Tɛ̀sàdòníkìpa Pɔkàdɛ́ɛ̀ta 2

Mìì kó pa̰á̰-sa kà ti Teó Sèsí-Kídísì é nɛɛ́ tóní

¹ Ti kúcàpa nà ti potɔ̰ɔ̰̀pa-nà, mìì héé-sa ti Teó Sèsí-Kídísì tóḿma-ní nà ti kó tíká-ma o pesá, ti nɛ cɔɔ̀hu è yɔ̀ ² nɛ dá héé kà nɛ bɔ̀ti é m'pudì yoo kà nɛ yàma é ceḿ cɔ̰ha, kà nìi tɛ̀ni è nɛ cakáà è hḭ́n ti Teó tóḿma-ní daadí-dà tɛ̀ni. Bá kà pà nɛ cakáà è hḭ́n Weèdi-dà mà hḭ́n-ní, yoo nɛ mà yèkaà nìi nùdi k'ò yɔ̀ tíńti-dà mà hḭ́n-ní yoo è mà nɛ wa̰à̰haà-ní, nɛ dá teha. ³ Nɛ dá teha k'òòcɔ̰́ǹ é nɛ yehèna nà pa̰á̰ma màcɔ̰́mà kú hḭ́ǹka. Yè békú nìpa dɔ́ɔ́di-dà é dɛnà é wɛ́í pa dandaní Weèdi hḭ́ǹka, kà *Sḭ̀ḭ̀ma yaǹn pà kó féná-ko é foó-ní kà p'óò bantá, k'yèe daadì é nɛɛ́ tɛ̀ni. ⁴ Ye kú daàka mɛhɛká, ye Sḭ̀ḭ̀ma yaǹn kó yee-é-ma è yɔ̀ nìpa dá n'tṵ̀n weèdi tɔɔ̀di nìcɔ̰́nì, yoo tɔɔ̀sa yècḭ́ḭ̀ éè n'dɔń, kà mɛnn cɔ̰́ɔ̰̀di pú dɛɛ. Ò k'éè yee-é-ma ye wɛnnì, háá é yó potá kṵnnɔ̀fa é dúú é kaàdi Weèdi hɔ̰́ɔ̰̀ta mɛhɛká, è yɔ̀ mɛnń-dà héé Weèdi. ⁵ N de yè nɛ cakáà-á-dà è káà péé-ní nɛ pesá, nɛ pú káà yè dèn-a̰a̰?

⁶ Nɛ yá̰á̰-dà mìì òò kpaá-sa sá̰mà k'ò mum pú fodà-ní. Wɔ̀ni Weèdi ò beé-di mɛní-dà ò kó fodá-ma-ní. ⁷ Sḭ̀ḭ̀ma yaǹn kpeèti yɔ̀ɔ dehúpu-dà, è há̰ káà sɔ̀di. Mɛ̀ǹǹ kpaá-ko ti tɛ̀m̀ma-ní kó tì pa̰a̰ tíń daadí bòdi, tì kó fodá-ma dɛ́dɛ́í. ⁸ Ye kú daadí-dà ye Sḭ̀ḭ̀ma yaǹn kó fodá-ma-ní, kà Teó Sèsíì óò kɔ̀ù n'ɔ̀ɔ nùdi yamú, óò fɛ́cí n'ɔ̀ɔ tóḿma-ní wɛhimú. ⁹ Ye Sḭ̀ḭ̀ma yaǹn kó tɛ̀ni nà Wɛɛ̀kupá wódo kpeèti-dà, é tɛ̀ni é pa̰á̰ niìya̰ ye bodú bodú mìì kó dii-sá nìpa, nà pɔ́ńtápa̰á̰ma, nà pɔ́ńtáyḭḭ́pa pa bodú bodú, è kpɛ̀i é yehèna nìpa. ¹⁰ Ò kó tɛ̀ni é m'pa̰kú pa̰á̰kpákpààma-dà ma bodú bodú, é yehèna nìpa mɛ̀m̀pà kɔ́dí-pa féépu. Ye nìpà kó fédí, mìì tee-sá pà pú teháà wɛbeèdi, pà mɛ̀ɛ pú nì dɔ́káà, mɛní-dà há̰ de kó pà fḭ́hìna. ¹¹ Ye kú kpɛ́mú-dà tee Weèdi pà kɔ̰́ɔ̰̀-ma-ní yehènamá kpeèti, kà tì pà yɛ̰̀ṵ̀ kà pà tehú nuǹhetí. ¹² Ye wɔ̀ni, mɛ̀m̀pà kú wɛǹni pú teháà-pa wɛbeèdi, é naaka-nà pa̰á̰kpákpààma, Weèdi kó pà kɔ̰́ɔ̰́-ma yetádi.

Nɛ dandaní ní n'kpenì Weèdi cɔ̀ku mɛhɛká

¹³ Nɛ́na ti kúcàpa nà ti potɔ̰ɔ̰̀pa Teó dɔ́sí-pa, yè békú tḭ́ńti é n'sɛɛ́-ma Weèdi wɔ̀ka wɛǹni nà nɛ kpɛ́mú, mìì tee-sá nɛ́na-dà yòǹ cecepá Weèdi ta̰kadà-pa é nɛ fḭ́hìna nà ni Sèdi kpeèti, nà wɛbeèdi nɛ teháà-di. Ye Weèdi Sèdi-dà mɛ̀ɛ tee kà nɛ yòǹ Weèdi kpɛ́ɛpá. ¹⁴ Weèdi kpɛ̀i nɛ́ n'yòm̀pu kpɛ́mú-dà ni kpɛ́ɛpá kà ní nɛ yíí nà wɛnaamá ti nɛ cakáà-ma. Nì kpɛ̀i, Teó Sèsí-Kídísì wɛhimú-dà mɛ̀ɛ té é n'yòǹ nɛ kpɛ́mú.

¹⁵ Ye kú hḭ́ǹka n kúcàpa nà n potɔ̰ɔ̰̀pa-nà, nɛ́ n'tasí, é m'púsí dɛ́dɛ́í biɔhànamá ti nɛ kɔ̰́ɔ̰̀-ma nà ti nùka yoo nà ti pɔ̀kàhi. ¹⁶ Ti Báàa Weèdi-dà ti dɔ́sí, é ti pa̰a̰ o pa̰á̰suumá mɛhɛká yɔ́dàma mɛ̀mà kɔ́ɔ́-ma yɔ̀ɔmá, nà daḿma niìi suusá mìì pení-sa-ní hḭ́ǹka. T'oò cɔ̀hu, è cɔ̀hu nà ti Teó Sèsí-Kídísì o mɔ́nń, ¹⁷ è yɔ̀ pà dá teha kà nɛ yàma é wédá. Pá nɛ pa̰a̰ kpeèti kà nɛ baà é m'pa̰kú k'yé n'sudi nɛ pa̰á̰ma nà nɛ wɛmá mɛhɛká.