23
1 Paulus iamrou sio onata rei, oyo iasau, “Wea kakau, wea waniu. Rotu-tu reini uarinii rerihoni uamahaiku sapani. Uamahaiku manisate. Upusu Anahatana ne maunauna pusire.” 2 Iasau ata ia manisate oyo, ia imam aihuhue Ananias iaisosi sio wasoni oooso mai Paulus nusui oasapana hohai. 3 Oyo Paulus iasau osiki sanrei, “Mka Anahatana iapasana ano. Ano makarotane wani aasau ata ruamu manisate. Aikee ano manisate tewa. Ano sani pakelo watikohui wani sio oaunutu sati putie tanui na sio oahata kuati. Ano aruea pani rei nanie aapasanaku pusu Musa ne maunauna. Aikee ano ruamu apusu maunauna rai tewa nanie aaisosiso oasapanaku!”
4 Sio mai Paulus nusui oasau, “Ano auna pumaa ia imam aihuhue waini ianori runa Anahatana tau sae rei?” 5 Paulus on poe iasau, “Wea kakau, wea waniu. Au uationai tewa. Sinana au uanei ata ia waini ia imam aihuhue mka uasau sanrei tewa. Tau sae, Musa ikanu tau Anahatana ne anamanaya sanrei, ‘Pene ouna pumaa ia mainae waini iaisosi mo mansiau.’”
6 Paulus anoi erepeka ata sio onata umau, sio rerihoni tikane Sadukiu runa sio tamena, sio rerihoni tikane sio onata rerihoni akama Yahudi. Reiso iasau osiso sanrei, “Wea kakau, wea waniu. Au wani ia onate rerihoni akama Yahudi. Wea upu, sio onata rerihoni akama Yahudi oi. Omi wani oasei tanuku tau au uparisaa ata Anahatana iapuhai sio matana.” 7 Iasau sanrei oyo, sio onata rerihoni akama Yahudiu runa sio Sadukiu otuntana runa umau. Sio osamaso tau ua. 8 Otuntana tau sio Sadukiu oahata Anahatana iapuhai sio matana honu tewa. Oahata sio maisosia on roe noiyaha wasoni tewa, inahau waroni tewa. Ne sio onata rerihoni akama Yahudi oparisaa tau rai pusire.
9 Paulus iasau sio matana oamahaiso honu, oyo sio onata oakapona umau ouna purie. Sio matuhete Musa ne maunauna umau wasoni sio onata rerihoni akama Yahudi ohitio roe. Ohitio roe oyo, otuntana runa sio Sadukiu. Oasau, “Ami aapamata sou ata ia rei iuna sae isa wani eresana tewa. Munata inaha isa te, ia maisosie on roe noiyaha te, ianamana osiki, areimo iake.” 10 Sio otuntana mainae naiosa rotu-tu ia mainae tau ia natu Kaisar ne soratatua ikaitau mka sio oakinene Paulus. Reiso iaisosi ne soratatua oeuso poe, onanai rerihoni sio panesi rei, oyo ororiki roe no numa hatu honu.
11 Pumono pani sanrei oyo, Upuri Yesus ihokai iooi mai Paulus nusui. Iahata, “Paulus, aapamese anomu. Ano asima rerihoni au mai kota Yerusalem nea. Asaka asima runa au roe kota Roma oi.”
Sio Yahudiu Oheu Nanie Ohunu Paulus
12 Hanroe tau omnanoe oyo, sio Yahudiu umau oheu. Sio osopa ruao ata mka oai tewa, oninu tewa on ohunu Paulus tewasi. 13 Sio hutu ate nesi oheu sanrei. 14 Oeuso roe sio imam onata runa sio ona Yahudi nesia rei, oyo oasau, “Ami asopa ruama na aai sae isa tewa on ahunu Paulus tewasi. 15 Reiso omi runa sio onata tamena oainisi na ia mainae tau ia natu Kaisar ne soratatua iaisosiso oautunu Paulus mai tanumo. Oasau oakarota ata omi nanie oasei tanui ia-ia rerihoni sae waroni sio oamanarui tanure. Mka ami asaka ahunui on ihokai mai tewasi.
