22
1 “Wea amau, wea kakau, wea waniu. Oatinu na uanamana unete ruaku.” 2 Sio oatinui ianamana tau sou Ibrani, oyo oamanutuso erenesi wani sinasi rei. Reiso iasau osiso, 3 “Au mo, au Yahudi. Uamrai poe nia Tarsus poe otoe Kilikia. Ne au mo, au mainae mai kota Yerusalem reini. Gamaliel iatuheteku tau Musa ne maunauna waroni isupure pusu rea upu. Upusu maunauna rai ia-ia. Urui ruaku na unana tanei osi Anahatana sani omi mai rei ranie hatae reini. 4 Uuna sinsara sio wasoni oparisaa tau Yesus rotu-tu sio umau omataso. Unota sio hanaia runa sio pinau pusiso, oyo unususo pani pui anoe. 5 Ia ona mainae rerihoni sio wasoni oakanupu makapanau osi Anahatana runa sio ona Yahudi nesia rei pusiso pisa osima ata areimo titue. Uakarota tewa. Usupu surata rerihoni sio onata rei osi rea kakau, rea waniu poe kota Damsyik na ueuku poe kota rei, na unota sio wasoni oparisaa tau Yesus poe rei. Unotaso oyo, ukanihooso samatoro uroriso mai Yerusalem na sio oapasanaso.
6 Ueuku rotu-tu uhoka poe, haineke Damsyik nea, oyo tau ranie katopu mata sira tau itane mainae on roe nante eresita erehoriku. 7 Itane eresita oyo, uamnahuku poe tuamane, oyo uatinu ia isa nioni iasau osiku, ‘Saulus, Saulus. Auna sinsaraku, tau sae?’
8 Oyo uasei, ‘Upu, ano seia rei?’
Iahata, ‘Au reini mo, Au Yesus on poe nia Nasaret. Au sahoro ano wani auna au sinsaraku. Auna we mampusua sinsaraso, areimo sani auna au ruaku sinsaraku.’
9 Sio wasoni okataku onoo itane rei ne oatinu ia waini ianamana osiku tewa. 10 Oyo au on poe uasei honu, ‘Upu, ano mo anina na au uuna sae?’
Upuku isana sanrei, ‘Hanu roe, oyo aeua poe Damsyik. Hoka poe oyo, mka aatinu rerihoni sae waroni Anahatana ihitia na aunare.’
11 Mataku usena raputiso tau unoo itane mainae rei. Reiso sio wasoni okataku orime hanaku. Orimeku oyo, oautunuku rotu-tu ahokama poe nia Damsyik.
12 Waini ia isa poe rei nanai Ananias. Iainaa runa Anahatana manisate. Ipusu Musa ne maunauna ia-ia. Sio Yahudiu pusiso wasoni orueso poe Damsyik oamuirai. 13 Ihokai mai tanuku, oyo ioo mai nusuku. Ioo mai nusuku oyo, iasau, ‘Waniku Saulus, masi anoo honu!’
Mata huni tewa oyo, unooi. 14 Oyo iasau osiku, ‘Anahatana waini rea upu oainaa runai iroma ano nea na aanei ne maue. Iromaya na anoo Ia waini Anahatana Iratiki Iapuheuso waini anoi manisate, runa aatinu nioni pannuhu ianamana osia. 15 Ininia na asima osi sio pusiso rerihoni anoo runa aatinu sae nea. 16 Reiso anapa sae rei? Hanu roe na aainisi na Anahatana iuna heu me rosau oyo osohu heu me rosau rai .’
17 Reiso ununiku mai Yerusalem. Hoka mai oyo, uainisi roe Anahatana ne numa mainisie, oyo unoo masasua.
18 Unoo Upuri. Upuri iasau osiku, ‘Masi aeua rapu rerihoni Yerusalem. Tau sae, mka sio umau mai rei openeso oatinu tau ano asima rerihoni au.’ 19 Ne uasau, ‘Upu, sio oanei sapani na ueuku sui numa mananouna osi ita Yahudiu nanie usota sio wasoni oparisaa tau ano. Usotaso, oyo uhitaso. 20 Sio ohunu Stefanus waini isima runa ano, au oi uooku haineke uahata sio ohunui iake. Au sahoro usaka sio wasoni ohunui no papita.’
21 Iahata, ‘Masi aeua. Tau sae, au mo, mka uaisosia aeu hainau noi sio wasoni sio Yahudiu tewa.’”
Paulus Ne Kawasa Sani Ia Natu Kaisar Ne Mansiau
22 Sio Yahudiu oatinui rotu-tu ianamana rerihoni sio wasoni sio Yahudiu tewa, oyo oakapona, “Ohunui na imatai iarihoni tuniai reini. Iake tewa iamahaiki asi.” 23 Sio anoo rasaa mainae reiso oakapona runa osihotata no papita runa opesi tapuna suru roe. 24 Reiso ia mainae tau ia natu Kaisar ne soratatua rei iaisosiso orori Paulus pani no numa hatu rei. Oyo iaisosi sio soratatua oasei tanui runa osapui tau awane unie. Osapui na ianei sio hutue wasoni oakapona tanui tau ne isanae sae. 25 Sio wasoni okanihooi tau makapana unte nea, oyo Paulus iasei tau ia kapitane tau sio soratatua utuni waini iooi pani rei, “Sio otapia asapu ia waini ne kawasa sani ia natu Kaisar ne mansiau no kawasa on ia waini ne kawasa iapasanai iasei tanui tewasi? Iasau ata isana tewasi?”
26 Ia kapitane iatinu tau rei, oyo ieu roe ia mainae isima osiki sanrei, “Ita isapui sanrei iake tewa. Ia rei waini sani ia natu Kaisar ne mansiau.”
27 Reiso ia mainae ieui poe Paulus, oyo iasei, “Masi aasau, titue ano sani ia natu Kaisar ne mansiau?” Paulus iasau ata, “E-e. Areimo titue. Au sani ia natu Kaisar ne mansiau.”
28 Ia mainae iahata, “Au usenu kepeni panesi na uuna sani ia natu Kaisar ne mansiau. Paulus on poe iasau, “Ne au uamrai, au sani ia natu Kaisar ne mansiau nea.”
29 Reiso mata hun tewa oyo, sio soratatua wasoni naone nanie oasei tanui osuka hae muie. Ia mainae oi ikaitau. Tau sae, ianei nea ata iaisosiso okanihoo ia waini sani ia natu Kaisar ne mansiau tau rante.
Paulus Ianamana Inete Ruai Tau Sio Ona Yahudiu
30 Hanroe oyo, ia mainae tau ia natu Kaisar ne soratatua nanie ianei sio Yahudiu oamanaru Paulus, nanie ta hae? Reiso ialapasiki, oyo ianaha runa sio imam onata runa sio ona Yahudiu pusiso na oamanouso. Sio oautunu Paulus na iamananeso.