5
1 Mania kakau, mania waniu. Kahurae pene ami akanu surate osimo nea. Surate wani eresima runa umetene mka Upuri ihokai. 2 Omi oanei ia-ia nea. Oanei ata mka Upuri ihokai sani ia kimanakane ihokai tau pumono. Ihokai, ita ianeiki naone tewa. 3 Mka oasau, “Sio mai tuniai reini wasoni oamaturuso runa umau. Tuniai mrina.” Oyo mata hun tewa, Upuri iapasanaso. Ia isa ianei tewa inasa mka Anahatana iapasanaso. Areimo sani inai tiai, oyo mata hun tewa, tiai ereuni. Inai ianei tewa inasa mka tiai ereuni. Mka Upuri iapasanaso ia isa irumai tewa. Iapasana pusiso.
4 Mania kakau, mania waniu. Mka ranie hatae rei pene ereasiramo sani ia kimanakane iasira numa upue. Omi wani sani sio orueso noi pumono tewa. Tau pumono onoo mosa arena tewa. Ne omi oanei Anahatana ne arena. Reiso omi wani sani sio orueso tau pumono tewa. 5 Pusimo utumo oruemo tau manahane, omi wani mai manahane nene upua. Anomo manisata. Oruemo tau onone tewa. Omi wani mai onone nene upua tewa. 6 Sio wasoni oationa Anahatana tewa oainati runa ruao tewa. Ne ita isaka-saka ianei ruari iainati runa ruari. 7 Tau pumono oainati runa ruao tewa, tau pumono oninu tihu minne na omukeso. 8 Ne ita wani mai manahane nene upua, reiso kahurae ianei ruari, iainati runa ruari. Kahurae isaka iainati runa ruari iparisaa tau Anahatana runa anori runaso na pene sio ounata ipalalosa. Isaka sanrei sani ia soratutue isaka inete ruai iausahu papi mamono oto-otoa wani erenete unui matae na pene ne apate. Kahurae isaka iparisaa runa Anahatana na inapai ro-rotu-tu iapuheuta sani ia soratatue isaka. Isaka ikoku topi mamono erenete unui inapa ro-rotu-tu manahitane pusiki. 9 Anahatana iautueta mai rei nanie iapasana tewa. Ne iautueta na iapuheuta pusu Upuri Yesus Kristus. 10 Kristus imatai inete ita. Imatai inete ita na mka ihokai oyo iru-rueta ikatai. Masike iamahaita asi, mka iru-rueta ikatai. Masike imatata iae, mka iru-rueta ikatai. 11 Reiso osima runa rai osi umau na mka ihokai, okaitau tewa. Oakahai umau na oparisaa mainae honu. Omi wani ouna sanrei nea.
Maunauna Waroni Nesia Tau Muie
12 Mania kakau, mania waniu. Ami aainisi na omi oamuira sio wasoni onana taneiu panesi kua omi tihue rei. Areimo, oamuira sio wasoni Upuri irui kawasa osiso na oaisosimo runa oaunaumo. 13 Oamuiraso mainae runa anomo runaso tau oakahaimo tau no taneiu rai. Oamahaimo pene otuntana runa umau.
14 Mania kakau, mania waniu. Ami aainisi oi na oaunau sio wasoni openeso onana tanei na oamauna onana tanei. Oaunau sio wasoni anoo rauponu na pene anoo rauponu. Oakahai sio wasoni oamkona tewa. Osapare tau sio pusiso. 15 Osaka na pene ouni kahatene runa kahatene. Onina na oakahai umau runa sio pusiso.
16 Kahurae anomo miri-mirika suiosa, 17 oanamana osi Anahatana suiosa. 18 Tau sae mani oasau osi Anahatana sanrei, “Ano mo, ano iake naiosa.” Masike osupu iake tewa iae, oasau sanrei sirinia. Ouna sanrei tau areimo Anahatana ne maue tau omi wani Kristus Yesus ne mansiau.
19 Pene onete Anahatana Ne Inaha. 20 Areimo, pene oaumani maunauna waroni osupure rerihoni Anahatana Ne Inaha. 21 Ne oarinii maunauna na ouna iake sirinia. 22 Oeu hainau rerihoni sae mani wani kahatene.
23 Aainisi tau Anahatana waini iunata ikarihuru iamahai ruai, “Ama. Asaka sio Tesalonika pusiso utuso na pene opalalosa. Asaka pusire, tinaio, no inahau, runa no matiunu pusire na mka Upuri Yesus Kristus ihokai pene ia isa pisa iasau ata no isanaya.”
24 Ita pisa iparisaa ata Anahatana waini ianaha runata mka iuna sanrei.
25 Mania kakau, mania waniu. Oainisi tau Anahatana osima. 26 Ami aauwatu tapeae osimo tau anoma pusiki. 27 Uaisosimo tau Upuri ne kawasa na opaca tau surate rei osi sio pusiso utuso wasoni oparisaa.
28 Ami aainisi tau Upuri Yesus Kristus sanrei, “Upu. Masike sio Tesalonika opalalosa iae. arui iake mainae osiso sirinia.”