Tɛ̀sàdòníkìpa Pɔkàdɛ́ɛ̀ta 3

Nɛ́ n'cɔɔ̀hu Weèdi ti kpɛ́mú

¹ Kà tí nɛɛ́ dehà ti wɛmá n kúcàpa nà potɔ̰ɔ̰̀pa-nà, ti nɛ cɔɔ̀hu è yɔ̀ nɛ́ n'dɔń Weèdi ti kpɛ́mú k'yé teha kà Teó wɛmá é pidá fem̀ma, kà nìpa é mà tà̰ǹta é tṵṵ̀na mà hḭ́mpú é n'yònà nɛ hḭmpú. ² Nɛ́ tṵ́má é n'dɔń Weèdi ti kpɛ́mú, è yɔ̀ ní ti feèda niìkpákpààpa mɛkapɛ́ìka yam̀ma nɔ̀hi mɛhɛká, è yá̰á̰ nìpa wɛǹni pú tehú ni wɛmá ti cakú-ma.

³ Ti Teó mɛnn há̰ pú wán o kpɛ́ɛpá. Ò kó nɛ tuɛ̀ha-á-ma kpeèti, é nɛ púsí kà Seúko dá nɛ pḭ́ń. ⁴ Ti Teó-dà tee kà ti dań nɛ hḭ́ǹka. Ti yá̰á̰-ma è yɔ̀ nɛ tṵ̀n ti nɛ cakáà-sa, è mɛ̀ɛ baà kó n'sɔ̰ncí èè tṵ̀n.

⁵ Ti Teó é dɔá nɛ yàma, kà nɛ́ n'dɔ́sí Weèdi, é n'káá mùyɔ̰ é n'yònà Kídísì.

Bá mɛ̀ǹǹ dɛ̀ɛ̀-ko é n'fòù n'ɔ̀ɔ nɔ̀ta tɔmú

⁶ Ti kúcàpa nà ti potɔ̰ɔ̰̀pa-nà, ti nɛ cɔɔ̀hu nà ti Teó Sèsí-Kídísì yèdi-dà, è yɔ̀ nɛ dá pɛ́ɛ́-nà weèdɔɔ̀pa mɛ̀m̀pà kú wɛnnì dóú-pa, è pú tṵ̀n biɔhànamá ti nɛ kɔ̰́ɔ̰̀-ma. ⁷ Nɛ mɔ́mpá, nɛ yá̰á̰-dà sukú nɛ yònà é hḭmpú é tempa ti pa̰á̰ma. Ti de pú péé nɛ cɔhɔ̀ka è yòǹ dóúcí. ⁸ Ti de pú kaàdi wɔ̰m̀bóhití é cɔhà n'ɔɔ̀cɔ̰́ǹ è yɔ̀ ó ti n'diinì fàdà. Múńdìkaà, ti de hɔ̰́ deha yèǹka nà wèǹku-dà kà ti màǹci é bii, nà wéékú è pú kpɛ̀i n'ɔɔ̀cɔ̰́ǹ é n'wéní ti dipú hḭ́ǹka. ⁹ Yè pú yòǹ ti de pú kó nɛɛ́ é n'yɔ̀ nɛ́ ti n'diinì, àmá ti de hḭn mɛma, è kpɛ̀i é nɛ bɛka cɔ̀ku-dà nɛ yònà é tṵṵ̀na-kú. ¹⁰ Ti de káà péé-ku nɛ pesá, ti de nɛ cakáà-á-dà dɛ́dɛ́í è yɔ̀: Kà nìi pú kpɛ̀i é deha, ò dá yetá é dii.

¹¹ T'aá you kà pà tonà nɛ pàcɔ̰́ dóú-ma. Pà pú kpɛ̀i é púsí mùcɔ̰́mù, é m'bààsí pá m'bɔn-bɔnti tɔɔ̀pa wɛmá mɛhɛká. ¹² Ye kú yammà-ní, ti pà cakú è pà teǹ nà ti Teó Sèsí-Kídísì yèdi, è yɔ̀ pá n'dehú pà dá n'kɔkapú tɔɔ̀pa, é n'fòù-nà pa nɔ̀hi tɔmú.

¹³ Nɛ́na há̰kà n kúcàpa nà n potɔ̰ɔ̰̀pa-nà, nɛ́ n'sɔ̰ncí è pa̰kú suumá nɛ dá wédá. ¹⁴ Kà nìdo pú kpɛ̀i é besí wɛmá ti wa̰à̰haà-ma pɔ̀kàtà mɛntà kú mɛhɛká, kà nɛ́ n'yá̰á̰ o kpɛ́mú nɛ dá ò n'tɔ́kánì, k'yé teha kà fɛ̀ci óò cɛ̰dí. ¹⁵ Nɛ dá ò tódá nɛ kà̰à̰tɔɔ̀o. N'ɔ́ɔ̀ n'teǹ é n'yònà ò yòǹ-ma nɛ weèdɔɔ̀-tɔɔ̀o.

Cɔɔ̀ma nà kónáma

¹⁶ Teó wɛ̀ɛ̀di yaǹn, o mɔ́nń é nɛ pa̰a̰ wɛ̀ɛ̀di wɔ̀ka wɛǹni nà pa̰á̰ma bá mɛ̀mà dɛ̀ɛ̀-ma mɛhɛká. Ti Teó é nɛ m'péé-nà nɛ wɛǹni. ¹⁷ Mmí Pɔ́dì, mmí-dà nɛ wa̰à̰hu ye dɔɔ̀mà mɛmà nà n nɔ̀ku. N hɔ̰́ wa̰à̰ta n yèdi-dà n pɔ̀kàhi wɛǹni mɛhɛká. Ma kú bookú-dà n hɔ̰́ hì kɔ̀ù-ma. ¹⁸ Ti Teó Sèsí-Kídísì pa̰á̰suumá é nɛ m'péé-nà nɛ wɛǹni.