19
Paulus Iaunauso Poe Kota Efesus
1 Apolos waipo kota Korintus asi, oyo Paulus ieu ipusu arena suru ria rotu-tu ihokai nau kota Efesus. Hoka nau oyo, isupu sio mampusua umau. 2 Isupuso, oyo iasei tanuso, “Omi osupu Anahatana Ne Inaha nea pannuhu omi oparisaa?”
Sio on poe oasau sanrei, “Tewasi. Ami aatinu tewasi ata Anahatana Ne Inaha waini.”
3 Oyo Paulus iasei honu, “Reiso omi oparisaa tau sae, oyo sio osohu heu mo rosau?”
Oahata, “Ami aparisaa tau Yohanes ne maunauna waroni iatuheteso tanure oyo isohu heu mani rosau.”
4 Iahata, “Yohanes isohu sio wasoni oarihoni no rosau. Iaunauso ata kahurae sio oparisaa tau ia mka ihokai tau muie. Ia reimo, Yesus.”
5 Sio mampusua rei oatinu tau rei, oyo oparisaa tau Upuri Yesus. Reiso Paulus sio osohu heu no rosau. 6 Paulus iahusieso, oyo Anahatana Ne Inaha ihokai tanuso. Ihokai tanuso irui kawasa osiso na sio oanamana tau sou waroni oaneire tewa runa osima runa maunauna on roe Anahatana. 7 Sio rei wasoni sio hutusa rahana uasa sanrei.
8 Paulus iaunauso ikaitau tewa pani numa mananoune osi sio Yahudiu suiosa rotu-tu hunana tonu rai. Iapamanuso na otapi Anahatana iuna aia tau sio. 9 Ne sio umau unuo onata reiso openeso oparisaa. Sio omakania Paulus ne maunauna rerihoni sapani na Anahatana nanie ita tumatau iamahaita. Sio omakania ne maunauna, sio panesi oatinu. Reiso Paulus ieu iarihoniso, oyo ieu ikata sio mampusua pani Tiranus ne kakaranae mainae. Hoka pani oyo, iatuheteso suiosa. Ranie hatae isa, ereeu mai poua tonu rei iatuheteso. 10 Iuna sanrei rotu-tu musum ua. Reiso sio pusiso wasoni orueso poe otoe Asia, sio Yahudiu runa sio tamena pusiso, oatinu maunauna rai rerihoni Upuri.
11 Anahatana iuna sima-simana waroni sio onoore panesi tewasi. Iuna sima-simana rai pusu Paulus. 12 Paulus ne nipae sinte wani iasamau uai anoe tanui te ne nipae wani inene ahai tanui, sio onanare osi sio kupua, oyo sio kupua iaka runa sakahatena waroni rasuniso raeu rarihoniso.
13 Wasoni sio Yahudiu umau oeu ohori onei sakahatena raeu rarihoni sio wasoni sakahatena rai rasuniso. Sio rei ohete rea Yesus nanai na onei sakahatena oasau sanrei, “Au uaisosia ahokaya tau Yesus waini Paulus iaunauso tanui nanai.” 14 Ia imam onate waini nanai Skewa ne hehuka hanaia, sio itu. Sio ouna sanrei oi. 15 Ne ia sakahatene wani sio nanie oneiki rei, ereasau sanrei, “Yesus, au uationai. Paulus oi, au uationai. Ne ano mo, ano seia rei?” 16 Oyo ia waini sakahatene eresuniki rei isomani, oyo inesi ituso. Ihitaso rotu-tu no papita wakihare runa no apata panesi. Oyo oruma sanakuso oarihoni numa rei.
17 Sio Yahudiu runa sio tamena pusiso wasoni orueso poe Efesus oatinu tau rei, oyo okaitau hun ruao. Reiso Upuri Yesus nanai, sio oamuirai. 18 Sio panesi wasoni oparisaa tau Yesus nea ohokaso, oyo oamanaku no kahatena na sio panesi oatinu. 19 Sio wasoni naone ouna pakakasi oamanou no surata pakakasi rai, oyo oakanupure. Oakanupure na sio panesi oasumata. Surata rai nene hunonia mainaya. Pusire sani sanaa inata nihu hutu nima. 20 Reiso sio oaunau sio panesi honu runa maunaune rerihoni Upuri Yesus runa sio panesi opusui ia-ia.
21 Areimo sanrei, oyo Paulus iapamata sou pusu Anahatana Ne Inaha nanie ieui sui otoe Makedonia runa otoe Akhaya rotu-tu ihokai roe kota Yerusalem. Iasau, “Mka au uhokaku roe Yerusalem, oyo kahurae ueuku roe kota Roma oi.” 22 Reiso iaisosi ne makahaia ua. Sio reimo wasoni Timotius runa Erastus. Iaisosiso poe Makedonia, oyo ia ruai iruei mkane honu poe otoe Asia.