16 Ne Paulus etei (hotai anai) iatinu ata sio oheu nanie ohunui. Reiso ieui roe sio soratatua no numa hatu, oyo isima osi Paulus. 17 Oyo Paulus ioi ia kapitane tau sio soratatua utuni isa na ihokai. Ihokai oyo, Paulus iasau osiki, “Aautunu ia ikine rei roe ia mainae tau ia natu Kaisar ne soratatua. Nanie isima runa sae isa osiki.” 18 Reiso ia kapitane iautunu Paulus etei rotu-tu ohokaso roe ia mainae rei.
Hoka roe oyo, ia kapitane iasau, “Paulus, ia waipani pui anoe rei, ioiku, oyo iainisi na uautunu ia ikine rei mai tanua. Nanie isima runa sae isa osia.
19 Ia mainae rei iakahuu ia ikine rei hanai, oyo iautunui na uaso ruao. Sio ruao, oyo iasei, “Ano nanie asima runa sae osiku?” 20 Ia ikine rei on poe iasau, “Upuku. Sio Yahudiu umau oapamata sou nanie oainisi na hanroe ano arori Paulus roe sio ona Yahudiu. Mka sio oasau oakarota ata nanie oasei tanui ia-ia rerihoni sae waroni sio oamanarui tanure. 21 Ne pene apusu sio no mainisie. Tau sae, sio hutu ate nesi wasoni oauhuniso nanie onotai poe arena tihue. Sio pusiso osopa ruao na oai tewa, oninu tewa on ohunu Paulus tewasi. Muie reini mo, sio wasoni osaka. Onapa ano aamanaku arori Paulus pusu no maue.” 22 Oyo ia mainae rei iasau, “Pene asima osi ia seia mani ata ano asima runa no kaheute rei osiku.” Iasau sanrei oyo, iaisosiki inuniki.
Sio Oaisosi Paulus Ieui Poe Feliks
23 Ia mainae tau ia Natu Kaisar ne soratatua ianaha runa sio kapitana tau sio soratatua utuni. Ianaha runa sio kapitana ua. Iaisosiso sanrei, “Aamanou sio soratatua orori tunua utuni ua, sio soratatua osaa naitanana hutu itu, runa sio soratatua orori atiena utuni ua. Aamanouso na sio oeuso poe nia Kaisarea mka-mka pumono tau yam sia. 24 Aamanou naitanana osi Paulus oi na isaa naitanane. Oyo oautunui rotu-tu ihokai poe ia waini ia ne kawasa tau otoe nanai Feliks.” 25 Oyo ia mainae rei ikanu surate kani ereasau sanrei,
26 “Au, Klaudius Lisias uatapea ano upuku, Feliks. 27 Ia reini, sio Yahudiu osotai, oyo sina ohunui. Ne uhokaku runa sio soratatua umau, oyo usupuso, oyo unanai rerihoni sio Yahudiu rei. Tau sae, au uatinu ata ia ne kawasa sani ia natu Kaisar ne mansiau. 28 Au nanie uanei sio wasoni oamanarui tau sae, reiso uroriki roe sio ona Yahudiu. 29 Uatinu sio oamanarui, oyo uanei ata sio oamanarui pusu sio Yahudiu ruao no maunau akama. Ne sio oamanarui pusu sae isa tewa na ami ahunui te anusui pani pui anoe. 30 Oyo sio osima osiku ata sio Yahudiu umau wasoni oheu nanie ohunui. Reiso mata hun tewa oyo, au uaisosiki poe tanua. Uaisosi sio wasoni oamanarui rei osima osia runa sio wasoni oamanarui runa sae.”
31 Reiso sio soratatua oeu oautunu Paulus sani ia mainae iaisosiso. Sio oeu okata Paulus tau pumono rei rotu-tu ohokaso poe Antipatris. 32 Hanroe oyo, sio wasoni osaa naitanana osaa okata Paulus. Ne sio soratatua wasoni onena onuniso roe no numa hatu roe Yerusalem honu. 33 Hoka poe Kaisarea oyo, orui surate rei osi ia waini ia ne kawasa tau otoe rei. Oyo orui Paulus osiki oi. 34 Ia onate rei ipaca tau surate rei, oyo iasei tau Paulus, “Ano me niane sae?” Paulus on poe isima sanrei, “Kilikia.” 35 Ia onate iasau, “Mka uatinu runa me parakana rei sirinia. Ne napa rotu-tu sio wasoni oamanarua ohokaso mai.” Oyo sio oaisosiso osakai pani numa aiau wani Herodes inanai.