Tìmɔ̀téè Pɔkàdɛ́ɛ̀ta 2

Ní n'yòǹ Sèsí-Kídísì sóso mɔ́nń.

¹ Fɔ̰́ń n bidà, hédá kà pa̰á̰suumá mɛ̀mà péé-nà-ma-ní Sèsí-Kídísì pesá é dɔ̀hà áa pa̰a̰ kpeèti. ² A mɛ̀ɛ yeèkaà ká n caka-sá nìpa dɔ́ɔ́di yìhìka, mɛ̀ɛ té yè caka nìpa a dań-pa kú hḭ́ǹka, mɛ̀m̀pà mɛ̀ɛ té kó nɛɛ́-pa é yè biɔhàna tɔɔ̀pa.

³ Mɛ̀ɛ té dii náńkú é n'yònà mmí, Sèsí-Kídísì sóso mɔ́nń yònà é dii-kú. ⁴ Sóso pú hɔ̰́ m'péé ta̰yɛ̀di mɛhɛká, é n'kpɛ̀i é nakàna o dakpɛ̰́ǹn yàma, é tṵ́má é n'wisí mìì pú yòǹ-sa sósìma tɔɔ̀sa yècḭ́ḭ̀. ⁵ Kà nìi kó cocí ta̰ndánɔ́ɔdí, è pú cocí yè békú-ma kú bookú, ò pú kó nɛɛ́ nì tódá. ⁶ Ka̰ǹká̰ńto mɛ̀ǹǹ ká̰tà-ko wìku-dà, yònà é n'yòǹ cecedó é dii dipàǹti. ⁷ Mahà sukú m'a cakú-sà kú hḭ́ǹka, Teó k'áa tempanà-á-ma k'á yè yèkà ye wɛnnì.

⁸ Ní n'dèn Sèsí-Kídísì kpɛ́mú, Dàfítì yaàbíidí, ò yá̰ńtà-á-ma kpíípa mɛhɛká é n'yònà wɛnaamá n cakú-ma hḭ́mpú. ⁹ Ye wɛnaamá kpɛ́mú-dà tee kà n yon náńkú, háá è yɔɔ̀ péé dákáti mɛhɛká è yònà n yòǹ-ma niìkpákpàdo. Há̰kà, Weèdi wɛmá mɛma pú dásí. ¹⁰ Ye kú kpɛ́mú-dà tee n teháà-ma ye kú niì wɛǹni n hḭ́ǹka, nà Weèdi ta̰kadà-pa kpɛ́mú, k'yé teha kà pà mɛ̀ɛ té dɛ́tá fḭ́hìnamá mɛ̀mà péé-ma Sèsí-Kídísì mɛhɛká nà wɛhimú mɛ̀mù kɔ́ɔ́-pu yɔ̀ɔmá. ¹¹ Wɛmà mɛmà yòǹ wɛbeèdi-dà:

Kà ti pɛ́ɛ̀ è kpíi-nà Kídísì,

ti kó pɛ́ɛ́ óò n'fòù-nà-á-ma.

¹² Kà ti pa̰à̰ wɛ̰́ɛ̰́ma náńkú mɛhɛká,

ti mɛ̀ɛ té kó wáńtá pɛ́ɛ́ óò wódí-nà-á-ma.

Àmá kà ti nɔhì è hḭ́n ti p'óò yá̰á̰,

ò mɛ̀ɛ té kó wáńtá nɔ̀hì-í-ma è yɔ̀ ò pú ti yá̰á̰.

¹³ Kà ti pú cɔ́dí,

mɛnn cɔ́dí-ma,

è yá̰á̰ ò pú kó nɛɛ́

é nɔ̀hì o cɔ̰́ɔ̰̀di.

Caka wɛnaamá cóńcodí.

