6
Maunauna Rerihoni Sio Manianeu
1 Kahurae sio manianeu wasoni oparisaa oarinii noa upu sio iaka na sio manianeu rei oamuiraso suiosa. Oamuiraso na pene sio omakania Anahatana nanai. Pene omakania ami maisosia mani maunauna. 2 Sio manianeu wasoni noa upu oparisaa, pene oturuhaka noa upu rei. Tau sae, pusiso oparisaa osa. Ne kahurae sio opakarian osi noa upu wasoni oparisaa rei, iake mainae honu. Tau sae, noa upu rei oparisaa. Anahatana anoi runaso. Noa upu rei sahoro no untu kani sio manianeu opakarian osi noa upu rei iake.
Maunauna Rerihoni Sio Kaya
Aatuhete we maunauna rai osiso runa akananuso na opusure. 3 Ne munata ia isa iatuhete tamene, munata iparisaa tau maunau titue waroni rerihoni Upuri Yesus Kristus tewa, munata ipenei iparisaa tau maunauna rerihoni iamahaita iuna-una sae waroni Anahatana ne suka mani, 4 ia reini ihati ruai. Aikee ianei saisa tewa. Nanie ituntana rerihoni anamanaya suiosa reiso isaturuu ianana, ituntana, iruni mansia nanai, isisi nahe wani iake tewa. 5 Sio wasoni sanrei, otuntana runa umau suiosa. Tau sae, sio oarinii kahatene. Sio oanei maunau titue tewa nea. Sio oahata oamahaiso ouna-una sae waroni Anahatana ne suka mani, mka osupu kepeni panesi.
6 Ia waini iamahaiki iuna-una sae waroni Anahatana ne suka mani ne untu mainae sirinia. Hete sae, ne apia rasohai nea. 7 Ita iamrai mai tuniai reini, irori saisa tewa. Mka imatata rerihoni tuniai reini, irori saisa tewa sirinia. 8 Reiso, ita re muaina, re apia rasohata nea. 9 Ne sio wasoni nanie ouna kaya, sio sani sio oakarota manue na erenusu pani kamsikete anoe erenina nene muaine. Sio wasoni nanie ouna kaya sanrei oi. Ia aia sakahatene iakarotaso na opalalosa, sio opusu no maue kahatene wani ereunaso oariruneso. No maue rei mka ereunaso iake tewa runa osupu siraka. 10 Tau sae, sio wasoni anoo runa kepeni, mka osupu sirakau panesi. Sio umau anoo runa kepeni rotu-tu oparisaa maunau titue tewa nea. Oparisaa tewa nea, oyo sinsaraso rotu-tu anoo karaka.
Paulus Iaunau Timotius
11 Ne ano mo, ano wani aanori runa Anahatana. Pene auna sanrei. Ne anina na anomu manisate, aamahaia auna-una sae waroni Anahatana ne suka mani, aparisaa tau maunau titue, anomu runaso, aapamese sae waroni rauna mtinte tanua, anomu manne runaso. 12 Sani ia waini iapataruna irumai tau ne mkonae pusiki, anina na aamkona amahaia apusu sae wani ano aparisaai. Asaka na aamahaia rotu-tu ria supani. Tau sae, Anahatana ianaha runaya na aamahaia rotu-tu ria supani. Mka aamahaia rotu-tu ria supani tau ano aamanaku tau sio panesi nea sapani na aparisaa ia-ia. 13 Au uaisosia na Anahatana waini iapuhai pusire runa Kristus Yesus waini iamanaku sae wani iake osi Pontius Pilatus onoo. Au uaisosia sanrei: 14 Apusu we maunauna rai pusire na pene ia isa pisa iasau ata me isanae. Apusure rotu-tu Upuri Yesus Kristus ihokai honu. 15 Erelai Anahatana ne umetene, mka Anahatana iaisosiki ihokai honu. Anahatana waini kahurae ita iainaa runai. Ia ruai sahoro irime ita. Irime natu tau sio natu pusiso. Ia waini Upu tau sio upu pusiso. 16 Ia ruai sahoro imatai tewa. Ia iruei roe rinane wani ita-itane eresita wani ia isa pisa ieu hainekei tewa. Ia isa iae inooi tewa. Ia isa pisa inooi tewa. Au unina na sio oamuirai rotu-tu ria supani. Au unina na ia ne kawasa rotu-tu ria supani. Amin.
17 Aaisosi sio wasoni sio kaya mai tuniai reini na pene ohati ruao. Pene anoo tau apia panesi. Sio oanei tewa kani mka tihonire. Ne aaisosiso na anoo tau Anahatana. Tau sae, irui pusire panesi-panesi osita na ita ikaumini runare. 18 Aaisosiso na ouna iake, no atata iaka panesi, oamanane osamaso tau no apia. 19 Osamaso sanrei, oyo sani sio kaya oamanou kepeni tau nesie muie rei, sio ouna iake muie reini na mka tau nesie muie rei oamahaiso rotu-tu ria supani. Areimo oamahaiso titue.
20 Timotius. Asaka maunau titue ia-ia. Maunau titue waroni Anahatana iparisaare osia na ano aaunauso tanure. Pene atinu tau sio wasoni oanamana kahatene. Pene aatinu tau sio wasoni oanamana ramnahu huie. Pene aatinu tau maunauna waroni rapusu maunau titue tewa. Maunauna rai, sio ooire tau “Sio wasoni oanei no maunauna”. 21 Pene atinu tanure. Tau sae, sio umau oasau ata osupu sio wasoni oanei no maunauna nea. Reiso oparisaa tau maunau titue tewa nea.
Uainisi na Upuri irui iake osi pusimo utumo.