21
Paulus Sio Osaa Kapane Nanie Oeuso Roe Yerusalem
1 Ami aauhaa sio onata rei pani Efesus, oyo aeuma aarihoniso asaa kapane. Kapane rei ereruma katopu rotu-tu ahokama nau nusa Kos. Hoka nau oyo, hanroe ereruma honu rotu-tu ahokama nau namane Rodos. Hoka nau Rodos oyo, kapane ereruma honu rotu-tu remamanui nau nia Patara. 2 Hoka nau oyo, asupu kapane isa nanie ereruma nau otoe Fenisia. Reiso ami asaa kapane rei. 3 Asaa rotu-tu anoo nusa Siprus hae pante. Aeu anikui rotu-tu ahokama nau otoe Siria. Kapane ereruma rotu-tu remamanui nau kota Tirus na sio opaki apia rerihoni kapane rei. 4 Reiso ami asupu sio wasoni oparisaa tau Yesus umau nau rei, oyo aruema akataso rotu-tu onona itu. Sio oasau osi Paulus pusu Anahatana Ne Inaha na pene ieu roe Yerusalem nea. 5 Ne kahurae aeu aarihoniso, oyo aeuma honu. Reiso sio pusiso, sio hanaia, sio pinau runa ne hehuka pusiso oautunuma rotu-tu ohokama rerihoni kota rei. Oyo arike tune nau nuae nusue samatoro aanamana runa Anahatana. 6 Aanamana runa Anahatana pusi, oyo aauhaa umau. Oyo asaa kapane honu samatoro sio panesi rei onuniso.
7 Asaa kapane honu on poe Tirus rotu-tu ahokama pani nia Potolemais. Hoka pani oyo, aatapea sio wasoni oparisaa pani rei. Aruema akataso onone osa. 8 Nene hanu roe oyo, aeuma honu rotu-tu ahokama pani Kaisarea. Hoka pani oyo, aeuma ria Filipus ne numa. Filipus waini ia mamsima runa Sou Iake osi sio wasoni oatinui tewasi. Ia osa waini rerihoni sio makahai sio mamparisaa itu rei wasoni ohitiso roe Yerusalem. 9 Ia ne sio pina hehuka ate. Osupu kawasa on roe Anahatana na osima-sima runa ne anamanaya. 10 Aruema onona inasa rai oyo, ia mamsima runa Anahatana ne anamanaya isa nanai Agabus ihokai on pani Yudea. 11 Ihokai mai tanuma oyo inana Paulus ne koropou unte. Inanai oyo, ikanihoo ruai aini atua runa hanai atua tau koropou unte rei. Oyo iasau, “Anahatana Ne Inaha iasau sanrei, ‘Ia ne koropou unte rei, mka sio Yahudiu okanihooi sanrei roe Yerusalem, oyo oruiki osi sio wasoni sio Yahudiu tewa.’”
12 Ami aatinu sanrei oyo, ami runa sio mamparisaa pusiso wasoni orueso poe rei osopo Paulus, “Pene aeua roe Yerusalem nea.” 13 Ne Paulus on poe iasau, “Omi wani orani ouna anoku karake na pene ueuku roe Yerusalem, nanie ta hae? Masike sio onusuku pani pui anoe, oyo ohunuku tau upusu Upuri Yesus iae, au nanie ueuku roe rei sirinia.” 14 Paulus ipenei iatinu tanuma. Reiso asopoi tewa nea. Aasau, “Ami aainisi na ereeu pusu Upuri ne maue.”
15 Aruema poe rei onona inasa rai, oyo aautotu mani apia. Aautotu mani apia pusi oyo, aeuma roe Yerusalem. 16 Sio mampusua umau on poe Kaisarea oeu okatama nanie oautunuma roe Manason ne numa. Nanie aararanema roe ne numa rei. Manason, ia rerihoni nusa Siprus. Iparisaa tau Yesus potuina nea.