¹⁴ Ní pà n'dehènì pa wɛǹni ye niì m'a cakáà-sà-ní. Pà caka dɛ́dɛ́í Weèdi yìhìka, è yɔ̀ pá héé nɔ̀nɔ̀hicí wɛnɔ̀ka hḭ́ǹka cì pú pà tempú-nà yècḭ́ḭ̀, cì múńtà sèhènì mɛ̀m̀pà pà bekù-pa-dà. ¹⁵ Wɛ̰́dí é n'yòǹ Weèdi kpɛ̀i á n'yòm̀pu ni yìhìka, é n'yòǹ deho nì kó cɔ́dí-ko kú tɔmú kà fɛ̀ci p'óò n'káá, mɛ̀ǹǹ kó n'cakú-ko dɛ́dɛ́í wɛbeèdi wɛmá. ¹⁶ Yentá wɛmá mɛ̀mà yòǹ-ma hécí, è pú nɔɔ̀-nà dandaní kpɛ́ɛmá, mìì tee-sá mɛ̀m̀pà mà naanà-pa hɔ̰́ dɔ̀hà é nátá-nà Weèdi-dà. ¹⁷ Pa wɛmá hɔ̰́ m'piní è yònà cíkpa̰ní-dà mɛ̀nì wɛ̀dì-di. Ye kú nìpa mɛhɛká-dà Hìmɛ̀nɛ́ɛ̀ nà Fìdɛ́tì péé-ma. ¹⁸ Pà nátà-nà-á-ma wɛbeèdi, è cakú è yɔ̀ Weèdi yɔ̀ɔ yá̰hìna-pú-dà kpíípa, ye wɔ̀ni è kɔ̀ùdì nìpa pàcɔ̰́ kú dandaká. ¹⁹ Nà mɛma baàkaà, wɛbeèdi Weèdi hḭ́nà-di kà nì yòǹ makɔ̀dikú káà nɛ̀hi-í-ma tenten. Ǹtɛ pà wà̰tà-sa ye makɔ̀dikú hḭ́ǹka. Pà wà̰tà è yɔ̀: Teó yá̰á̰-ma mɛ̀m̀pà yòǹ-pa o kpɛ́ɛpá. Pà tṵ́mà wà̰tà è yɔ̀: Mɛ̀ǹǹ kú wɛǹni toò-ko ò yòǹ Teó kóoó-dà, ò yònà é nátá-nà-á-ma kpákpààma.

²⁰ Díikáàdo hɔ̰́ɔ̰̀ta mɛhɛká, wúdó caàka nà díimáàti kpɛ́ɛká cɔ̰́ɔ̰̀di baà pú hɔ̰́ yè m'péé, pà kpɛ́háà-ka nà dɛcí hɔ̰́ yè m'péé-ma, kà tá̰à̰ti kpɛ́ɛká yè péé. Kàcɔ̰́ hɔ̰́ n'hḭ́ḭ́ daasàka kpɛ́mú-dà, kà tɔɔ̀ka hḭ́ḭ́ dahécíka kpɛ́mú. ²¹ Yè yòm̀pu-dà nà tḭ́ńti, mɛ̀ǹǹ kú wɛnnì kó wekàna-kó o cɔ̰́ɔ̰̀di kpákpààmà n wɛɛ̀-mà kú wɛnnì mɛhɛkà, ye yaǹn kó n'yònà caadí pà dehú-nà-di-dà daasàdi daadí. Pà k'óò cená-ma o dakpɛ̰́ǹn kpɛ́mú, mìì tee-sá òò tempú-nà, è kó nɛɛ́ pa̰á̰ tɔná wɛǹni kà ná n'sudi. ²² Cocí é nátá-nà dapàǹku bìnɔ kpɛ́ɛsá wɛǹni. Ní m'bɔhɔ̀ta mìì héé-sa coóma, nà dandaní, nà dɔ́kàma, é m'bɔhɔ̀ta wɛ̀ɛ̀di nà mɛ̀m̀pà yún-pá Teó nà yaǹwenimá. ²³ Yentá nɔ̀nɔ̀héhécíci yá̰á̰ma kɔ́ɔ́-ci kú mɛhɛká. A yá̰á̰-ma è yɔ̀ cì tɛ̀hu-nà-ní kɔ̰ɔ̰̀ka. ²⁴ Mɛ̀ǹǹ há̰ yòǹ-ko Teó deho pú yònà é n'káá kɔ̰ɔ̰̀ka. Ò yònà é n'dɔ́sí-ma nìpa wɛǹni, é nɔn è biɔhànì, é n'nɔn è minì. ²⁵ Ò yònà é m'biɔhànì mɛ̀m̀pà yení-pa o wɛmá nà yaǹyɔ̀kàm̀ma-dà. Nìì pú hɔ̰́ n'yá̰á̰, Weèdi kó nɛɛ́-ma é peǹta pa yàma kà pá yá̰dá wɛbeèdi. ²⁶ Ye wɔ̀ni kà pa yàm̀màhàka é yɛɛ̀ni Wɛɛ̀ko máàka mɛ̀ǹkà de pà púsí-ka mɛhɛká kà pà pa̰kú ò kpɛ̀i-sá, kà pá tón é mahà k'yé n'sudi.