2
Maunaune Rerihoni Sio Pusiso Wasoni Oparisaa Oamahaiso Sapani
1 Ne ano mo, aaunauso rerihoni sae waroni rapusu maunau titue. 2 Aaunau sio hanaia wasoni okore-koreso na oanei ruao, oamahaiso manisate na sio pusiso oamuiraso, runa oapamese anoo. Aaunauso na oparisaa ia-ia tau maunau titue, anoo runaso ia-ia, runa oapamese kani sio umau onesiso.
3 Isa honu, sio pina onata. Aaunauso na sio manisata onata. Manisata onata na pene oruni mansia nanai runa pene oninu tihu minne panesi. Aaunauso na oatuhete rerihoni sae waroni iaka 4 na oaunau honu sio pina honua na anoo runa no hanaia runa no hehuka. 5 Oaunau sio pina honua na oapamese anoo, pene oamanea, oamauna onana taneiu sui no numau, sio pinau iaka runa okanahata ohahu tau no hanaia. Sio pina honua ouna sanrei na pene ia isa imakania Anahatana ne maunauna.
6 Isa honu, sio hanai honua. Aaunauso na oapamese anoo. 7 Tau pusire, ano ruamu anomu manisate suiosa na sio onoo, oyo oanei oamahaiso sapani. Aatuhete runa anomu manisate. Atuhete ano aamuiraso. 8 Aaunauso, me anamanaya titue. Aaunauso sanrei na mka sio wasoni onesia oaumaa. Tau sae, osupu sae isa tewa mka omakaniaya tanui.
9 Isa honu. Aaunau sio manianeu na okanahata ohahue tau noa upu runa onana noa upu anoo tau pusire. Onana anoo na pene oananeniso 10 runa pene okimanaka no apia. Ne aaunau sio manianeu na oamauna. Oamauna na oatuhete noa upu ata sio pisa oparisaaso suiosa. Sio manianeu ouna sanrei na sio pusiso mka oanei ata maunauna rerihoni Anahatana, Ia Waini Iapuheuta, waroni iaka.
11 Aaunau sio wasoni oparisaa na sio pinau, sio hanaia pusiso ouna sani mato uasau rei. Tea mo, masike ipalalosa iae, Anahatana irui iake mainae osita sirinia. Irui iake mainae pusu Yesus Kristus ihokai mai tuniai reini na iapuheu sio pusiso. 12 Masike ipalalosa iae, Anahatana irui iake mainae osita. Iatuheteta na ipeneta tau sae wani Anahatana ne suka tewa runa iarihoni re maue kahatene tau sae waroni mai tuniai reini. Iatuheteta na iapamese anori, anori manisata, runa iuna-una sae waroni Anahatana ne suka mani tau muie reini. 13 Ita iamahaita sanrei tau ita wani inapa sae wani iparisaa na ikaumini. Iparisaa ata Yesus Kristus waini Anahatana. Iparisaa ata ia mo, Ia Waini Iapuheuta. Mka ihokai honu na inoo ne rinane wani eresita ita-itane. 14 Irui ruai na imatai inete ita. Imatai na iusi re rosau. Imatai na irui kawasa osita na ipalalosa tewa nea. Irui ruai na imatai na ita iuna ne mansiau. Ne mansiau wani iamauna iuna iake.
15 Aatuheteso rerihoni rai pusire. Aunauso na opusure. Kani opusure tewa, aasau tanuso. Pene atapi ia isa iae iahata ano mainae tewa.