Tìmɔ̀téè Pɔkàcecetá 6

Núm̀ma nà pa dakpɛ̰́m̀ma.

¹ Weèdɔɔ̀pa mɛ̀m̀pà kú wɛnnì yòǹ-pa núm̀ma, pà yònà é n'cuunì-í-ma pa dakpɛ̰́m̀ma yè békáàma kú bookú. Mɛma, nìi pú kó nɛɛ́ tèe Weèdi yèdi, yoo é yɔ̰́sa ti biɔhànì-sa. ² Pa mɛ̀m̀pà káá-pa dakpɛ̰́m̀ma kà pà yòǹ weèdɔɔ̀pa, pà yònà é pà n'wani-í-ma. Yè pú yònà pà yòǹ-ma kpɛ́mú-dà pa kúcàpa Weèdi cɔ̀ku mɛhɛká kà pà pú kó pà n'wani. Pà yònà é múńtá dɔ̀hà é deha-á-ma pa kpɛ́mú sukú mìì tee-sá, ye dakpɛ̰́mmà pà dehú-pà kú kpɛ́mù-ní, pà yòǹ Weèdɔɔ̀pa-dà Weèdi naanà-pa sukú.

Biɔhànamá kpákpààma nà kááma mɔ́mmá.

Mií-dà a yònà é biɔhàna-má nìpa, é pà kpákada kà p'éè tṵ̀na. ³ Kà nìi biɔhànì tɔɔ̀sa yècḭ́ḭ̀, k'yè pú pɛ́ɛ́-nà wɛmɔ́ma ti Teó Sèsí-Kídísì biɔhànà-ma, nà biɔhànamá mɛ̀mà nɔɔ̀-nà-ma ti dandaní, ⁴ ye yaǹn fóńfóǹti-dà k'óò kɔ̀ù, ò mɛ̀ɛ pú yá̰á̰ yècḭ́ḭ̀. Nɔ̀nɔ̀hicí nà há̰kádàma wɛnɔ̀ka hḭ́ǹka, ye kú dɔnkú-dà h'ɔ̰́ɔ̰̀ n'káá. Mií-dà tɛ̀hu-nà-ní yandimú, nà kɔ̰ɔ̰̀ka, nà nɛ tɔɔ̀pa yèka cɔ̰hàma, nà yam̀màhàkpákpààka tɔɔ̀o hḭ́ǹka, ⁵ nà nɔ̀nɔ̀hicí wɔ̀ka wɛǹni nìpa mɛ̀m̀pà kú yam̀màhàka pú cɔ́dí-ka cɔhɔ̀ka. Pà koò pú yá̰á̰ wɛbeèdi. Pà hɔ̰́ m'maàhu è tonà Weèdi cɔ̀ku tṵṵ̀namá kó pà tɛɛ̀-ní dící-dà.

⁶ Mɔ́masí hḭ́ǹka, Weèdi cɔ̀ku tṵṵ̀namá yòǹ kááma sàma yudí-dà, àmá yè yòǹ kááma sàma yudí, k'à sàà a káá-sa-dà. ⁷ Ti pú pení è toó-ní yècḭ́ḭ̀ fòùku mɛhɛká, ti mɛ̀ɛ pú kó n'tóńti è toó yècḭ́ḭ̀. ⁸ Ye kú kpɛ́mú, kà ti káá ti kó dii-sá, è káá ti kó báá-sa, yè ti sàà-á-ma. ⁹ Àmá, mɛ̀m̀pà kpɛ̀i-pá é hḭn kááma yam̀ma, pà hɔ̰́ dɔdi bɛḿma mɛhɛká-dà. Pà hɔ̰́ hédá pa cɔ̰́ɔ̰̀di-dà, kà sḭ́ńdápa̰á̰ma nà yam̀màhàsḭ̀ka té pà cɛ̰ɛ̰́ máàdi kpɛ́ɛmá, é pà túdí kṵ́mú mɛhɛká kà pá sèǹ. ¹⁰ Kpákpààma dɔ́ɔ́di yudí péé-nà-ní díidɔ́kàsàma pesá-dà. Nìpa pàcɔ̰́ dɔ́káà-ci-dà sàma, é dúú ci pɛhàma, ye wɔ̀ni é féná pa dandaní, é kɔ̰́ɔ̰́ pa cɔ̰́ɔ̰̀di náńkú dii-má sàma.

