PAULUS NE SURATE UA OSI SIO TESALONIKA
1
Tapeae
1 Mania kakau, mania waniu wani oparisaa tau Yesus Kristus pani kota Tesalonika. Omi wani Amari Anahatana runa Upuri Yesus Kristus no mansiau.
Au Paulus ukanu surate rei. Silas runa Timotius wasoni okataku oi.
2 Ami aainisi tau Amari Anahatana runa Upuri Yesus Kristus, “Ama. Mania Upu Yesus. Masike sio Tesalonika opalalosa iae, arui iake mainae osiso sirina. Aunaso okarihuru oamahai.”
Paulus Iainisi Tau Anahatana Osi Sio Tesalonika
3 Mania kakau, mania waniu. Kahurae ami aasau osi Anahatana suiosa, “Mania ama. Ano iake tunne naiosa. Sio Tesalonika oparisaa mainae honu suiosa. Anoo runa umau mainae honu suiosa. Reiso ano iake tunne naiosa.” Ami aasau sanrei, areimo iake. 4 Reiso, ami ruama mo, aahana momuma asima osi sio wasoni Anahatana ne mansiau wasoni oparisaa. Asima runa sapani na oapamese. Asima runa sapani na omi oparisaa sirinia. Masike sio umau ounamo sinsaramo runa ounamo mtinte, oparisaa sirinia.
5 Anahatana inoo ata omi oapamese. Reiso mka irime tuniai reini iasau osimo sanrei, “Mka au urime tuniai reini, omi opusu ouna we mansiau iake. Tau sae, sinsaramo. Sinsaramo, tau muie reini au urimemo.” Iasau sanrei, areimo manisate. 6 Anahatana iuna manisate. Areimo mka iuna sinsara sio wasoni ouna sinsaramo. 7 Iuna manisate, mka sio ounamo sinsaramo tewa nea. Omi runa ami, pusita ututa. Mka Anahatana ineteso. Mka Upuri Yesus isipui on roe noiyaha, runa ne maisosia on roe noiyaha wasoni no kawasa. Oyo iatuhete ruai pani usa anoe. Usa wani ereai mainae. Iatuhete ruai runa ne maisosia rei. 8 Isipu iapasana sio wasoni oationa Anahatana tewa runa sio wasoni openeso tau Sou Iake rerihoni Upuri Yesus. 9 Areimo, mka iapasanaso pusu no kahatena. Areimo osupu siraka na oeu hainau rerihoni Upuri Yesus rotu-tu ria supani. Mka onoo ne kawasa tewa. Ne kawasa wani mainae. 10 Mka ihokai oyo iapasanaso sanrei. Erelai umetene wani Anahatana ihetei oyo, ihokai na Anahatana ne mansiau oainaa runai oasau oahata, “Ee. Mania Upu Yesus. Ano ahokaya nea. Arime tuniai reini nea. Ausi mani rosau nea. Reiso ami aainaa runaya.”
Mka omi oi oainaa runai. Tau sae, omi oparisaa tau mani maunauna.
11 Reiso ami aainisi tau Anahatana osimo suiosa na oainaa runa Upuri Yesus sanrei. Aainisi tau Anahatana sanrei, “Ama. Ami aainisi na ano aarinii ata sio Tesalonika iake na oamahaiso sani ano aanaha runaso na oamahaiso. Aakahaiso ouna iake tau me kawasa. Ouna iake sae mani opusu no maue. Aakahaiso ouna iake sae mani pusu oparisaa.”
12 Aainisi sanrei na oainaa runa Upuri Yesus. Aainisi na Upuri Yesus iamuiramo. Tau sae, Anahatana runa Upuri Yesus Kristus orui iake osimo.