Tìmɔ̀téè Pɔkàdɛ́ɛ̀ta 1

Pɔ̀kàta Pɔ́dì wà̰haà-ta Tìmɔ̀téè

Dɔɔ̀mu

¹ Mmí Pɔ́dì, Weèdi-dà kpɛ̀i kà n yòǹ-nà Sèsí-Kídísì tɔntɔndikó. Mɛní-dà mɛ̀ɛ n tɔn è yɔ̀ ń caka nìpa, fòùmu Weèdi hḭ́nà nùdi è yɔ̀ nì kó kɔ̰́ɔ̰́-pu mɛ̀m̀pà tásí-nà-pa Sèsí-Kídísì.

² Tìmɔ̀téè, n bíidɔ́kàta mɔ́ntá, fɔ̰́ń-dà n wa̰à̰hu-má ye pɔ̀kàtà-ní. Ti Báàa Weèdi, nà ti Teó Sèsí-Kídísì áa pa̰a̰ pa̰á̰suumá, nà nánkɔḿma, nà wɛ̀ɛ̀di.

Pɔ́dì yahikanì Tìmɔ̀téè wɔ̰̀ǹti.

³ N sɛɛ́ Weèdi n púsí-di kú tɔmú nà yàma màcɔ̰́, é n'yònà n yààpa de hḭmpú. Yèǹka nà wèǹku, n weèdɔɔ̀mu mɛhɛká, n hɔ̰́ deǹta-á-ma a kpɛ́mú. ⁴ N dèn-ń-ma n d'aa yíti-má k'á hódí-ma kú bookú, ye kú kpɛ́mú-dà tee yè n dodì-ma è yɔ̀ ń tṵ́má áa dɛ́há k'yé teha kà yaǹnaakú é n sṵ́ná. ⁵ N káà dèn-ń-ma a káá-ma dandaní mɔ́nní Sèsí-Kídísì hḭ́ǹka. Ni kú tɔɔ̀di-dà a yṵṵ̀kpɛ̰́ǹn Dòísì n'àa yṵṵ́ Ènísì de káá-ma. N yá̰á̰-ma dɛ́dɛ́í è yɔ̀ mɛní-dà a mɛ̀ɛ té káá-ma. ⁶ Ye kú kpɛ́mú-dà tee m'a cakú-ma è yɔ̀, á hédá kà pa̰dí Weèdi a pɛ̰ḭ-dí é n'fòù a mɛhɛká. Weèdi nì n'àà pɛ̰ḭ, n de cɔ̰nà tḭ́ń daadí-dà n nɔ̀hi a hḭ́ǹka. ⁷ A dá n'wani, mìì tee-sá Sèdi Weèdi ti pɛ̰ḭ-dí pú ti kpáhìnì wantanfɔ̰̀ka yam̀ma. Múńdìkaà, nì hɔ̰́ ti pa̰a̰ kpeèti-dà, nà dɔ́kàma, nà cɔ̰́ɔ̰̀di cɛ̰ɛ̰́ma.

⁸ Ye kú kpɛ́mú, a dá n'káá fɛ̀ci n'àa kó caka-má Teó wɛmá. A mɛ̀ɛ dá n'káá fɛ̀ci nà mmí mɛ̀ǹǹ yòǹ-ko kpenáku n'ɔ̀ɔ kpɛ́mú. Múńdìkaà, pɛ́ɛ́ n dii-nà náńkú nà Weèdi wɛnaamá kpɛ́mú, é n'dań kpeèti Weèdi a pɛ̰ḭ-tí. ⁹ Weèdi-dà ti fḭ́hínà, é ti yíí kà ti yòǹ ni kpɛ́ɛpá. Nì pú pa̰à̰ miya̰ è yɔ̀pu kpɛ́mú ti pa̰á̰ma sudi, àmá nì hḭn mɛma ni pa̰á̰suumá kpɛ́mú-dà kà nì tṵ́mà de yè dɔà. Nì ti pɛ̰ḭ ye kú pa̰á̰suumà, nà Sèsí-Kídísì kpɛ́mú-dà, kà fòùku mun pú cetà. ¹⁰ Wɔ̀nì mɛnì-ní, nì fohìnà-á-ma ye pa̰dí nà ti Fḭ́hìnɔ Sèsí-Kídísì tɛ̀ni-má-ní. Mɛnń-dà nɛdà kṵ́mú kpeèti, é bɛka è yɔ̀ kà ti teháà Weèdi wɛnaamá, ti kó dɛ́tá-ma fòùmu mɛ̀mù bá yɔ̀ɔ-pú.

¹¹ Weèdi n ta̰kadà è yɔ̀ ń caka ye kú wɛnaamà-dà, ye kú kpɛ́mú-dà tee kà ní n hḭ́ná kà n yòǹ Sèsíì tɔntɔndikó, è mà biɔhànì. ¹² Ye kú kpɛ́mú-dà tee kà n yon náńkù mɛnkù. Àmá n p'éè káá-nà fɛ̀ci, mìì tee-sá n yá̰á̰-ma n dań-ko. N mɛ̀ɛ yá̰á̰-ma dɛ́dɛ́í è yɔ̀ ò káá kpeèti è kó nɛɛ́ púsí ò n kɔ̰́ɔ̰̀-sa, háá dadèǹdèni daadí. ¹³ Tódá wɛmá m'a cakáà-ma kà mà yòǹ wɛbeèdi, é n'yḭnkù ma hḭ́ǹka. Á yḭncí ma hḭ́ǹka nà dandaní mɛ̀nì péé-nà-di-ní Sèsí-Kídísì pesá, nà dɔ́kàma mɛ̀mà péé-ma o mɛhɛká. ¹⁴ Púsí sukú biɔhànasuumá t'aa biɔhànà-ma, nà Weèdi Sèdi mɛ̀nì péé-di ti mɛhɛká kú tempàma.

¹⁵ A yá̰á̰-ma, è yɔ̀ Àsíì Tempáàku weèdɔɔ̀pa n wɛ́i pa wɛǹni, pa mɛhɛká kà Fìsɛ́dì nà Hɛ̀mɔ̀sɛ́nì péé. ¹⁶ Weèdi é bɛka ni pa̰á̰suumá Ònɛ̀sìfɔ́ɔ̀ hɔ̰́ɔ̰́tà kpɛ́ɛpá wɛǹni hḭ́ǹka, mìì tee-sá ò yahikànì n wɔ̰̀ǹti wɔ̀ka wɛǹni. Yè p'óò yòǹ-nà fɛ̀ci nà n péé-ma kódeedí mɛhɛká. ¹⁷ Múńdìkaà, ò tɛ̀ni-má-ní Hɔ̀dɔ́m̀ yɔtí mɛhɛká, é dɛɛ̀da é n pɛha-á-ma tenten háá é yɔ̀ɔ n dɛ́tá. ¹⁸ Teó Sèsíì é héé k'ó dɛ́tá Weèdi pa̰á̰suumá Sídàma daadí. A mɔ́nń yá̰á̰-ma dɛ́dɛ́í tɔná ò pa̰à̰-na wɛǹni n kpɛ́mú Èfɛ́sì yɔtí mɛhɛká.