Tìmɔ̀téè Pɔkàcecetá 5

Weèdɔɔ̀pa pa̰á̰ma pa tɔɔ̀pa yìhìka.

¹ A dá haàta kpeéma dakpɛ̰́ǹn, àmá ò teń yɔkàma é n'yònà ò yòǹ-ma a báàa. Á teń dapàm̀ma é n'yònà pà yòǹ-ma a kúcàpa. ² Mɛ̀ɛ té teń pokpɛ̰́m̀ma é n'yònà pà yòǹ-ma a mààpa, poòpa mɛ̀m̀pà pú kpɛ̰́ń-pa é n'yònà pà yòǹ-ma a potɔ̰ɔ̰̀pa. Héé k'àa yàma é n'dɛ́hi pa yìhìka.

³ Ní n'wisí sukú kpíipoòti, kpíipoòti mɛ̀ǹtì péé-ti ti cɔ̰́ɔ̰̀di kú dàkà. ⁴ Àmá, kà kpíipoòku káá bííhí yoo yaàbíiká, mɛnhí-dà yònà é biɔha, hì kó hḭmpú é cedí é púsí hi hɔ̰́ɔ̰́tà-kpɛ́ɛpá. Ma kú bookú-dà hì kó bodá-ma hi báàpa yoo hi báàkpɛ̰́m̀ma de hì pa̰à̰-sa. Mií-dà mɛ̀ɛ sudi Weèdi yìhìka. ⁵ Kpíipoòku mɛ̀ǹkù péé-ku ku cɔ̰́ɔ̰̀di, è kɔ́ɔ́ mɛ̀ǹǹ kó kù púsí-ko hɔ̰́ taàa ku daḿma Weèdi hḭ́ǹka-dà. Yèǹka nà wèǹku, kù hɔ̰́ nì n'yún è cɔɔ̀hu ni tempàma-dà. ⁶ Àmá, kpíipoòku mɛ̀ǹkù pa̰kú-ku kù kpɛ̀i-sá, kù kpíi-í-ma bá kà kù fòù. ⁷ Mií-dà a yònà é pà biɔhàna-má, k'yé teha kà nìpa dá dɛ́há kpákpààsa yècḭ́ḭ̀ pa hḭ́ǹka é n'wɛì. ⁸ Kà nìi pú púsí o hɔ̰́ɔ̰́tà-kpɛɛpá, o báàpa mɔ́ń-mɔ́mpá kú dàkà, ye yaǹn wɛ́i Weèdi cɔ̀ku-dà. O kpɛ́ɛsá pɛtà-á-ma-ní, é ha̰tá-nà mɛ̀ǹǹ pú dɔń-ko Weèdi. ⁹ K'à kó wa̰à̰ta kpíipoòku yèdi, kpíipoòti mɛ̀ǹtì sànà-ti tempàma yèka mɛhɛká, k'á hédá kà ku beeká é yɔ̀ɔ púkɔɔ̀ kpɛ́ɛmá. Kù mɛ̀ɛ de yònà é n'yan dɔɔ̀o òcɔ̰́-dà pɔ́pɔ́ú. ¹⁰ Nìpa mɛ̀ɛ yònà é n'yá̰á̰-ma kù pa̰à̰-sa wɛǹni k'yè sudi. Pà yònà é yá̰á̰-ma kà kù woháà ku bííhí sukú, kà kù coní cà̰m̀ma ku hɔ̰́ɔ̰̀ta mɛhɛká, kà kù coní ku weèdɔɔ̀tɔ̀pa sukú, kà kù tempú-nà nántepá, kà kù pa̰à̰ pa̰á̰ma tɔɔ̀ma wɛǹni kà mà sudi. ¹¹ Àmá, a dá taàa kpíipoòti yèka mɛhɛká mɛ̀ǹtì káà pàǹti-tí, è yá̰á̰ yè kó tì dodí tḭ́ń wɔ̀ni è yɔ̀ tí tṵ́má tódá daapá, tì kó bútá-ma-hɔ̰ Kídísì dàhàka. ¹² Ye wɔ̀ni, ta̰kadáma cecemá tì de tódà-ma o yìhìka, mà tɔ̰̀tà-á-dà kà tí hḭn yetáti. ¹³ Tṵ́màkaà, tì pú hɔ̰́ n'káá yècḭ́ḭ̀ tì pa̰kú-sa, ye wɔ̀ni è té n'dɛ̀i hɔ̰́ɔ̰̀ta nà ta tɔɔ̀ta. Mɛma bààsí, tì hɔ̰́ tṵ́má n'dɛ̀i nà dɔ́dɔ́ɔ́kú-dà è pú sɔnì yècḭ́ḭ̀, è wɛì mìì pú tì wáń-sa hḭ́ǹka. ¹⁴ Ye kú kpɛ́mú-dà tee n kpɛ̀i-má, kà kpíipoòti mɛ̀ǹtì káà pàǹti-ti é tóńka daapá, é pɛha bííhí, é púsí ti hɔ̰́ɔ̰́hí. Mɛma, tì pú kó pa̰a̰ bòdi ti kà̰à̰tɔɔ̀pa, kà pá n'wɛì kpákpààma ti hḭ́ǹka. ¹⁵ N wɛì miya̰ mìì tee-sá, kpíipoòti tìcɔ̰́ yɔ̀ɔ péé-pu-dà, è wɛ́i Weèdi cɔ̀ku, è tṵ̀n Wɛɛ̀kupá wódo. ¹⁶ Kà poòo yòǹ weèdɔɔ̀o, è káá kpíipoòti o hɔ̰́ɔ̰̀ta mɛhɛká, ò yònà é tì n'tempú-nà-á-ma. Mɛma, tì koò pú kó n'yòǹ totodí weèdɔɔ̀pa hòǹhòni, ye wɔ̀ni kà nì ní n'tempú-nà kpíipoòti mɛ̀ǹtì péé-ti ti cɔ̰́ɔ̰̀di.

