Tìmɔ̀téè Pɔkàdɛ́ɛ̀ta 3

Mìì kó tɛ̀ni-sá-ní dadèǹdèka mɛhɛká.

¹ Á n'yá̰á̰ è yɔ̀ dadèǹdèka mɛhɛká wɔ̀ka kó yɛɛ̀ni-ma-ní é n'dɔn sàma. ² Ka mɛhɛká, nìpa kó m'bɔhɔ̀ta pa kú cɔ̰́ɔ̰̀di kpɛ́ɛsá-dà, é n'dɔ́sí dící, é n'káá hókánáma, nà fóńfóǹti. Pà kó n'teudì-í-ma Weèdi, è pú n'you-nà pa báàpa toòka. Pà pú kó n'dɔń tɔɔ̀pa nà suumá pà pà pa̰kú-ma, pà mɛ̀ɛ pú kó n'kɛɛ̀hi yècḭ́ḭ̀ mìì kú wɛnnì yòǹ-sa Weèdi kpɛ́ɛsá. ³ Pà pú kó n'dɔ́sí bá nà pa hɔ̰́ɔ̰́hí kpɛ́ɛpá, pà kó n'kɔ́ɔ́ séèma. Pà kó n'cɔ̰hú tɔɔ̀pa yèka-dà, pà pú kó n'nɔn è cɛ̰hú pa cɔ̰́ɔ̰̀di, pà kó n'tohi-í-ma, è pú n'naanà suumá. ⁴ Pà kó n'yɛɛ́-ma tɔɔ̀pa, é n'káá fóńfóǹti, è té pa̰á̰ niìya̰ nà sɛ̰̀sɛ̰̀ma è pú kó mahà. Pà kó n'naanà pa mɔ́mpá kpɛ̀i-sá-dà é ha̰tá-nà Weèdi. ⁵ Pà kó m'pa̰kú é n'yònà pà yòǹ-ma-dà weèdɔɔ̀pa, àmá è há̰ n'yení mìì héé-sa Weèdi cɔ̀ku kpeèti. Nátá-nà ye kú yammà-ní. ⁶ Pa pàcɔ̰́ dúù-ú-ma hɔ̰́ɔ̰́hí mɛhɛká, nà pa wɛmá è cɛ̰hú pa máàka mɛhɛká, poòpa mɛ̀m̀pà pú kpenì-pa, è péé sḭ̀ḭ̀ma mɛhɛká, è pa̰kàta pa yàma kpɛ̀i-sá wɛǹni. ⁷ Pà bekù wɛmá wɛǹni-dà è kpɛ̀i é yá̰dá, àmá pà pú hɔ̰́ nɛɛ́ é bantá wɛbeèdi. ⁸ É n'yònà Sànɛ́sì nà Sà̰m̀bɛ́sì de yeéè-nà-ma Mɔ̀yísì toòka, ma kú bookú-dà ye nìpà yení-ma wɛbeèdi. Pà yam̀màhàdi-dà bììkaà, kà pa dandaní koò pú yòǹ yècḭ́ḭ̀. ⁹ Àmá pà pú kɔ́dí yècɔ̰́, mìì tee-sá nìpa wɛǹni kó dɛ́há-ma pa fìhikú nùdi, é n'yònà dekáà wɔ̀ni pà de dɛ́káàma Sànɛ́sì nà Sà̰m̀bɛ́sì kpɛ́kú.

Ní m'púsí dɛ́dɛ́í a biɔháà-sa.

¹⁰ Àmá fɔ̰́ń Tìmɔ̀téè, a dɛ́hà-á-ma n biɔhànà-ma kú bookú, é dɛ́há n pa̰á̰ma. A yá̰á̰-ma n de kpɛ̀i é pa̰á̰-sa, è yá̰á̰ n dandaní de yòm̀pu, nà n mùyɔ̰, nà n dɔ́kàma, nà n wɛ̰́ɛ̰́ma. ¹¹ A yá̰á̰-ma fá̰kápàma nà náńkú n dii-kú À̰ǹtíyɔ́sì, nà Ìkòníyɔ́m̀, nà Dísítì yɔtí mɛhɛká. Fá̰kápàma m̀mɔ́ma-dà n pú dɛ́hà-ma? Nà mɛma, kà Teó é n feèda ma wɛǹni mɛhɛká. ¹² Múńdìkaà, mɛ̀m̀pà kú wɛnnì kpɛ̀i é n'fòù-pa è cɔ́dí Sèsí-Kídísì cɔ̀ku mɛhɛká, pà kó pà fá̰kápa-á-ma. ¹³ Àmá niìkpákpààpa nà nuǹhetí yam̀ma kó dɔ̀hà é níḿ-ma kpákpààma mɛhɛká. Pà kó m'báńtí-ma tɔɔ̀pa, pa mɔ́mpá kà pà mɛ̀ɛ té pà m'báńtí. ¹⁴ Fɔ̰́ń há̰kà, púsí tenten a biɔháà-sa éè tà̰ǹta nà yàma màcɔ̰́. Yè púsí, mìì tee-sá a yá̰á̰-ma mɛ̀m̀pà yè n'àà biɔhànà-pa. ¹⁵ N'àa bíkáḿbíikú, a yá̰á̰-ma pà wà̰haà-sa Weèdi pɔ̀kàhi mɛhɛká. Mà kó nɛɛ́ áa kɔ̰́ɔ̰́-ma yaǹfòùma k'á taàa a dandaní Sèsí-Kídísì hḭ́ǹka kà Weèdi mɛ̀ɛ áa fḭ́hìna. ¹⁶ Pà wà̰haà-sa wɛǹni Weèdi pɔ̀kàta mɛhɛká, Weèdi-dà tee kà p'éè wà̰hà. Yè mɛ̀ɛ tempúnà, è biɔhànì wɛbeèdi-dà, è héù kà ti tehú ti yetáka, è ti nadì, è ti biɔhànì ti kó hḭmá n'fòù k'yè coó Weèdi yìhìka. ¹⁷ Mɛma, yè kó dɔ̀hà-á-ma tenten Weèdi nìdo, k'òo sɔ̀do é bii, k'ó m'pa̰kú tɔná mɛ̀nà suu-ná wɛǹni.