso iruei poe Hebron musum itu. Irimeso iruei roe Yerusalem musum hutu tonu rahana tonu. 12 Daud imatai oyo anai hanaie Salomo ikati amai tau aia. Irime sio Israel sio umau onesi kuai tewa.