¹⁷ Weèdɔɔ̀-kpɛ̰́m̀ma mɛ̀m̀pà nihí-pa weèdɔɔ̀-hòǹhòni sukú, nɛ yònà é pà n'bopù cɔ̀ku màdɛ́ɛ́-dà, mɛ̀m̀pà wéní-pa è cakú Weèdi wɛmá è mà biɔhànì, pa kú dàkà. ¹⁸ Múńdìkaà pà wà̰tà Weèdi pɔ̀kàta mɛhɛká è yɔ̀: Pà pú hɔ̰́ bowá nàfa mɛ̀ǹfà dehú-fa nùdi è yɔ̀ fà dá kṵmpa yɔ̀ka. Pà tṵ́mà wà̰tà è yɔ̀: Tɔntɔǹn sànà o boutí-dà. ¹⁹ Dá teha pṵ́ṵ́ma pà kó kɔ̰́ɔ̰́-ma weèdɔɔ̀-nàmɔ̀ni kpɛ́ǹn, kà nìpa pú tɛ̀i pàdɛ́ɛ́ yoo pàta̰a̰ é dɛ́há ye pa̰á̰ma. ²⁰ Kà mɛ̀ǹǹ pa̰à̰ sḭ̀ḭ̀ma, k'á ò caka nìpa wɛǹni yìhìka, k'yé teha kà wantafɔ̰̀di é cɛ̰ɛ̰́ tɔɔ̀pa, kà pà mɛ̀ɛ té dá mà pa̰ná. ²¹ Ǹtɛ m'a cɔɔ̀hu-sá tenten Weèdi yìhìka, nà Sèsí-Kídísì yìhìka, nà Weèdi tɔntɔntipá yìhìka: Tṵṵ̀na m'a hḭ́mpú nà coóma, a dá m'bahù nìpa. ²² A dá sɛ̰ɛ̰̀dà é cɔ̰ná a nɔ̀hì òcɔ̰́ǹ kú hḭ́ǹka óò púká tɔmú weèdɔɔ̀-nàmɔ̀ni mɛhɛká. A mɛ̀ɛ dá mɛ́ná a cɔ̰́ɔ̰̀di tɔɔ̀pa sḭ̀ḭ̀ma mɛhɛká. Púsí a cɔ̰́ɔ̰̀di é n'weni.

²³ A dá n'yɔ̰ǹ nɛ́ɛmá cɔ̰́ɔ̰̀di, àmá a té yà̰à̰ dìfɛ̰́ɛ̰̀ cɛ̰́masí k'yé tempa-nà a mɛkadɔnkú, mìì tee-sá a hɔ̰́ m'mɔkàta wɔ̀ka wɛǹni-dà.

²⁴ Nìpa pàcɔ̰́ kú sḭ̀ḭ̀ma hɔ̰́ n'foó-ma, kà pá nɛɛ́ pà síi-nà. Tɔɔ̀pa mɛ̀ɛkà, yè hɔ̰́ m'péé-péé-ma kà pá nɛɛ́ mà bantá. ²⁵ Ma cɔ̰́ɔ̰̀di-dà nà tɔnsuuná. Pà hɔ̰́ nà dɛ́há-ma feǹ-fem̀ma, bá pà pú dìi-ná sá̰ńsá̰kù, nà pú kó nɛɛ́ n'sɔ̀ɔ-sɔ̀di.