2
Paulus Ne Tanei Pani Tesalonika
1 Mania kakau, mania waniu. Omi ruamo oanei sapani na ahokama pani tanumo, oyo aamahaima na Anahatana anoi iake. 2 Oanei sapani na naone sinsarama pani kota Filipi. Omi oanei sapani na sio omakaniama. Ne masike sio ounama sanrei, Anahatana iakahaima na pene akaitau. Reiso ahokama pani tanumo, oyo aaunaumo tau Sou Iake rerihoni Yesus Kristus wani on roe Anahatana. Masike onesima, aaunaumo sirinia. 3 Ami aaunauso titue. Aaunauso anina ruama mani untu tewa. Aaunauso aakarota tewa. 4 Ne Anahatana iparisaama. Irea anoma na ianei ata kani pisa iparisaama te tewa. Iparisaama reiso iaisosima aaunauso tau Sou Iake rerihoni Yesus Kristus. Ami aaunauso na anana anoo tewa. Ne aaunauso na anana Anahatana anoi. Anahatana waini ianei anori. 5 Omi oanei ata ami aanamana anana anomo tewa. Ami aaunaumo na ruama asupu saisa tewa. Aakarotamo na anina saisa aauhunima tewa. Anahatana ianei anori. 6 Ami anina na omi te sio umau honu oamuirama tewa. Masike ami mani kawasa na atahasune na omi oamuirama tau ami wani Kristus ne maisosia, ami anina sanrei tewa. 7 Ne ami manne runamo pannuhu akatamo. Ami manne sani inai isaka ne hehuka. 8 Anoma runamo reiso arui Sou Iake on roe Anahatana ruae tewa. Ne arui ruama osimo oi. Tau sae, anoma runamo.
9 Mania kakau, mania waniu. Ami aanei ata anomo rapeka sapani na ami anana tanei panesi. Aaunaumo tau Sou Iake rerihoni Yesus Kristus, anana tau onone tau ranie na ruama ahane mani muaine. Ahanei na pene ia isa ipanama. Aaunaumo tau Sou Iake on roe Anahatana. 10 Omi runa Anahatana pusimo onoo sapani na ami manisata onata. Sapani na anoma manisata. Sapani na sio pisa oasau tewa ata mani isanaya. Ami arue akata omi wani oparisaa, omi onoo. 11 Omi oanei ata ami auna pusimo sana osa-osa sani amai iuna ne hehuka. Ami aau-aunaumo. Aaka-akananumo. 12 Aai-aisosimo. Auna sanrei na oamahaimo tau nitae wani iake tau sio wasoni Anahatana ne mansiau. Anahatana ianaha runamo nea na okatai tau irime tuniai reini. Ianaha runamo na onoo ne ita-itane wani rinane eresita.
13 Isa honu. Ami aasau osi Anahatana, “Mania ama. Ano iake. Ano aakahai sio Tesalonika na sio oparisaa tau me maunauna. Ano iake tunne naiosa.” Ami aasau sanrei suiosa tau omi oatinu maunauna on roe Anahatana waroni ami aaunaumo tanure. Omi oatinu tau maunauna rai sani tumata ne maunauna tewa. Ne omi oparisaa ata maunauna rai on roe Anahatana. Areimo titue, maunauna rai waroni on roe Anahatana. Maunauna rai ranusu pani omi wani oparisaa anomo reiso anomo raneni.
14 Mania kakau, mania waniu. Sio omi mo otoe ounamo sinsaramo. Reiso omi sani sio wasoni oparisaa tau Anahatana pani otoe Yudea. Sio wasoni Kristus Yesus ne mansiau. Sio no otoe, sio Yahudiu, ouna sio Yudeau wasoni oparisaa sinsaraso oi. 15 Sio Yahudiu rei naone ohunu sio mamsima runa Anahatana ne anamanaya, oyo tau muie ohunu Upuri Yesus. Muie reini sio wasoni onei ami. Anahatana anoi erenuku-nuku erenaka-naka tau sio. Sio onesi sio pusiso. 16 Sio onete rea na pene ami aaunau sio wasoni sio Yahudiu tewa. Aaunauso na Anahatana iapuheuso na oamahaiso rotu-tu ria supani. Sani ia isa iapatau tihu tau koinanae rotu-tu taue, sio opalalosa rotu-tu Anahatana iapamese tewa nea. Reiso tau muie anoi eresaa. Anoi eresaa reiso iapasanaso.
Paulus Anoi Ererihu Runa Sio Tesalonika
17 Mania kakau, wania waniu. Ami mo aeu aarihonimo nea reiso inoo umau tewa nea. Ne anoma rapeka runamo sirinia. Anoma rarihu runamo reiso anina ia-ia na asupumo honu. 18 Ami mani maue aeu pani tanumo honu. Au, Paulus, unina na ueu pani tanumo nai inasa rai. Ne ia aia sakahatene inete reiso ahokama tewa. 19 Omi sahoro ouna anoma miri-mirika. Anoma tau omi. Ouna ami aahana momuma. Tau sae, mka Upuri Yesus ihokai na ita inooi, omi ounama aahana momuma. 20 Titue-tue. Omi sahoro mka ounama aahana momuma. Omi sahoro ouna anoma miri-mirika.