3
Amahaia Anomu Manisate
1 Aakira sio wasoni oparisaa na okanahata ohahue tau sio kupaniau runa sio aiau. Oatinu tanuso. Kahurae sio osaka na ouna sae mani wani iake. 2 Aaunauso na pene oruni mansia nanai, pene otuntana, anoo manna runaso, runa oamuira sio pusiso.
3 Naone ita ruari iariruneta. Ita ruari iatinu tau Anahatana ne maunauna tewa. Ita ruari, sio umau oakarotata. Ita ianei tewa sapani na iarihoni re maue waroni kahatena. Ianei iarihoni maisena tewa. Ita iuna kahatena suiosa. Isaturuu ianana. Iunaso openeso tanuta runa ipeneta tau umau. 4 Ne masike re hali sanrei iae, Anahatana, Ia Waini Iapuheuta, ia iake runata, anoi runata. 5 Anoi runata, oyo iapuheuta na iamahaita rotu-tu ria supani. Iapuheuta pusu ita ruari anori manisata tewa. Ne iapuheuta pusu ia ruai iapunokota. Iapuheuta pusu iriti heu re rosau runa Ne Inaha iunata iamrai honu. Anahatana Ne Inaha iunata iamahaita rotu-tu ria supani. 6 Anahatana irui Ne Inaha osita pusu Yesus Kristus, Ia Waini Iapuheuta rei. 7 Anahatana irui Ne Inaha osita na isupu pusire waroni Amari mka iruire osi ne hehuka. Reiso iparisaa ata mka iamahaita rotu-tu ria supani. Iamahaita rotu-tu ria supani tau Anahatana ialapasita rerihoni re rosau tau irui iake osita.
8 We anamanaya waroni au mato uasau rei waroni titue-tue. Reiso unina na ano aparisaa ia-ia, oyo aatuhetere osi sio wasoni oparisaa tau Anahatana. Aatuheteso na sio ouna iake suiosa. We anamanaya rai waroni iaka runa rakahai sio pusiso. 9 Ne ano mo, pene aatinu tau sio wasoni otuntana remnahu huie rerihoni noa upu nanao. Pene aatinu tau sio wasoni oariruneso otuntana runa sio Yahudiu no maunauna. Arai pusire tau sae isa tewa, rakahai ia isa tewa. 10 Munata ia isa iatuhete sae wani erepusu maunau titue tewa, oyo iuna sio umau oparisaa tau maunau titue rai tewa nea, aasau osi ia rei, “Ainati.” Iarihoni tewa, oyo aasau tanui honu, “Ainati.” Munata ano aasau nai ua nea, ne iarihoni tewa, pene akatai nea. 11 Ano aanei ata ia waini iuna sanrei, ia iuniki iarihoni maunau titue. Ano aanei ata waini ipalalosa. Tau sae, ianei ata iuna isanae, ne iuna isanae sirinia.
Paulus Iauwatu Tapeae
12 Mka uaisosi Artemas te Tikhikus pani tanua. Mka ihokai pani, oyo anina ia-ia na ahoka mai tanuku san-sana, mai niane Nikopolis. Tau sae, uapamata sou nanie uru-rueku mai rei rotu-tu musum mahatane pusiki. 13 Anina ia-ia na aakahai Zenas, ia pembela rei, runa Apolos. Aakahaiso na mka oeu mai orori no wekau runa pusire waroni mka opake sui arena tihue. 14 Kahurae ita re mansiau wasoni oparisaa ouna sae waroni iaka suiosa. Ouna iake na oakahai sio wasoni muaio tewa, no apia tewa. Pene rotu-tu sio reimo oamahaiso oakahai ia isa tewa.
15 Sio pusiso wasoni okataku oauwatu tapeae osia. Uauwatu tapeae osi omi pusimo utumo pani rei wani anomo runama runa oparisaa.