5
Maunauna Rerihoni Sio Tikana Wasoni Oparisaa
1 Pene anamana makae tau sio onata. Ne akananuso sani ruamu amamu. Auna sio honua sani mea kakau, mea waniu. 2 Auna sio pina onata sani inamu. Auna sio pina honua sani mea hotau, tau anomu manisate.
Maunauna Rerihoni Sio Pina Uhanu
3 Aisosi sio wasoni oparisaa na oamuira sio pina uhanu wasoni ruao. 4 Ne munata ia pina uhanu waini nea hehuka, nea momou, kahurae sio reimo oamahaiso ouna-una sae waroni Anahatana ne suka mani. Ouna sae waroni Anahatana ne suka pusu oamuira sio ruao no enau. Ouni mai no mansia mainaya, noa momou wasoni naone oapiaraso. Ouna sanrei na Anahatana anoi iake. 5 Ia pina uhanu waini titue-tue ruai, ia isa tewa na iapiarai, anoi tau Anahatana mani. Tau onone, tau ranie ianamana osi Anahatana iainisi na iakahaiki. 6 Ne rerihoni ia pina uhanu waini iamahaiki pusu ia ruai ne maue mani. Masike waini iamahaiki asi, ia sani imatai sirinia. 7 Aunau sio pusiso wasoni oparisaa tau maunaune rei na opusui na ia isa pisa iasau tewa ata no isanaya. 8 Tau sae, munata ia isa iapiara ruai ne ipane tewa, erenesi rei, iapiara ruai ne hutua taue tewa, ia rei iauhaa sae waroni ita iparisaa. Ia kahatene erenesi sio wasoni oparisaa tewa. Sio wasoni oparisaa tewa onoo runa no hutua taue runa no ipane.
9 Kanu ia pina uhanu nanai tau surate na oakahaiki kani ia waini sani au mka uasau rei. Kahurae ne musum hutu nome te ne musum hutu nome nesi. Iausahai nai osa mani. 10 Kahurae sio pusiso oanei ata ne atata iaka sani iapiara ne hehuka iake rotu-tu okarihuruso. Ia ne suka iararuma sio wasoni ohokaso noi ne numa. Ianori runa Anahatana ne mansiau. Iakahai sio wasoni no susa. Iamauna inana tanei sae mani wani iake.
11-12 Pene kanu sio pina uhanu wasoni sio honua nanao tau surate rei. Tau sae, mka oahana ata nanie onina ia hanaie honu onina nanie oausahaso honu. Naone oasau ata mka onana tanei osi Kristus. Ne poe oo, opamanisai tewa. Reiso sio osana. 13 Isa honu, sio ohanamata. Oeu ohori numau. Erenesi rei, sio oruni osaka-sakanau sou suru ria suru nau runa oamnehu runa mansiau no masanau no iaka. Oruni sae waroni ia isa iruni iake tewa. 14 Reiso au uaunau sio pina uhanu honua na oausahaso honu, osusu, runa osaka no numa hutae na pene re nisau oruni nanari. 15 Uaunauso sanrei tau sio pina uhanu honua umau onana tanei osi Kristus tewa nea. Opusu ia aia sakahatene nea.
16 Ne munata wasoni sio pina uhanu rerihoni ia pina isa waini iparisaa ruai ne ipane, kahurae ia pina rei iakahai sio pina uhanu rei. Pene sio wasoni oparisaa rerihoni ipa tamene, pene sio mtinta runa sio pina uhanu wasoni pisa no ipane oakahaiso. Pene anoo mtinta runa sio rei na mka oakahai sio pina uhanu wasoni ruao mani.
Maunauna Rerihoni Sio Onata
17 Kahurae oamuira sio onata tau sio wasoni oparisaa wasoni oaisosiso iake. Oamuira nai ua, nai tonu. Oamuira sio onata wasoni oaunauso runa sio wasoni oatuheteso. Oamuiraso reiso osehaso. 18 Tau sae, masuae Musa isupu kawasa rerihoni Anahatana na iasau sanrei, “Koropou wani ereheta-heta hotona na nene huaya rahokaso, pene kanihoo nene hohae. Otapiki ruai ereaiki.” Yesus iasau, “Ia waini inana tanei, kahurae osehai.”
19 Pene oatinu tau ia isa iamanaru ia onate tau sio wasoni oparisaa. Kahurae sio ua te tonu oamanarui osima runa ne isanae sapani samatoro omi oatinu tau sio iake. 20 Ia onate waini ne isanae, kahurae omi oasau tanui na sio pusiso wasoni oparisaa onoo runa oatinu. Oatinu na sio okaitau opalalosa. 21 Uaisosia iamanane Anahatana runa Kristus Yesus runa sio maisosia on roe noiyaha wasoni Anahatana ininiso pusiso onoo. Apusu we maunauna rai na pene arui iake osi ia osa mani. Arui osa osi sio pusiso. 22 Pene arapu aahusie ia isa na ahitiki tau ia onate. Napa rotu-tu iparisaa potuina mkane na onoo ne atata sapani. Tau sae, mka ia rei ipalalosa, ano me isanae oi. Asaka ruamu na anomu manisate.
23 Pene aninu tihu mani. Ne aninu anggur nene sanaute mkane. Tau sae, tiamu ereuni suiosa. Akupua panesi.
24 Pene arapu ahiti ia onate. Tau sae, sio umau opalalosa mai manahane na pusiso oanei no rosau rai. Masike sio oasei tanuso tewasi, sio oanei nea. Ne sio umau opalalosa pani anoo mani. Reiso sio oasei tanuso samatoro oanei no rosau sapani. 25 Sani rei oi tau atata iaka. Sio umau ouna iake mai manahane na sio pusiso oanei. Ne sio umau ouna iake oauhuni. Ne sio no atata iaka rai mka mauhunita rotu-tu ria supani tewa.