24
Feliks Iatinu Tau Sio Ona Yahudiu No Parakana Runa Paulus
1 Onona nima oyo, ia aihuhue tau sio wasoni okenu makapanau osi Anahatana, Ananias, ihokai ikata sio ona Yahudiu umau runa ia waini iamanaru tumatau pusu maunauna isa nanai Tertulus. Ohokaso on roe Yerusalem rotu-tu ohokaso poe Kaisarea. Hoka poe oyo, oamanaru Paulus osi ia waini ia ne kawasa tau otoe rei waini nanai Feliks. 2 Reiso ia onate rei ianaha runa Paulus. Ihokai oyo, Tertulus iamanarui sanrei, “Upuku. Ano aaisosima iake. Reiso aruema aamaturuma mai rei. Ano me iaka panesi osi ami Yahudiu mai mani tuamane rei. Tau sae, ano aheu pusu me aanei panesi. 3 Upuku Feliks. Ano iake! Sui supani-supani mani ami anoma rapeka runa pusire waroni ano auna osima. 4 Au nanie uakaremaya potuina tewa, ne uainisi na anomu iake aatinu tau we anamanaya mkana-mkana rai mani.
5 Ami asupu ia reini mo iuna neka mansia panesi. Iakarema panesi sui supani-supani mani sui tuniai reini pusiki iuna sio Yahudiu ouna purie. Ia sahoro iaisosi sio wasoni opusu ia waini on pani nia Nasaret. 6 Ia iapaputi rea Anahatana ne numa mainisie. Ne ami asotai naone. Ami nanie aapasanai pusu ami mani maunau akama mani. 7 Ne ia mainae tau ia natu Kaisar ne soratatua iwahui rerihonima, 8 oyo iaisosi sio wasoni oamanarui oamananea. Munata ano ruamu aasei tanui, mka aatinu ata pusire ami wani aamanarui tanure waroni titue.” 9 Sio Yahudiu oama-amanaru Paulus oi oasau ata Tertulus waini iasau titue.
10 Oyo ia waini ia ne kawasa rei iatieu osi Paulus na Paulus ianamana. Reiso Paulus iasau sanrei, “Upuku. Au uanei ata ano aasau potuina nea. Aasau sae wani titue, sae wani eresana mai otoe reini rotu-tu musum inasa rai. Reiso uahata iake uanamana unete ruaku mai tanua. 11 Ano ruamu pisa aasei na mka aatinu ata mato ueu roe Yerusalem nanie uainaa runa Anahatana. Mato ueuku we onona hutusa rahana ua. 12 Sio Yahudiu onooku wani utuntana runa ia isa tewa. Onooku uamanou sio hutue na ouna purie tewa. Roe Anahatana ne numa mainisie, pani numa mananouna osi sio Yahudiu, sui kota rei pusiki, onooku uuna sanrei tewa. 13 Reiso sio pisa osima runa sae isa osia tewa na ano aanei ata sio wasoni oamanaruku titue. 14 Ne uasau ata sae wani titue wani sanrei. Au uainaa runa Anahatana waini mania upu, sio Yahudiu, oainaa runai oi. Au uainaa runai pusu Yesus ne maunauna waroni sio Yahudiu oasau ata waroni titue tewa. Runa uparisaa tau Musa ne maunauna runa sio mamsima runa Anahatana ne anamanaya no maunauna sirinia. 15 Uparisaa sani sio rei oi, ata mka Anahatana iapuhai sio matana pusiso. Sio wasoni oamanisa runa sio wasoni oamanisa tewa. 16 Reiso au uawaha tau we mkonae pusiki na uamahaiku manisate. Uarinii rerihoni uamahaiku sapani. Uamahaiku manisate. Upusu Anahatana ne maunauna pusire. Au we sanae isa osi tumata tewa.
17 Ueu uarihoni Yerusalem musum inasa rai, oyo ununiku roe rei honu nanie urori kepeni osi sio mosokinia rerihoni we mansiau runa urehi makapanau osi Anahatana. 18 Sio Yahudiu onooku roe Anahatana ne numa mainisie urehire upusu monne uatipusi nea. Ukata sio hutue tewa. Au uunaso ouna purie tewa. 19 Ne sio Yahudiu umau on pani otoe Asia ounaso ouna purie. Sio sahoro kahurae ohokaso mai na oamanaruku kani nanie oahata au we isanae. 20 Ne ohokaso tewa. Reiso kahurae sio Yahudiu rei wasoni oamanaruku mai rei ruao osima osimo runa osupu we kahatene sae pannuhu uanamana unete ruaku osi sio ona Yahudiu. 21 Hasae sio pisa oasau ata au uoo uamanane sio onata rei, oyo uasau anamanae osa rei mani. Uasau, “Omi wani oasei tanuku ranie hatae reini tau au uparisaa ata mka Anahatana iapuhai sio matana.”
22 Feliks, ia waini ia ne kawasa rei, ianei panesi rerihoni sio mampusu Yesus no maunauna. Iasau tewa ia seia titue, ia seia isana rerihoni Paulus runa sio Yahudiu rei. Ne iasau sanrei, “Mka ia mainae tau ia natu Kaisar ne soratatua Lisias ihokai, oyo mato uapamata sou rerihoni parakana rei.” 23 Oyo iaisosi ia kapitane tau sio soratatua utuni isaka Paulus ne pene iuna mtinte tanui runa itapi ne netau orori apia te, muaine te osiki.
Feliks Runa Sahai Drusila Oatinu Tau Paulus
24 Onona inasa rai oyo, Feliks ihokai ikata sahai Drusila. Drusila ia Yahudi. Feliks ianaha runa Paulus, oyo iatinu tau Paulus ianamana rerihoni sapani na iparisaa tau Yesus, Ia Anahatana Iratiki Iapuheuso. 25 Paulus iaunaui rerihoni sapani na ita iamanisa, sapani na iamtou hanari, iamtou airi na pene ipalalosa, runa sapani na mka ranie hatae isa Anahatana iapasana pusita. Oyo Feliks ikaitau. Reiso iasau osi Paulus, “Ano pisa aeua nea. Ne munata mka patapariku tewa, au uanaha runaya.” 26 Tau muie rei Feliks inina na Paulus irui kepeni osiki na ialapasiki. Reiso taua-taua ianaha runa Paulus na ianamana runai.
27 Ianaha runa Paulus rotu-tu musum ua oyo, sio okati Feliks. Ohiti Perkius Festus tau ia ne kawasa tau otoe rei. Feliks nanie iuna iake osi sio Yahudiu, reiso ihoka Paulus rerihoni pui anoe tewa.