2
Ia Kahatene
1 Mania kakau, mania waniu. Rerihoni Upuri Yesus Kristus mka ihokai oyo iamanouta na ikatai roe noiyaha. Ami aainisi tau Anahatana sanrei. 2 “Ama. Aakahai sio Tesalonika na pene anoo rasama-samaso on sini. Pene anoo rauponu oatinu sio oasau oahata, ‘Upuri Yesus ihokai nea.’”
Reiso masike sio umau oasau ata Anahatana Ne Inaha iatuheteso ata Yesus ihokai nea iae, pene anomo rauponu. Masike oasau ata sio oatinu ata ami aasau ata ihokai nea iae, pene anomo rauponu. Masike sio oasau ata ami akanu tau surate ata ihokai nea iae, pene anomo rauponu. 3 Pene otapi ata ia isa iakarotamo. Ihokai tewasi. Mka sio panesi openeso tau Anahatana, oyo ia kahatene waini inesi Anahatana mainae iatuhete ruai, samatoro ihokai. Ia kahatene rei, mka Upuri Yesus iunai tihoniki tau usa mainae hainau rerihoni Anahatana rei. 4 Mka ia reini ihati ruai inesi Anahatana. Ihati ruai inesi anahatanau waroni titue tewa waroni sio mai tuniai oainaa runare. Iasau, “Au mo, au mainae erenesi sae mani mai tuniai reini.” Reiso mka inusui pani Anahatana ne numa pani anoe, oyo iruei poe, samatoro iasau, “Au mo, au wani Anahatana ruai.” 5 Urue ukatamo pani Tesalonika, usima runa rai pusire osimo nea. Anomo rapeka tea?
6 Omi oanei sae wani erenete na pene ia kahatene iatuhete ruai nea muie reini. Ne tau muie ia kahatene rei mka iatuhete ruai. Iatuhete ruai tau umetene wani Anahatana ihetei nea. 7 Muie reini ia aia sakahatene waini iunaso ouna kahatene iauhuniki. Ne ia waini inete rei, inete na pene ia kahatene iatuhete ruai. Ne mka Anahatana inea ia waini inete rei. 8 Ineai, samatoro ia kahatene iatuhete ruai. Mka Upuri Yesus ihunui iasau sanrei mani, “Aeu aarihoni tuniai reini.” Mka Upuri Yesus iuna tihoniki pusu ihokai tau ne ita-itane wani rinane eresita. 9 Ia kahatene ihokai tau kawasa mainae wani ia aia sakahatene iruiki osiki. Tau ne kawasa rei, iuna sima-simana makarotana nitaya pusire na sio osira. Inina na sio oahata ne kawasa on roe Anahatana. 10 Mka iakarotaso tau kahatena pusire. Iakarota sio wasoni mka omataso oyo orue hainau rerihoni Anahatana rotu-tu ria supani. Orue hainau tau sio openeso anoo runa maunau titue. Reiso Anahatana ipenei iapuheuso na oamahaiso rotu-tu ria supani. 11 Openeso anoo runa maunau titue reiso Anahatana tau ne kawasa mka iunaso oparisaa tau maunau makarotane. Reiso oparisaa tau ia kahatene ne maunau makarotana rai. 12 Anahatana iunaso oparisaa tau maunau makarotana na sio wasoni openeso oparisaa tau maunau titue ne okaumini runa kahatene, mka iapasanaso.
Anahatana Ininimo Na Iapuheumo
13 Mania kakau, mania waniu wani Upuri anoi runamo. Ami mo, kahurae ami aasau osi Anahatana sanrei suiosa, “Mania ama. Ano mo, ano iake tunne naiosa. Ano anini sio Tesalonika on ano ahaye tuniai reini tewasi. Aniniso na aapuheuso. Aniniso na oamahaiso rotu-tu ria supani. Aapuheuso pusu Me Inaha iunaso manisata onata. Aapuheuso pusu oparisaa tau maunau titue. 14 Aanaha runaso na ereeu sani nanie uasau rei. Aanaha runaso pusu ami aaunauso tau Sou Iake rerihoni Yesus na sio oasau, ‘Io. Sio reimo, sio wasoni sio iaka. Sio manisata onate maa!’ Areimo sani sio oasau rerihoni mania Upu Yesus Kristus oahata, ‘Io. Ia rei mo ia manisate onate maa!’”
15 Mania kakau, mania waniu. Oparisaa ia-ia. Orime kuru tau maunauna waroni ami aaunaumo tanure nea. Aaunaumo tau hohama te, surate te.
16-17 Ami aainisi tau Upuri Yesus Kristus ruai runa Amari Anahatana ahata, “Ama. Mania Upu Yesus. Aakahai sio Tesalonika na pene okaitau. Aunaso ouna sae mani wani iake sirinia. Aunaso oasau sae mani wani iake. Ano wani anomu runama. Aakahaima na pene akaitau rotu-tu ria supani. Aunama aparisaa runa sae wani iake wani atotoe aruiki osima. Aruiki pusu arui iake osima.”