Tìmɔ̀téè Pɔkàdɛ́ɛ̀ta i

Pɔ̀kàta Pɔ́dì wà̰haà-ta Tìmɔ̀téè

Cetá Kam̀má

Pɔ̀kàtà mɛntà yòǹ Pɔ́dì pɔkàdɛ́ɛ̀ta-dà ò wà̰haà-ta Tìmɔ̀téè. Ò de tà n'ɔ̀ɔ̀ wà̰haà è péé Kóodeedí mɛhɛká-dà Hɔ̀dɔ́m̀ yɔtí. Weèdi wɛmá kpɛ́mú-dà mɛ̀ɛ tee pà de ò cɛ̰ɛ̰́-ma óò yɛ̰̀ḭ kóodeedí, k'òo dóòpa dɔ́ɔ́di óò wɛ́í, o dóópo dòkòtódo Dúkì cɔ̰́ɔ̰̀di bààsí. Pɔ́dì de yá̰á̰-ma è yɔ̀ o kṵ́mú wɔ̀ni-dà tɛ̀i, pà k'óò kɔ̀ù-ú-ma, o pɔkàdèǹdèǹta-dà ò wà̰hu-má ye pesà-ní Tìmɔ̀téè. Mɛmá-dà tee k'ò tà n'ɔ̀ɔ̀ wà̰hu è kpɛ̀i óò cɔwa. Ò de tṵ́mà kpɛ̀i é yahikàna o wɔ̰̀ǹti-dà, é tṵ́má óò teń ò yònà é púsí-ma kú bookú Weèdi dehèmu. Tɔɔ̀sa ò de bɔhɔ̀ta-sá-dà héé, o bíidɔ́kàta Tìmɔ̀téè óò hɔ̰́tá-ní feǹ-fem̀ma Hɔ̀dɔ́m̀ yɔtí, k'óò dɛ́há o dèǹdèma é nɛɛ́ kpíí.

Ye pɔ̀kàta mɛhɛká, ò de cedí yahikàna Tìmɔ̀téè wɔ̰̀ǹti-dà Weèdi tɔmú hḭ́ǹka, è yɔ̀ ó n'káá dandaní é n'yònà mɛnń, ó ta̰á̰ taà̰pu mɔ́mmú. Ye kú dàhàka, k'óò teń ò yònà é hḭmpú é yeda niìkpákpààpa biɔhànamá weèdɔɔ̀-nàmɔ̀ni mɛhɛká, é yídá óò caka mìì tee-sá k'ò kpɛ̀i ó tɛ̀ni óò dɛ́há Hɔ̀dɔ́m̀ yɔtí mɛhɛká. K'ó deǹta óò caka y'òò yòm̀pu-ho ka bɛ́ka.

Ǹtɛ ye pɔ̀kàta wɛmá tṵ̀nkaàma ma tɔɔ̀ma:

Tm-d 1.1-2 : Dɔɔ̀mu.

Tm-d 1.3-18 : Pɔ́dì yahikànì Tìmɔ̀téè wɔ̰̀ǹti.

Tm-d 2.1-26 : Pɔ́dì teǹ mɛ̀m̀pà kú wɛnnì yòǹ-pa Kídísì ta̰nìpa.

Tm-d 3.1-17 : Nìpa kó n'yòm̀pu dadèǹdèka mɛhɛká.

Tm-d 4.1-22 : Pɔ́dì wɛdèǹdèma.