2
Maunauna Rerihoni Iainaa Runa Anahatana Sapani
1 Mataanoe, uaisosimo oanamana osi Anahatana. Oainisi osi sio pusiso. Oainisi osi ruamo. Oasau osi Anahatana ata ia mo, ia iake. 2 Oainisi na Anahatana iakahai sio aiau runa sio pusiso wasoni no kawasa tau omi. Oainisi na iamahaita iamaturuta. Iamahaita iuna-una sae waroni Anahatana ne suka mani runa iamuiraso. 3 Iainisi osi sio pusiso, areimo iake. Iuna sanrei Anahatana Ia Waini Iapuheuta anoi iake. 4 Tau sae, Anahatana inina iapuheu sio pusiso na oamahaiso rotu-tu ria supani. Ia nanie na sio pusiso oanei sae waroni titue. 5 Tau sae, hasae Anahatana sahoro ia Anahatana titue. Waini ia osa iuna mansiau tau Anahatana ne netau. Ia reimo ia Kristus Yesus. Ia ruai, ia tumata oi. 6 Irui ruai na imatai na isenu sio pusiso no rosau. Reiso erelai nene umetene, Anahatana iatuhete ata ia nanie iapuheu sio pusiso na oamahaiso rotu-tu ria supani. 7 Reiso au mo, Anahatana ihitiku na uaunau sio wasoni sio Yahudiu tewa. Ihitiku tau maisosie osiso na uatuheteso na oparisaa titue. Au we anamanaya raimo pusire, waroni titue. Uakarota tewa.
8 Reiso unina na sui supani-supani mani, sio hanaia oanamana osi Anahatana. Oainisi osopa hanao osi Anahatana. Sio hanaia reimo, kahurae sio manisata onata. Oanamana osiki anoo rarue, otuntana runa umau tewa.
9 Au we maue na sio pinau pene onina na sio hanaia onooso iaka pusu no apia. Oausahu apia lahae. Oausahu apia waroni muirani. Pene oaunupa no huau. Pene opake hunahane te wenua hunonia mainaya. Pene oausahu sae waroni nene hunonia mainaya, na pene sio onooso iake pusu no apia. 10 Ne unina na sio pinau ouna atata waroni iaka. Atata waroni iaka osi sio pinau wasoni oainaa runa Anahatana. Ouna iake na sio onooso iake pusu no atata.
11 Tau omi wani oparisaa oamanoumo oainisi, kahurae ia pina iatinu tanuso iamaturui kahurae ikanahata ihahue. 12 Au utapi ata ia pina iatuhete ia hanaie tewa. Au utapi ata ia pina ne kawasa tau ia hanaie tewa. Kahurae sio pinau oamaturuso. 13 Tau sae, Anahatana ihaye tau Adam naone samatoro ihaye tau Hawa tau muie. 14 Ia aia sakahatene iakarota Adam tewa. Ne iakarota ia pina, oyo ia pina rei ipalalosa, iuna sae wani Anahatana isopo. 15 Reiso Anahatana iapasana sio pinau na sio ikina oamrai sio pinau tiao ereuni. Masike tiau ereuni rotu-tu reini, Anahatana iapuheu sio pinau na oamahaiso haineke ia rotu-tu ria supani. Iapasanaso ro-rotu-tu ria supani tewa. Hete sae, oparisaa tau maunau titue sirinia. Anoo runa sio mansiau pusiso sirinia. Omi mo, omi manisata onata sirinia. Oapamese ruao sirinia.