Títì 1

Pɔ̀kàta Pɔ́dì wà̰haà-ta Títì

Dɔɔ̀mu.

¹ Mmí Pɔ́dì, Weèdi deho kà n yòǹ Sèsí-Kídísì tɔntɔndikó, mmí-d'àà wà̰hu ye pɔ̀kàtà mɛntà-ní. Weèdi-dà n tɔn è yɔ̀ ń pa̰á̰ ni tɔmú kà nì ta̰kadà-pa é tɛ̀ni dandaní cɔ̀ku mɛhɛká. Nì kpɛ̀i ń hédá kà pá yá̰dá wɛbeèdi-dà, k'yé teha kà pá n'fòù Weèdi kpɛ̀kaàma. ² Mɛma, pà kó nɛɛ́ n'káá-ma daḿma fòùmu mɛ̀mù bá yɔ̀ɔ-pú hḭ́ǹka. Weèdi mɛ̀nì pú báńtí-di, mɛní-dà ti hḭ́nà nùdi k'yè dɛu è yɔ̀ nì kó ti pa̰a̰ ye fòùmù-ní. ³ Wɔ̀ni tɛ̀i-má, kà Weèdi ti Fḭ́hìnɔ é hédá kà nìpa é yá̰dá ni wɛnaamá nà wɛmá nì n kɔ̰́ɔ̰̀-ma è yɔ̀ ń mà caka. ⁴ Mmí-d'àà wà̰hu ye pɔ̀kàtà-ní Títì. A yòǹ n bíimɔ́ntá-dà nà dandaní ti múń-di kpɛ́mú. Ti Báàa Weèdi, nà ti Fíhìnɔ Sèsí-Kídísì áa kóná, áa pa̰a̰ wɛ̀ɛ̀di.

Weèdɔɔ̀-nàmɔ̀ni kpɛ̰́ǹn fòùnu yònà é n'yòm̀pu.

⁵ M'a hédà Kɛ́dɛ́tì teǹka mɛhɛká, è kpɛ̀i á dehà é dɔ̀hà niìi mìì kaá-sa-dà è yònà é dɔ̀hà. Yɔtí bá mɛ̀ǹtì dɛ̀ɛ̀-ti mɛhɛká, a yònà é ta̰kadá weèdɔɔ̀-nàmɔ̀ka kpɛ̰́m̀ma-dà. Á deǹta n d'aa cakáà-sa wɛǹni ye kú hḭ́ǹka. ⁶ Kà nìi nɛɛ́ hḭn weèdɔɔ̀-kpɛ̰́ǹn, o fòùmu yònà é n'suu-ú-ma. Ò yònà é n'káá poòo òcɔ̰́-dà. O bííhí mɛ̀ɛ yònà é n'yòǹ weèdɔɔ̀pa-dà. Pà pú yònà é hì n'kɔǹ-nà pa̰á̰kpákpààma màcɔ̰́mà kú hḭ́ǹka yoo hi topúyoutí hḭ́ǹka.

⁷ Weèdɔɔ̀-nàmɔ̀ni yìkàǹyìdo tɔmú-dà héé ó n'wisí mìì kú wɛnnì yòǹ-sa Weèdi kpɛ́ɛsá. Ye kú kpɛ́mú-dà tee o fòùmu yònà é n'suu-má. Ò pú yònà é n'káá fóńfóǹti, yoo fɔ̰́ɔ̰́di. Ò mɛ̀ɛ pú yònà é n'yòǹ naàyà̰do yoo é n'káá kɔ̰ɔ̰̀ka. Ò pú yònà é m'pɛnti dící kpákpààma mɛhɛká.

⁸ Ò yònà é n'coní nìpa-dà sukú o hɔ̰́ɔ̰̀ta mɛhɛká, é n'naanà suumá. Ò yònà n'káá yaǹfòùma-dà, é n'coó, é n'weni o pa̰á̰ma mɛhɛká, é n'nɔn è cɛ̰hú o cɔ̰́ɔ̰̀di. ⁹ Ò yònà é m'púsí tenten wɛmá ò yèkaà-ma-dà kà mà yòǹ wɛmɔ́ma, è tṵ́mà nɔɔ̀-nà t'oò biɔhànà-sa. Mɛma, ò kó nɛɛ́-ma é biɔhàna tɔɔ̀pa k'yé n'coó, é yahikàna pa wɔ̰̀ǹti, é bɛka mɛ̀m̀pà mà yení-pa yetáka.

¹⁰ M'a cakú miya̰ mìì tee-sá, nìpa dɔ́ɔ́di-dà péé è yení wɛbeèdi. Ye yam̀ma mɛ̀ɛ péé Sùwífùpa mɛ̀m̀pà hḭn-pá weèdɔɔ̀pa cɔhɔ̀ka-dà. Pà càu è cakàta mɛ̀ǹtì kɔ́ɔ́-ti-dà. ¹¹ A yònà é kpená-ma pa nùka, mìì tee-sá pà biɔhànì mìì pú yònà é biɔhàna-sá-dà, è kɔkapú hɔ̰́ɔ̰́hí mummun, è bɔ̀hɔ̀ta dící kpákpààma mɛhɛká. ¹² P'oòcɔ̰́, kà p'òò tóńkú pa wɛtɛ̰́náko, dà de hḭ́n è yɔ̀: Kɛ́dɛ́tì yam̀ma yòǹ nuǹhetí yam̀ma nà yenì dɔ. Pà tohi è yònà nɔtí-dà, dóúcí kà cì màhu ci piidí cɔ̰́ɔ̰̀di kpɛ́mú. ¹³ Ò cakáà-sa pa hḭ́ǹka yòǹ bemú-dà. Ye kú kpɛ́mú-dà tee a yònà é pà tɛ̰́ná-ma-ní cɔɔ̀suukú hḭ́ǹka nà nɔǹhṵɛ̰fá, k'yé teha kà pá n'dań k'yè coó, ¹⁴ kà pà dá yetá m'bekù Sùwífùpa cakàta-sá k'yè yòǹ hoǹcí. Pà mɛ̀ɛ pú yònà é tṵṵ̀na nìpa mɛ̀m̀pà yeéè-pa wɛbeèdi kú kpɛ̰́ńtìnùka. ¹⁵ Nìpa mɛ̀m̀pà weni-pá Weèdi yìhìka kú pesá, niìi wɛǹni weni-í-ma. Àmá mɛ̀m̀pà pú weni-pá è tṵ́mà pú dań, pa kú pesá, yècḭ́ḭ̀ pú weni. Pa yàma nà pa yam̀màhàka péé yɔ̰́káma mɛhɛká-dà. ¹⁶ Pà cakú è yɔ̀ pà yá̰á̰-ma Weèdi, àmá pa pa̰á̰ma-dà bɛkú è yɔ̀ pà pú nì yá̰á̰. Pà sànà yɔ̰́sàma-dà, pà pú you toòka nà nìdì, pà mɛ̀ɛ pú kó nɛɛ́ pa̰á̰ suumá màcɔ̰́mà.