Tìmɔ̀téè Pɔkàdɛ́ɛ̀ta 4

¹ M'a cɔɔ̀hu nà n kpeèti wɛǹni, Weèdi yìhìka nà Sèsí-Kídísì mɛ̀ǹǹ kó sída-kó fòùpa nà kpíípa yìhìka, mɛnń mɛ̀ǹǹ pení-ko-ní, è kó fodá è yòǹ wódo, è yɔ̀ ² á caka Weèdi wɛmá, é tṵ́má mà kódí, wɔ̀ni suu yoo nì pú sudi. Mà caka yè békáàma kà nìpa é teha mà hḭ́mpú. Caka mɛ̀m̀pà yetà-pa pa yetáka, yahikàna nìpa wɔ̰̀ǹti, ní pà m'biɔhànì nà mùyɔ̰. ³ Hḭn mɛma mìì tee-sá, Wɔ̀ni-dà pení kà nìpa koò pú kó n'kpɛ̀i é besí biɔhànamá mɔ́mmá. Àmá, pà kó tṵṵ̀na pa yàma kpɛ̀i-sá-dà, ye wɔ̀ni é pɛha pa biɔhànapá dɔ́ɔ́di, kà pá pà n'cakú pà kpɛ̀i é yekà-sa. ⁴ Pà kó kpená pa toòka-dà è pú kpɛ̀i é besí wɛbeèdi, è há̰ té kà fedá é besí wɛmá mɛ̀mà yòǹ-ma hoǹcí. ⁵ Àmá fɔ̰́ń, á n'nɔn è púkù a cɔ̰́ɔ̰̀di niìi wɛǹni mɛhɛká. Toó náńkú mɛ̀ǹkù kó tɛ̀ni-kú-ní a hḭ́ǹka, caka Weèdi wɛnaamá, pa̰á̰ sukú tɔmú Weèdi a kɔ̰́ɔ̰̀-pu.

⁶ Mmí mɛ̀ɛkà, wɔ̀ni-dà tɛ̀i kà pà kó n pa̰á̰ dɔ̀hàdi nɔtá kpɛ́ɛmá Weèdi kpɛ́mú. N kṵ́mú wɔ̀ni-dà tɛ̀i. ⁷ N ta̰á̰ ta̰à̰pu suupú-dà, n yɔ̀ɔ-ɔ́-ma n cokemú, n pú fénà n dandaní. ⁸ Sá̰mà-ní, coóma boutí hḭ́ḭ́-ma è n ceí. Ti Teó mɛ̀ǹǹ sídí-ko k'yè coó, kó wáńtá tì nà n kɔ̰́ɔ̰́-ma sídàma daadí. Yè mɛ̀ɛ pú kó wáńtá n'yòǹ mmí cɔ̰́ɔ̰̀di ò kó tì kɔ̰́ɔ̰́-ma, àmá nà mɛ̀m̀pà kú wɛnnì ceí-pa-dà nà dɔ́kàma o fodáma-ní.

Pɔ́dì kpɛ̀i Tìmɔ̀téè óò hɔ̰́tá-ní.

⁹ Pa̰á̰ wɛ̰́ɛ̰́ma é tɛ̀ni fem̀ma n pesá, ¹⁰ è yá̰á̰ Dèmásì n wɛ́i-í-ma é ka̰há Tɛ̀sàdòníkì yɔtí. Ò naakáà-nà fòùkù mɛnkù kú kpɛ́ɛsá-dà sàma. Kɛ̀dɛ̀sá̰ńsì ka̰hà Kàdàsíì tempáàku, kà Títì mɛnn é ka̰há Dàdìmàsíì kpɛ́kú mɛhɛká. ¹¹ Dúkì cɔ̰́ɔ̰̀di-dà n péé-nà. K'à pení, k'á n'nɔɔ̀nà-ní Mádíkì è yá̰á̰ ò kó n tempanà-á-ma sàma tɔmú mɛhɛká. ¹² N tɔn Tìsíkì mɛnn Èfɛ́sì yɔtí. ¹³ K'à pení, k'á n tóó-ní n sémú tókédi n héè-di Tòdòásì yɔtí, Kààpúsì hɔ̰́ɔ̰̀ta. Á n sɔ̰́ńtá-nà-ní pɔ̀kàhi, dɔcí kpɛ́hí kú dàkà.

¹⁴ Máádo pà yún-kó Àdɛ̀kìsá̰ńtídì, ò n pa̰à̰ kpákpààma-dà sàma. Teó k'óò bodá-ma ò pa̰à̰-sa sànà-sa. ¹⁵ Ò pa̰á̰-nà yɔkàma mɛ̀ɛtékà, mìì tee-sá ò yeéè-é-ma dɛ́dɛ́í ti wɛmá nà nɔǹhṵɛ̰cí.

¹⁶ Pà n yíí-ma cecemá sídàma nahàku, òcɔ̰́ǹ de pú tadí é n tempanà, pa wɛǹni de n wɛ́i-í-ma. Weèdi dá pà kàn ye kú pa̰á̰mà. ¹⁷ Àmá ti Teó mɛnn pú n wɛ́i. Ò pú teháà kà pá n ká̰ńtá càkoodí nùdi mɛhɛká. Ò n pɛ̰ḭ-ḭ́-ma kpeèti ká n caka o wɛnaamá dɛ́dɛ́í, kà mɛ̀m̀pà pú yòǹ-pa wɛǹni Sùwífùpa é mà yèkà. ¹⁸ N mɛ̀ɛ yá̰á̰-ma è yɔ̀ Teó kó n fḭ́hìna pa̰á̰kpákpààma wɛǹni mɛhɛká, é n dontá é n dúùwa o wóòti mɛhɛká. O yèdi é wɛhika k'yé n'kɔ́ɔ́ yɔ̀ɔmá. K'yé mà n'yòǹ.

Dɔɔ̀mu dèǹdèmu.

¹⁹ N dɔɔ-ho Pìdìsíì nà Àkìdásì, nà Ònɛ̀sìfɔ́ɔ̀ hɔ̰́ɔ̰́tà-kpɛ́ɛpá. ²⁰ Ɛ̀dásì cá̰ńtà-ní Kɔ̀dɛ̰́ńtì yɔtí. Tòdòfímù mɛnn mɔn-ń-ma, ká ń ò héé-ní Mìdéè yɔtí. ²¹ Pa̰á̰ wɛ̰́ɛ̰́ma é tɛ̀ni kà sémú wɔ̀ni mun pú tɛ̀ni. Èbùdúsì, nà Pùdɛ́ńsì, nà Dìnúsì, nà Kódódiya, nà weèdɔɔ̀pa tɔɔ̀pa wɛǹni aa dɔń.

²² Ti Teó n'àà m'púsí. O pa̰á̰suumá é nɛ m'péé-nà nɛ wɛǹni.