4
Sio Matuhete Makarotana
1 Anahatana Ne Inaha iasau ia-ia ata tau umetene wani haineke Kristus Yesus nanie ihokai honu, sio umau mka oparisaa tau Kristus Yesus tewa nea, oyo opusu sakahate makarotana. Mka opusu sakahatena waroni no maunauna titue tewa. 2 Sakahatena rai rauna sio makarotana oatuhete sio niana-niana tau no maunauna rai. Sio makarotana rei oasau ata oatuheteso tau manisate. Aikee oatuheteso tau manisate tewa. Sio rei oanei no isanaya tewa. 3 Sio oatuhete osoposo na pene oausahaso. Osopo na pene oai muaina umau. Aikee Anahatana ihaye muaina pusire osi ita wani iparisaa na iaire. Ihaye muaina pusire osi ita wani ianei maunau titue. Iaire iasau tau Anahatana ata “Ano mo, ano iake naiosa.” 4 Tau sae, pusire waroni Anahatana ihaye waroni iaka. Iake tewa ita iamaoni sae isa. Hete sae, isupui, oyo iasau osi Anahatana ata “Ano mo, ano iake naiosa.” 5 Tau sae, Anahatana ruai iasau ata pusire waroni iaka runa ita ianamana osi Anahatana, oyo iake.
Maunauna Osi Timotius
6 Munata ano arui maunauna raimo osi rea kakau, rea waniu, mka ano auna manorine iake osi Kristus Yesus. Aaunau rea kakau, rea waniu runa aparisaa ia-ia. Aparisaa pusu maunauna waroni pusita iparisaare. Maunau titue waroni ano apusure rotu-tu reini. 7 Ne pene atinu tau mamrunia waroni titue tewa. Waroni kahatena. Ruamu anina na aamahaia auna-una sae waroni Anahatana ne suka mani sani ia waini iapataruna ruai inina na tinaini makae. 8 Ita inina na tinairi makaya, areimo iake mkane mani. Ne inina na iamahaita iuna-una sae waroni Anahatana ne suka mani isupu iake tau muie reini. Mka imatata isupu iake oi tau nesie muie honu. 9 Anamanae reimo ata isupu iake titue-tue reiso ita pisa iparisaa tanure ia-ia. 10 Reiso masike tamneana panesi, inana taneiu panesi. Tau sae, ianori runa Anahatana. Anahatana waini iamahaiki mka irui iake osita. Ia sahoro iapuheu sio pusiso na oamahaiso rotu-tu ria supani. Iapuheu sio wasoni oparisaa tau Kristus Yesus. 11 Aatuhete runa aaisosiso na opusu we maunauna rai.
12 Pene atapi ata ia isa iasau ata ano ikine tau ano honue asi. Ne auna siaie osi sio wasoni oparisaa na sio oanei kahurae oamahaiso sapani. Auna siaie pusu aanamana iake, auna iake, anomu runaso, aparisaa tau maunau titue, anomu manisate. 13 Asaka abaca Anahatana ne anamanaya osi sio wasoni oparisaa, oyo aaunauso runa aatuheteso tanure. Abaca osiso rotu-tu mka uhokaku pani tanumo. 14 Pene ahanamata anana me taneiu waroni Anahatana irui kawasa osia na ananare. Irui kawasa osia pusu sio onata tau sio wasoni oparisaa osima runa sapani na mka pani muie aanori runa Anahatana runa oahusiea. 15 Auna sae waroni au mato uasau rei. Aariniire suiosa. Aunare na sio pusiso onoo ata ano aamauna mainae honu. 16 Ainati na aamahaia manisate. Ainati na aatuheteso tau maunau titue. Kahurae aamauna sanrei. Tau sae, mka aapuheu ruamu runa sio wasoni oatinu tanua.