Tencí Pɔ́dì kɔ̰́ɔ̰̀-ci Tìmɔ̀téè.

¹¹ Àmá fɔ̰́ń Weèdi nìdo, yentá mii kú wɛnnì-ní. Pɛha a kó hḭmá é n'coó, é n'daàdi-nà Weèdi. Pɛha a kó hḭmá é n'káá dandaní, é n'káá dɔ́kàma, é n'káá mùyɔ̰ nà yaǹyɔ̀kàm̀ma. ¹² Màa mɔ̀ɔ̀di suudí dandaní kpɛ́ɛdí. Wɛ̰́dí é wáńtá dɛ́tá fòùmu mɛ̀mù bá yɔ̀ɔpú, è yá̰á̰ mɛmu kú kpɛ́mú-dà Weèdi aa yíí-ma, k'à mɛ̀ɛ de é wɛdá k'yè sudi nìpa dɔ́ɔ́di yìhìka è yɔ̀ a dań Weèdi. ¹³ M'a kɔ̰́nì nùdi-dà, Weèdi mɛ̀nì kɔ̰́nì-di niìi wɛǹni fòùmu yìhìka, nà Sèsí-Kídísì mɛ̀ǹǹ wɛdà-ko wɛbeèdi mɔ́nní dandaní hḭ́ǹka Pɔ̰́ńsí-Pìdátì yìhìka, ¹⁴ è yɔ̀ á púsí kpɛ̰́ńtìnùdi Weèdi aa kɔ̰́ɔ̰̀-di, é n'weni, é n'kɔ́ɔ́ kpákpààma màcɔ̰́mà háá é n'sànà daadí ti Teó Sèsí-Kídísì kó fodá-di-ní. ¹⁵ Ò kó fodá-ní wɔ̀ni Weèdi hḭ́nà-di-dà. Mɛní cɔ̰́ɔ̰̀di-dà héé kpeèti wɛǹni yaǹn, è héé wɛ̀ɛ̀di yudí, è yòǹ wóópa Wódo, nà tepá Teó. ¹⁶ Ni kú cɔ̰́ɔ̰̀di-dà pú kó kpíí daadí yènì. Nì péé wenkú mɛhɛká-dà, k'òòcɔ̰́ǹ pú kó nɛɛ́ kù hɛ́tá-ho. Òcɔ̰́ǹ pú nì dɛ́hà daadí yènì, òcɔ̰́ǹ mɛ̀ɛ pú kó nɛɛ́ nì dɛ́há. Mɛní cɔ̰́ɔ̰̀di-dà sànà cuùmá nà kpeèti k'yé n'kɔ́ɔ́ yɔ̀ɔmá! K'yé mà n'yòǹ.

¹⁷ Caka fòùkù mɛnkù kú káápa è yɔ̀ pà dá n'káá fóńfóǹti. Pà caka è yɔ̀ pà dá taàa pa daḿma kááma mɛ̀mà pú yókú-ma hḭ́ǹka, àmá pá mà tàa Weèdi hḭ́ǹka. Mɛní-dà ti pɔ̰n niìi wɛǹni nà yàma màcɔ̰́ è kpɛ̀i yé ti n'nadi. ¹⁸ Pà caka è yɔ̀ pá n'pa̰kú suumá, kà nììma ní n'sṵ́n pa pa̰á̰ma mɛhɛká. Pà caka kà pá m'pɔ̰n nà yàma màcɔ̰́, é n'tookú pà káá-sa nà tɔɔ̀pa. ¹⁹ Kà pà hɔ̰n mɛma, pà makànì kṵ́ńweǹni daadí kpɛ́mú, kááma-dà mɛ̀mà suu-má, k'yèècḭ́ḭ̀ pú kó nɛɛ́ mà pḭ́ń, k'yé teha kà pá wáńtá dɛ́tá fòùmu mɔ́mmú.

²⁰ Tìmɔ̀téè, púsí sukú Weèdi a kɔ̰́ɔ̰̀-sa. Yentá wɛhéhécíhi, nà biɔhànamá pà toò-ma yá̰á̰ma biɔhànamá, è yá̰á̰ ye pú nɔɔ̀-nà dandaní wɛbeèdi. ²¹ Pàcɔ̰́ de maàhu è tonà pà káá-ma ye yá̰á̰mà-ní, ye wɔ̀ni é nátá-nà Weèdi cɔ̀ku.

Kà Weèdi pa̰á̰suumá é nɛ m'péé-nà!