Sio Ouna Purie Poe Kota Efesus
23 Tau muie rei sio umau ouna purie mainae poe kota Efesus. Tau sae, sio openeso tau Paulus ne maunauna rerihoni sapani na Anahatana iapuheuta na iamahaita rotu-tu ria supani pusu Yesus. 24 Poe kota rei, ia tukane sanaa (sanaa, nooi sani hunahane ne putie) isa nanai Demetrius waipo. Inana numa ikina osi sio no anahatana wani titue tewa nanae Artemis. Noore sani Artemis ne numa mainae. Sio mamnana numa ikina rei oahenire, oyo osupu kepeni panesi. 25 Ianaha runa sio mamnana numa ikina rei pusiso runa sio tukana sanaa tamena, oyo iasau osiso, “Wea kakau, wea waniu. Omi oanei ata ita isupu kepeni panesi rerihoni re tanei rei. 26 Ne omi ruamo onoo runa oatinu nea ata Paulus reini mo, iuna sio oparisaa ata anahatanau waroni sio onanare tau hanao waroni titue tewa. Iapamanu sio panesi mai Efesus ruae runa sio panesi sui otoe Asia pusiki oi. 27 Reiso mka sio omakania ita re tanei. Ne erenesi rei, mka sio oahata Artemis ia aihuhue ne numa wani mainae tewa nea. Mka sio ouna Artemis, wani sio pusiso mai Asia runa tuniai reini pusiki oainaa runai, mka sio ounai eremnahui.”
28 Sio oatinu tau rei, oyo anoo rasaa, oyo oaka-kapona, “Arue nai-naia Artemis, ita Efesus re anahatana!” 29 Oyo sio rei runa sio panesi honu oeu ouna purie sui kota rei. Sio osota Gayus runa Aristarkhus, sio Makedoniau wasoni oeu okata Paulus, oyo onesa uaso. Oyo pusiso oamanouso tau osa orumaso roe tihue wani sio hutua pani kota rei oamanouso tanui. 30 Paulus nanie inusu ipusu sio hutue rei na ianamana inete ruai tau sio. Ne sio mampusua osopoi. 31 Sio onata umau tau otoe Asia oi oaisosi sio umau na oasau osiki na pene ieui roe sio hutue rei. Sio onata rei wasoni Paulus ne netau. 32 Areimo sanrei, oyo sio hutue ouna purie. Ia isa iakapona sanrei, oyo ia isa iakapona tamene. Tau sae, sio oanei tewa sio hutue wasoni oamanouso tau sarei. Hasae opusu sio wasoni ouna purie mani. Oarinii tewa. 33 Sio Yahudiu oruru Aleksander roe uae iamanane sio hutue na ianamana tau sio pusiso. Sio oaunaui rerihoni mka iasau sapani. Reiso Aleksander isopa hanai na sio hutue oamaturuso, nanie ianamana inete ruai runa sio Yahudiu pusiso tau sio hutue rei. Nanie iasau osiso ata ia runa sio Yahudiu okata Paulus tewa. 34 Ne sio hutue onoo ata ia Yahudi, oyo oaka-kapona nioo osa rotu-tu yam ua sanrei, “Arue nai-naia Artemis, ita Efesus re anahatana!”
35 Oyo ia sekretaris tau kota rei iuna sio hutue rei oamaturuso. Oyo iasau osiso, “Omi Efesus! Sio pusiso oanei ata ita mai Efesus osaka Artemis ia aihuhue ne numa runa hatu monne wani eremnahui on roe nante, tea? 36 Reiso ia seia mka iauhaa ata titue? Reiso oamaturumo. Pene ouna sae isa oarinii tewasi. 37 Sio ua rei, omi ororiso mai rei. Aikee okimanaka api monne rerihoni ne numa tewa. Oanamana kahatene rerihoni re anahatana rei tewa. 38 Munata Demetrius runa sio tukana sanaa tamena nanie oamanaru ia isa, kahurae sio oapusaa parakana noi sio no kawasa oapasanai. Sio ohete umetena nea na sio oatinu tau parakanau. Sio no kawasa oapasana wasoni. 39 Ne munata omi nanie oakarupu honu, kahurae sio oapamata sou tau loue pannuhu sio onata wasoni no kawasa oamanouso. 40 Tau sae, omi ouna purie sani sinasi rei, mka ita mtinte. Sio onata wasoni no kawasa tau ita mka oasau ata ami atapimo na ouna purie. Ne ami mka aasau sapani?” 41 Iasau sanrei, oyo iaisosi sio hutue rei onuniso.