Paulus Sio Ohokaso Roe Yerusalem
17 Hoka roe Yerusalem oyo, sio wasoni oparisaa oatapeama anoo iaka. 18 Hanroe oyo, Paulus ieu ikatama nanie inoo Yakobus, ia mainae tau sio wasoni oparisaa. Sio onata tau sio wasoni oparisaa nesia rei wasoni oi. 19 Paulus iatapeaso, oyo isima runa pusire waroni Anahatana iuna pusu ia sui sio wasoni sio Yahudiu tewa. 20 Sio oatinu Paulus isima sanrei oyo, pusiso oainaa runa Anahatana. Oyo oasau osi Paulus sanrei, “Kakaku Paulus. Kahurae ano aanei ata wasoni sio Yahudiu nihu-nihun sanrei oparisaa tau Yesus nea. Sio pusiso orime kuru Musa ne maunauna. 21 Sio rei oatinu ata ano aatuhete sio Yahudiu wasoni orueso sui sio tamena na pene opusu Musa ne maunauna. Sio oasau ata ano aaunauso na pene orehi sio ikina runa pene opusu no monna tamena. 22 Kani iuna sae? Mka sio oatinu ata ahokaya nea. 23 Reiso ami mani maunaune sanrei. Sio ate mai ami reini osopa osi Anahatana nea. 24 Aeu akataso runa apusu monne aatipusi runa ateso. Asenu makapanau waroni kahurae ateso ohane na orehire osi Anahatana. Asenure na sio okoma unuo. Mka sio onoo, oyo oanei ata sio oatinu eresana rerihoni ano. Ne sio onoo ata ano apusu Musa ne maunauna sirinia. 25 Ne rerihoni sio Yahudiu tewa wasoni oparisaa tau Yesus nea, ami aauwatu surate osiso nea na asima runa sapani na aapamata sou na pene oai muaine wani sio oruiki osi anahatana wani titue tewa, pene oai makapana nene nasie, pene oai henate rerihoni makapana wani sio oakinenei, runa pene oamanea.”
26 Reiso Paulus ieu ikata sio ate rei, oyo hanroe iatipusi pusu monne runa ateso. Oyo onusu pani Anahatana ne numa mainisie nanie ohete umetene pannuhu oatipusi pusu monne pusiki na orehi makapanau osa-osa osi Anahatana.
Ia Natu Kaisar Ne Soratatua Oaresi Paulus
27 Onona itu rai haineke pusire nea, oyo sio Yahudiu umau on poe otoe Asia onoo Paulus pani Anahatana ne numa mainisie nene nusue. Oyo ouna sio hutue ouna purie samatoro osotai. 28 Osotai oyo oaka-kapona, “He omi Israel. Masi oeu mai na oakahaima. Ia reini sahoro ieu ihori sui supani-supani mani iatuheteso na openeso tau ita Yahudiu. Iatuheteso na pene opusu Musa ne maunauna. Iatuheteso na pene oamuira Anahatana ne numa nusue reini. Muie reini irori sio wasoni sio Yahudiu tewa na onusu mai Anahatana ne numa reini na iapaputi ne numa monne nea. Ne numa wani monne tau Anahatana waini tanui.” 29 Sio oasau sanrei tau naone sio onoo Trofimus, ia Efesus, ieu ikata Paulus sui kota rei. Anoo ranoa ata Paulus ieu ikatai mai Anahatana ne numa nusue oi.
30 Sio pusiso sui kota rei anoo rasaa reiso ouna purie, oyo pusiso on nau, on ria orumaso tau osa mai Paulus nanie osotai. Osotai oyo, onesai ihokai rerihoni Anahatana ne numa mainisie rei. Mata hun tewa oyo, oraru Anahatana ne numa nene mitanunua pusire. 31 Sio hutue ohunu rea Paulus, oyo ia isa isima osi ia mainae tau ia natu Kaisar ne soratatua ata sio Yerusalem pusiso wasoni ouna purie. 32 Reiso ieu ikata sio soratatua runa sio onata umau, oyo orumaso poe sio hutue rei. Sio hutue rei onoo ia mainae runa sio soratatua, oyo ohita Paulus tewa nea.
33 Ia mainae rei ihokai mai Paulus, oyo iaresiki nanie iasei tanui. Oyo iaisosiso okanihooi tau ranteu ua. Okanihooi oyo, iasei tau sio hutue, “Ia seia rei? Ne masana sae rotu-tu ouna sanrei?” 34 Sio umau oakapona sanrei, sio umau oakapona tamene. Sio ouna purie reiso ia mainae iatinu sae isa tewa na ianei masana rei sapani. Reiso iaisosiso orori Paulus roe sio soratatua no numa hatu nanie iasei tanui roe rei. 35 Ohokaso poe hantetane aikune, oyo sio hutue oruru umau nanie ohitai rotu-tu sio soratatua osiui ororiki. 36 Sio hutue opusu, oakapona, “Ohunui!”
Paulus Ianamana Inete Ruai
37 Sio soratatua nanie onusu Paulus pani no numa hatu nea, oyo iasei tau ia mainae tau ia natu Kaisar ne soratatua rei, “Au pisa uasau sae isa osia?”
Ia mainae on poe iasei, “Ano aanei sou Yunani oi? 38 Reiso ano sahoro ia Mesir wani naone auna sio openeso opusu kupania, oyo aautunu sio mamhunua nihu ate pani otoe huie, tea?” 39 Paulus on poe iasau, “Au Yahudi, uamrai poe kota Tarsus, kota mainae poe otoe Kilikia. Au uainisi na atapiku uanamana osi sio hutue rei.”
40 Oyo itapiki ianamana. Paulus ioo roe hantetane, oyo isopo tau hanai na sio oamaturuso. Reiso oamaturuso nea, oyo ianamana osiso tau sou Ibrani. Iasau sanrei,