4
Oamahaimo Na Anahatana Anoi Iake
1 Mania kakau, mania waniu. Nesie maunauna mkana rai asi. Ami aatuhetemo sapani na mka oamahaimo na Anahatana anoi iake. Omi wani oamahaimo sanrei nea. Ne muie reini ami aaisosimo tau kawasa on roe Upuri Yesus na oamahaimo sanrei mainae honu. 2 Tau sae, omi oanei nea maunauna waroni aruire osimo tau kawasa on roe Upuri Yesus. 3 Anahatana inina na omi manisata onata. Omi manisata onata na pene oamanea. 4 Ne kahurae pusimo utumo oapamese ruamo tinaimo na oamahaimo muirani. Kahurae omi manisata onata. 5 Pene oamahaimo pusu mo maue kahatene sani sio wasoni oationa Anahatana tewa. 6 Tau sae, ia waini iamahaiki sanrei iuna sana osi nea kakau nea waniu. Iakarotaso. Naone ami aaisosimo mtinte na oainati. Mka Upuri iapasana sio wasoni ouna sanrei. 7 Anahatana ianaha runata na iamanea tewa. Ianaha runata na iamahaita ita manisata onata. 8 Reiso ia seia ipenei tau maunaune rei, ipenei tau tumata tewa. Ne ipenei tau Anahatana waini irui Ne Inaha osimo.
9 Kahurae pene ami akanu surate osimo nea. Surate na aaunaumo na anomo runa moa kakau moa waniu. Anahatana iatuhetemo nea na anomo runa umau. 10 Titue-tue. Anomo tau moa kakau moa waniu wasoni oparisaa sui otoe Makedonia pusiki. Ne ami aainisi na anomo runaso mainae honu. 11 Anina na oamahaimo pene ouna purie. Pene onehu runa mansiau no masanau. Onana tanei tau hanamo sani naone ami aaisosimo. 12 Ouna sanrei na sio wasoni oparisaa tau Kristus tewa, mka oamuiramo. Ouna sanrei na pene oeu ohori numau oainisi muaine.
Mka Upuri Ihokai Honu
13 Mania kakau, mania waniu. Ami mani maue na oanei sio wasoni oparisaa tau Kristus rei wasoni omataso nea, sio sapani. Oanei na pene anomo rapunokoso sani sio wasoni oparisaa tewa ata mka Anahatana iapuhaiso. 14 Ita iparisaa ata Yesus imatai, oyo iamahaiki honu. Reiso iparisaa ata mka Anahatana iapuhai sio matana wasoni oparisaa tau Yesus. Mka ohoka mai okata Yesus. 15 Ami asima osimo runa Upuri ne maunaune isa rei: Mka Upuri ihokai, ita wani iamahaita asi mka ianaone iniku sio matana rei tewa. 16 Mka Upuri ruai ikaisunu on roe nante. Mka iakapona, oyo ia maisosi waini ia mainae onate on roe noihaya ianamana, samatoro oatinu ia isa iauhona Anahatana ne trompet. Oyo sio wasoni Kristus ne mansiau wasoni omataso rei oamahaiso naone. 17 Samatoro Anahatana iapusaa ita wani iamahaita. Iapusaata roe yahu runa sio wasoni naone omataso rei, na pusita iamanou runa Upuri roe nante. Oyo iru-rueta ikata Upuri rotu-tu ria supani. 18 Reiso osima runa anamanaya rai osi umau na pene anomo rapunokoso rerihoni sio matana.