3
Maunauna Rerihoni Sio Onata Osi Sio Wasoni Oparisaa
1 Anamanae reini titue-tue, “Munata ia isa ne maue iuna ia onate tau sio wasoni oparisaa, inina tanei iake.” 2 Ia onate tau sio wasoni oparisaa mo, kahurae sio pisa oasau tewa ata ne isanae. Kahurae sahai osa mani runa pene isahu-sahui. Kahurae ianei ruai runa iapamese anoi. Kahurae sio pisa oamuirai. Kahurae anoi iake iararuma sio wasoni ohokaso noi ne numa. Kahurae ianei iatuheteso ia-ia. 3 Pene ininu panesi. Pene iatana panesi ne anoi manne runaso. Pene ituntana. Pene anoi runa kepeni. 4 Kahurae ianei iaisosi ne numa anoe taue na ne hehuka oatinu tanui runa oamuirai. 5 Munata ia isa ianei iaisosi ne numa anoe taue tewa, sapani na mka iaisosi sio wasoni oparisaa tau Anahatana? 6 Pene ia onate tau sio wasoni oparisaa, ia waini mato iparisaa tau Kristus Yesus. Kahurae iparisaa potuina nea. Tewa mo, mka ihati ruai, oyo Anahatana iapasanai sani masuae ia aia sakahatene ihati ruai oyo Anahatana iapasanai. 7 Isa honu, kahurae sio wasoni oparisaa tewa oamuirai na pene sio oruni onehu awanai. Tea mo, mka sio ounai ipalalosa. Mka ia aia sakahatene iakarotai na ipalalosa sani ita iakarota makapana tau kamsikete na isotai.
Maunauna Rerihoni Sio Makahaia Osi Sio Wasoni Oparisaa
8 Sani sio onata, sio makahaia osi sio wasoni oparisaa mo, kahurae sio pisa oamuiraso. Kahurae sio oruni katopue. Pene oninu panesi runa pene anoo runa kepeni. 9 Kahurae sio oparisaa ia-ia tau maunauna rerihoni Yesus. Maunauna waroni Anahatana iatuheteta tanure. Naone Anahatana iauhuni ne maunauna rai ne iatuheteta tanure nea. Kahurae oparisaare runa hasae ouna sae waroni oanei ata manisate. 10 Kahurae sio orea sio makahaia reini naone. Munata sio pisa oasau tewa ata no isanaya mato sio oanori sani sio makahaia osi sio wasoni oparisaa.
11 Sani rei honu runa no pinau. Kahurae sio pisa oamuiraso. Pene oruni mansia nanai. Kahurae oanei ruao runa sio pisa oparisaaso suiosa.
12 Kahurae ia makahaie osi sio wasoni oparisaa sahai osa mani runa pene isahu-sahui. Kahurae iaisosi ne hehuka runa ne numa anoe taue ia-ia. 13 Sio makahaia wasoni oanori ia-ia, mka mansiau oamuiraso. Mka sio makahaia oanamana okaitau sio niane tewa. Oanamana rerihoni oparisaa tau Kristus Yesus.
Maunauna Waroni Naone Anahatana Iauhunire
14 Masike au we maue ueuku pani tanua on sini, au wani ukanu maunauna rai osia sirinia. Ukanure na 15 kani uapuari ano mka aanei sapani na ita iamahaita. Ita kaka wani wani iparisaa tau Anahatana. Anahatana waini iamahaiki. Ita wani Anahatana ne mansiau irime tau maunauna waroni titue. 16 Ia isa pisa iauhaa tewa ata maunauna rai iaka naiosa. Maunauna waroni naone mauhunta ne Anahatana iatuheteta tanure nea. Maunauna waroni ratuheteta iamahaita iuna-una sae waroni Anahatana ne suka mani. Maunauna rai iaka tau ratuheteta rerihoni
Ia waini iatuhete ruai osita nitai tumata.
Anahatana Ne Inaha iatuheteta ata ia rei anoi manisate.
Sio maisosia on roe noiyaha onooi.
Sio oaunau sio niana tanui.
Sio mai tuniai reini oparisaai.
Anahatana iapusaai roe noiyaha, naniai wani rinane eresita ita-itane.