3
1 Reiso anoma rarihu runamo mainae rotu-tu tonuma aapamese kua anoma tewa nea. Reiso ami aapamata sou ata nene iake au, Paulus, runa Silas uama aru-ruema mai Atena 2 na uama aaisosi Timotius pani tanumo. Timotius waini kakari waniri. Ianori runa Anahatana iaunauso tau Sou Iake rerihoni Kristus. Aaisosiki pani tanumo na anomo kuruta na iakahaimo oparisaa ia-ia 3 Iakahaimo na sio ounamo sinsaramo, omi oparisaa sirinia. Omi ruamo oanei ata Anahatana ne maue na ita sinsarata. 4 Ami akatamo asi, ami aasau naone ata mka sio ounata sinsarata. Titue-tue. Ereeu sanrei sirinia. Omi oanei nea. 5 Anoku ererihu runamo rotu-tu uapamese anoku tewa nea. Reiso uaisosi Timotius pani tanumo na uatinu ata kani omi oparisaa ia-ia sirinia te tewa. Anoku ereuponu ata ia aia sakahatene ireamo na oparisaa tewa nea. Areimo nene manariti ami mani kausa wanaya tau saisa tewa.
6 Muie reini Timotius inuniki mai tanuma nea. Isima runa hapare iake osima rerihoni sapani na omi oparisaa tau Kristus. Isima runa sapani na anomo runa umau sirinia. Isima osima runa sapani na anomo rapeka runama anomo miri-mirika suiosa reiso anomo rarihu runama. Nanie osupuma honu sani anoma rarihu nanie asupu omi oi. 7 Reiso mania kakau, mania waniu. Masike ami mtinte runa sio ounama sinsarama, aahana karahirine aatinu hapare rei rerihonimo. Aatinu sapani na omi oparisaa, aahana karahirine. 8 Reiso anoma miri-mirika nai osa. Hete sae, omi oparisaa ia-ia tau Upuri sirinia. 9 Ami aanamana osi Anahatana sanrei, “Mania Ama. Ano mo, ano iake tunne naiosa. Sio Tesalonika oparisaa ia-ia sirinia. Reiso anoma miri-mirika naiosa. Ano iake tunne naiosa.” Ami pisa aanamana osi Anahatana erelai tewa. Tau sae, omi ouna anoma miri-mirika naiosa. 10 Tau onone, tau ranie ami aai-ainisi tau Anahatana osimo tau anoma pusiki na ita mka isupu umau honu, oyo aakahaimo na oparisaa mainae honu. Mka aatuhetemo tau maunauna waroni omi oaneire tewasi.
11 Ami aainisi tau Amari Anahatana ruai runa Upuri Yesus sanrei, “Ama. Aheka arena osima na ahokama pani sio Tesalonika honu. 12 Aunaso anoo runa umau. Aunaso anoo runa sio pusiso mainae honu. Aunaso anoo runaso mainae sani anoma runa sio oi. 13 Auna sanrei na aapamese anoo na sio manisata onata na pene ia isa pisa iasau ata no isanaya. Mka mania Upu Yesus ihokai, oyo sio oamanane ano pene ia isa pisa iasau ata no isanaya. Mka Yesus ihokai runa ne maisosia on roe noiyaha wasoni manisata onata.”