2 SAMUEL
1
Daud Iatinu ata Saul Imatai Nea
1 Tau ia onate aia Saul mato imatai tau manah1itane rei, Daud inuni iarihoni iahita runa sio Amalek. Oahita runa umau, Daud sio sahoro onesi sio Amalek. Inuni hoka mai oyo orueso onona ua mai nia Ziklag. 2 Nene hanu sanrei oyo ia hehuke isa ihokai on pani Saul sio naniao onekeso. Ikiha ne papite nea runa iaunutu tuamane roe unui na sio oanei ata anoi repunoko Saul. Ieui poe Daud oyo ihahue mai tanui nanie iamuirai. 3 Oyo Daud iasei tanui iahata, “Ano on supa rei?”
Iahata, “Upu. Au mato urumaku arihoni sio Israel naniao wasoni onekeso.”
4 Ita iasei honu, “Reiso ano anoo pani rei sapani? Masi aruni osiku.”
Iahata, “Sio soratatua panesi orumaso arihoni manahitane rei. Runa sio panesi omataso. Saul runa Yonatan iae omataso.”
5 Iahata, “Sapani na rotu-tu ano anei rei? Sapani na rotu-tu ano anei ata Saul runa Yonatan wasoni omataso.”
6 Iahata, “Manahitane rei iae, au wapani rei oi roe Tineta Gilboa. Reiso unoo Saul isane tau ne atiene samatoro sio Filistin no karetau waroni naitanana ranesare runa sio soratatua arihoni sio Filistin wasoni osaa naitanane rei wasoni ohainekei.
7 Taa sanrei oyo Saul iuni noo hae muie oyo inooku. Inooku oyo ioiku. Ioiku oyo usana. Uahata, ‘Oe. Upu.’
8 Oyo iasei tanuku. ‘Ano mo ano seia? Ano arihoni otoe sae?’
Uahata, ‘Upu. Au on poe otoe Amalek.’
9 Iahata, ‘Aeu mai na ahunuku. Tewa mo au we apata mainaya. Au haineke nanie umataku nea. Reiso mai na ahunuku naiosa.’
10 Oyo au ueu hainekei oyo uhunui. Tau sae? Ioo kua tewa nea reiso mka iamnohoi oyo imatai sirinia. Uhunui oyo unana ne topi aia. Unana ne topi arihoni unui runa ne pinae arihoni hanai atue. Mai. Urorire raini.‘”
11 Daud iatinu sanrei oyo ikiha ne papite. Tau sae? Anoi repunokoso. Ne soratatua iae okiha no papita oi. 12 Orani oatamisiso runa oamaoni rotu-tu pumono. Anoo rapunoko Saul runa Yonatan. Anoo rapunoko sio soratatua umau wasoni omataso oi tau manahitane rei. Soratatua rei wasoni Anahatana ne soratatua.
13 Oyo Daud iasei tau ia hehuke rei iahata, “Ano mo ano arihoni otoe sae?”
Iahata, “Au on poe otoe Amalek. Ne au wani urueku mai ano me otoe sani au rakane.”
14 Iahata, “Ano masike! Ano me parane ahunu ia onate aia waini Anahatana ihitiki?”
15-16 Oyo Daud ioi ia ne soratatue isa. Iahata, “Mai. Ahunu ia hehuke reini.”
Daud iasau osi ia Amalek rei iahata, “Sana ruamu. Ano ruamu asima nahu ruamu ata ahunu ia onate aia waini Anahatana ihitiki. Reiso ruamu ahana me rosa.”
Oyo ne soratatue rei isehai oyo imatai.
Daud Ihete Ahina Mananokone
17 Daud iatinu ata ia onate aia Saul runa anai hanaie Yonatan omataso nea reiso ihete ahina mananokone resinaso. 18 Reiso iaisosi sio Yehudau oatu-atuhete ahinae reini osi no hehuka. (Ahinae reini wani okanui tau Sura Yasar.) Ahinae rei sanrei:
19 Omi Israel. Omi mo ia onate aia waipani imatai roe tinetae.
Sio wasoni oamkona omataso nea.
20 Pene osima runa sou rei osi re nisau, sio Gat.
Pene rotu-tu sio Askelon oatinu tau sou rei.
Pene rotu-tu sio pina Filistin anoo mirika.
Pene rotu-tu sio pinau wasoni oparisaa tau Anahatana tewa anoo mirika.
21 He. Omi tinetaya pani otoe Gilboa.
Pene rotu-tu one tinia runa uane ramnahu poe tanumo.
Pene rotu-tu nisiu waromo tanua rei nene huaya.
Tau sae, sio wasoni oamkona no aniaua waroro rakunaso roe tanumo.
Saul ne aniaue waro resisinai nea. Oasamaui tau mina tewa nea.
22 Yonatan ne henue erehunu sio panesi.
Saul ne tunue iae erehunu sio panesi oi.
Rahunu sio wasoni oamkona.
Rapahia no nisau.
23 Uaso, sio panesi anoo runaso.
Uaso orui iake osiso.
Uaso oamahaiso okata umau.
Omataso okata umau.
Uaso oeu rapu erenesi nusi wani ererihu.
Uaso oamkona erenesi singa.
24 He. Omi pina Israel. Orani mo aia Saul.
Iausahumo tau papi msinaya mata ohi-ohia.
Runa iausahu hunahane osimo.
25 Sio wasoni oamkona omataso nea.
Omataso tau manahitane.
Yonatan waipani imatai roe tinetaya.
26 He. Yonatan. Ano sani waniku. Anoku repunokoa.
Anoku runaya mainae.
Tau anomu runaku areimo iake erenesi sio anoo runa sio pinau.
27 Sio wasoni oamkona omataso nea.
Saul runa Yonatan omataso nea.
Oahita runa no atiena no henua tewa nea.