Tɛ̀sàdòníkìpa Pɔkàdɛ́ɛ̀ta 1

Pɔ̀kàta Pɔ́dì wà̰haà-ta Tɛ̀sàdòníkìpa

Dɔɔ̀mu

¹ Mmí Pɔ́dì, nà Sìdásì, nà Tìmɔ̀téè, tḭ́ńti-dà wà̰hu ye pɔ̀kàtà-ní è dɔń nɛ́na Tɛ̀sàdòníkì weèdɔɔ̀pa. Nɛ yòǹ [ti Báàa Weèdi] nà ti Teó Kídísì kpɛ́ɛpá-dà. ² Báàa Weèdi, nà Teó Sèsí-Kídísì é nɛ pa̰a̰ pa̰á̰suumá nà wɛ̀ɛ̀di.

Sídàma mɛ̀mà ceí-ma nìpa Kídísì kó tóní tíń daadí

³ Ti Kúcàpa nà ti potɔ̰ɔ̰̀pa-nà, yè békú tí n'sɛɛ́-ma Weèdi wɔ̀ka wɛǹni nà nɛ kpɛ́mú. Yè suu-ú-ma tí m'pa̰kú miya̰, mìì tee-sá nɛ dandaní dɔɔ̀haà è kpɛ̰́ǹ-ń-ma, kà nɛ dɔ́kàma nɛ káá-ma nɛ tɔɔ̀pa hḭ́ǹka dɔ̀haà è wɛhikú. ⁴ Ye kú kpɛ́mú-dà tee, kà ti wɛì nɛ wɛmá nà yaǹnaakú weèdɔɔ̀-nàmɔ̀ka tɔɔ̀pa mɛhɛká, mìì tee-sá nɛ dandaní nà nɛ wɛ̰́ɛ̰́ma pú bókáà nɛ fá̰kápàma nà nɛ wéhènamá wɛǹni mɛhɛká.

⁵ Mií-dà bɛkú è yɔ̀ Weèdi kó wáńtá síi-má sídàma nìpa kó n'coó-ma. Nɛ toó-sà è kṵ́hú, mií-dà kó nɛ kpáhìna nìpa mɛ̀m̀pà sànà-pa é dúú Weèdi wóòti mɛhɛká, ti kú kpɛ́mú-dà mɛ̀ɛ tee kà nɛ yon náńkú. ⁶ Mɔ́ma, Weèdi coó-ma nì kó wáńtá é pa̰á̰-sa hḭ́ǹka, è yá̰á̰ nì kó wáńtá pà diá-ma náńkú mɛ̀m̀pà kù nɛ diinì-pa. ⁷ Nɛ́na mɛ̀m̀pà yon-pá náńkú nà tḭ́ńti, nì kó wáńtá ti pa̰a̰-á̰-ma muhipàma, Teó Sèsíì kó foó tíń daadí hḭ́ǹka, è nɔɔ̀-nà o tɔntɔndipá kpeèti yam̀ma. ⁸ Ò kó tóní ha̰denfá mɛhɛká-dà, é tɛ̀ni é yɔ̰́ń mɛ̀m̀pà pú kpɛ̀i é yá̰dá-pa Weèdi pa toòka, nà mɛ̀m̀pà pú kpɛ̀i é tṵṵ̀na-pá ti Teó Sèsíì wɛnaamá hḭ́mpú. ⁹ Pa toyɔ̰́ńti-dà kó n'héé pa sèhènamá k'yé n'kɔ́ɔ́ yɔ̀ɔmá. Pà pú kó n'tɔ́sí nà Teó pesá, pà mɛ̀ɛ pú kó n'tɔ́sí n'ɔ̀ɔ wɛhimú kpeèti. ¹⁰ Mii kú wɛnnì kó pa̰ná ò kó tóní tíń daadí-dà. Ye wɔ̀ni, mɛ̀m̀pà kú wɛnnì yòǹ-pa o kpɛ́ɛpá, è tàà pa dandaní o hḭ́ǹka, kà p'óò n'dùǹti, óò n'wáń sá̰nì o wɛhimú wɛǹni mɛhɛká. Nɛ kó m'péé-ma pa mɛhɛká, mìì tee-sá nɛ teháà wɛmá ti nɛ cakáà-ma. ¹¹ Ye kú kpɛ́mú-dà tee kà ti cɔɔ̀hu ti Weèdi wɔ̀ka wɛǹni nɛ kpɛ́mú, è yɔ̀ ní héé kà nɛ́ n'yòǹ nìpa mɛ̀m̀pà sànà é dɛ́tá-pá fòùmu nì nɛ yíí-pu kú kpɛ́mú. Ní nɛ tempanà nà ni nɔɔ̀ti nì káá-ti, kà nɛ́ pa̰á̰ suumá nɛ yàma kó n'hḭ́n nɛ́ pa̰á̰-ma wɛǹni, nà tɔná nɛ dandaní kó pa̰á̰-na. ¹² Ma kú bookú-dà nìpa kó wɛkàna-má ti Teó Sèsíì yèdi nà nɛ́na kú kpɛ́mú, k'ò mɛ̀ɛ té wɛkàna nɛ kpɛ́ɛká. Ti Weèdi nà Teó Sèsí-Kídísì pa̰á̰suumá-dà kó n'tee k'yèe kú niì wɛnnì é pa̰ná.