18
Paulus Iaunauso Poe Kota Korintus
1 Oyo Paulus ieu iarihoni kota Atena. Ieu rotu-tu ihokai poe kota Korintus. 2 Hoka poe oyo, isupu ia Yahudi isa nanai Akwila. Ia ne niane wanau otoe Pontus. Akwila mato ihokai on nau otoe Italia ikata sahai Priskila. Tau sae, ia natu Roma waini nanai Klaudius iaisosi sio Yahudiu pusiso oeu oarihoni kota Roma nea. Roma wani kota inae pani Italia. Reiso Paulus ieu inoo uaso, 3 oyo iruei ikataso. Tau sae, pusiso no tanei osa. Tonuso onana numau rerihoni makapana unte na oahenire, reiso onana tanei okata umau. 4 Tau ranie hatae rei iaranahata iaunauso pani numa mananoune osi sio Yahudiu suiosa, nanie iapamanuso na sio Yahudiu runa sio wasoni sio Yahudiu tewa pusiso oparisaa ata Yesusi waini Ia Anahatana Iratiki Iunaso Iapuheuso.
5 Silas runa Timotius ohokaso poe Korintus on pani otoe Makedonia, oyo Paulus iaunauso tau maunaune rerihoni Yesus mani. Inana numau rerihoni makapana unte tewa nea. Iaunau sio Yahudiu iasau ata Yesus waini Ia Anahatana Iratiki Iapuheuso rei. 6 Ne sio Yahudiu onesiki, oyo omakaniai. Reiso isihotata tapuna rarihoni ne papite na sio oanei ata ipenei tau sio nea. Oyo iasau, “Mka Anahatana iapasanamo, omi ruamo osana. Au mo usana tewa. On ranie hatae reini mo, au ueu uaunau sio wasoni sio Yahudiu tewa.” 7 Oyo ieu iarihoni sio rei, oyo ieui pani numa isa wapani numa mananoune nusue. Numa rei wani Titius Yustus ne numa. Ia Yahudi tewa ne iainaa runa Anahatana sani sio Yahudiu. 8 Ne Krispus, ia mainae tau numa mananoune rei, runa ne numa matae pusiso oparisaa tau Upuri Yesus. Sio Korintus panesi honu oatinu tau Paulus ne maunauna, oyo oparisaa tau Yesus, oyo sio oriti heu no rosau.
9 Nai osa tau pumono Paulus ineke masasua. Tau ne masasua rei, Upuri iasau osiki, “Pene kaitau! Aaunauso sirinia. Pene amaturua. 10 Tau sae, au wani ukata runaya. Reiso ia isa iae, mka iuna kahatene tau ano tewa. Tau sae, mai kota reini wasoni sio panesi mka ouna we mansiau.” 11 Reiso Paulus iruei poe Korintus rotu-tu musum, hunana nome iatuheteso tau Anahatana ne maunauna.
12 Galio waini ia ne kawasa tau otoe Akhaya, oyo sio Yahudiu osota Paulus, nanie ororiki pani ia ne kawasa iapasanai. 13 Hoka pani oyo, oasau, “Ia reini mo, waini iapumanuso na oainaa runa Anahatana pusu sae waroni Musa ne maunauna rasopo.”
14 Paulus nanie ianamana, ne Galio iasau osi sio Yahudiu sanrei, “Oatinu omi Yahudiu! Sinana omi oamanarui tau ipusu maunau kupania tewa te iuna kahatene, mka au uatinu tanumo. 15 Ne omi otuntana rerihoni anamanaya, nanao, runa ruamo mo maunauna. Reiso kahurae omi ruamo ohunu anamanae. Upeneku uasau sae wani titue, sae wani titue tewa.” 16 Oyo ineiso ohokaso rerihoni naniai iapasanaso rei. 17 Oyo sio osota Sostenes, ia mainae tau numa mananoune rei, oyo ohitai pani naniai iapasanaso roe uae. Ne Galio iuna sae isa tewa.
Paulus Ieu Ihori Rotu-tu Inuniki Pani Kota Antiokhia
18 Oyo Paulus iruei potuina poe kota Korintus, oyo iauhaa sio wasoni oparisaa poe rei. Iauhaaso, oyo isaa kapane ikata Priskila runa Akwila, nanie ieui nau otoe Siria. Ne nau nia Kengkrea iatori unui ipusu monne naone. Isopa osi Anahatana, reiso iatori unui na sio oanei ata ipamanisa sae wani isopa rei nea. 19 Oyo osaa kapane rotu-tu ohokaso nau kota Efesus. Hoka nau oyo, Paulus ieu iarihoni Priskila runa Akwila, oyo inusui pani numa mananoune osi sio Yahudiu, nanie ihunu anamanae runa sio Yahudiu. 20 Sio oainisi nanie iruei potuina runa sio. Ne ipenei. 21 Ne iauhaaso sanrei, “Mka uhokaku honu, hete sae Anahatana ne maue sanrei.” Iauhaaso sanrei, oyo isaa kapane ieu iarihoni Efesus.
22 Hoka nau nia Kaisarea oyo, Paulus isipui, samatoro ieui roe kota Yerusalem, nanie iatapea sio wasoni oparisaa roe rei. Iatapeaso, oyo ieui honu rotu-tu ihokai poe kota Antiokhia. 23 Hoka poe oyo, iruei hunane sanrei, samatoro ieui honu. Ieu ihori niana sui otoe Galatia runa otoe Frigia na iakahai sio wasoni oparisaa na oparisaa ia-ia.
Apolos Iaunauso Poe Kota Efesus Runa Nau Kota Korintus
24 Ia Yahudi isa waini nanai Apolos ihokai mai kota Efesus. Ne niane wani Aleksandria. Ianei ianamana iake. Ianei Anahatana ne anamanaya ia-ia. 25 Sio oatuhetei nea rerihoni Upuri ne arena. Anoi mirike runa iatuheteso pannuhu rerihoni Yesus. Ne hasae ianei ata Yohanes iriti heu no rosau mani. 26 Hoka mai oyo, mataanoe inusui pani numa mananoune osi sio Yahudiu, oyo iaunauso. Ikaitau tewa. Priskila runa Akwila oatinui iatuheteso, oyo ororiki poe sio no numa. Hoka poe oyo, oatuhetei pannuhu rerihoni Anahatana ne arena na iapuheuso na oamahaiso rotu-tu ria supani pusu Yesus. 27 Oyo Apolos nanie ieui nau otoe Akhaya. Reiso sio wasoni oparisaa poe Efesus oakahaiki tau no maunauna, oyo okanu surate osi sio wasoni oparisaa nau Akhaya na sio oararumai iake.
Reiso ieui nau Akhaya. Hoka nau oyo, iakahai panesi sio wasoni oparisaa. Anahatana irui iake osiso nea, reiso oparisaa tau Yesus nea. 28 Apolos iakahaiso tau ituntana mainae runa sio Yahudiu rotu-tu ikuaso. Sio panesi oatinui. Ikuaso tau iatuheteso rerihoni Anahatana ne anamanaya ata titue, Yesus waini Ia Anahatana Iratiki Iapuheuso.