Tìmɔ̀téè Pɔkàcecetá 4

Mɛ̀m̀pà biɔhànì-pa nuǹhetí

¹ Weèdi Sèdi wɛdà-á-ma pópóí è yɔ̀ dadèǹdèka mɛhɛká, nìpa pàcɔ̰́ kó wɛ́í-ma dandaní cɔ̀ku, é taá besí sèka mɛ̀ǹkà yehenì-ka tonàpu, nà wɛɛ̀kupá biɔhànamá. ² Pà kó hédá kà yam̀peǹtapá nà nuǹhetí yam̀ma-dà é pà yehèna. Ye kú yammà, pa yàma koò pú fòù, mà yònà ha̰mú-dà mà pedà-ma. ³ Pà biɔhànì è yɔ̀ nìpa dá n'tóńkú poòpa-dà, pà mɛ̀ɛ dá n'yon dimá màcɔ̰́. Há̰kà, Weèdi-dà pa̰à̰ ye dimà-ní-ì, è yɔ̀ weèdɔɔ̀pa, mɛmpá mɛ̀m̀pà yá̰á̰-pa wɛbeèdi ní mà n'yon é nì n'sɛɛ́. ⁴ Weèdi pa̰à̰-sa wɛǹni suu-ú-ma, yècḭ́ḭ̀ pú yònà é yeda. Há̰kà, k'à kó dii-sá wɛǹni, k'à té sɛda Weèdi n'ɛ̀ɛ kpɛ́mú, ⁵ è yá̰á̰ Weèdi wɛmá nà weèdɔɔ̀pu wekànì-í-ma niìi wɛǹni.

Mɛ̀ǹǹ yòǹ-ko Sèsí-Kídísì deho sudó.

⁶ K'à biɔhànì ye kú niì-ní weèdɔɔ̀pa, a kó n'yòǹ Sèsí-Kídísì deho sudó-dà, é tṵ́má bɛka è yɔ̀ a mɔ́nń kpɛ̰́ń-ma dandaní wɛmá hḭ́ǹka nà biɔhànamá mɛ̀mà coó-ma mɛhɛká. ⁷ Àmá, dá teha hoǹcí cakàma mɛ̀mà yòǹ-ma hécí, è pú nɔɔ̀-nà dandaní kpɛ́ɛmá. Biɔha a kó hḭmpú é n'fòù k'yè coó Weèdi yìhìka. ⁸ Wɔ̰̀ǹku tokènamá suu-ú-ma, àmá yè pú tɛɛ̀hu-nà-ní sàsa yècḭ́ḭ̀. Há̰kà, coóma Weèdi yìhìka, mii suu niìi wɛǹni kpɛ́mú-dà, mìì tee-sá yè ti pɔ̰n fòùmu-dà yenì, è kó tṵ́má wáńtá ti pa̰a̰ kṵ́ńweǹni kpɛ́mú. ⁹ Mɛmá-dà héé wɛbeèdi, k'yè békú tí mà tà̰ǹta nà yàma màcɔ̰́. ¹⁰ Ye kú kpɛ́mú, kà ti mɔù è dehú kpeéma, yè yòm̀pu kpɛ́mú-dà ti taà ti daḿma Weèdi mɛ̀nì fòù-di hḭ́ǹka. Mɛní-dà yòǹ nìpa wɛǹni Fḭ́hìnɔ, weèdɔɔ̀pa kú dàkà.

¹¹ Mií-dà a yònà é biɔhàna-má nìpa, é pà caka è yɔ̀ p'éè tṵ̀na. ¹² Òcɔ̰́ǹ d'áa yɔ̰́sa è yɔ̀pu kpɛ́mú a yòǹ bíitá. Àmá, ní m'bɛkú weèdɔɔ̀pa pà yònà é n'fòùkaàma, a wɛmá mɛhɛká, a pa̰á̰ma mɛhɛká, a dɔ́kàma mɛhɛká, a dandaní hḭ́ǹka, n'àa wenimá mɛhɛká. ¹³ Pa̰a̰ a kpɛ́ɛtí é n'kaǹ Weèdi wɛmá nìpa yìhìka, é n'yahikànì pa wɔ̰̀ǹti, é pà m'biɔhànì háá daadí n kó tɛ̀i-dí-ho. ¹⁴ A dá díná bɛ́ɛ́kú pa̰dí Weèdi a pɛ̰ḭ-dí. Nì n'àà pɛ̰ḭ, weèdɔɔ̀-nàmɔ̀ni kpɛ̰́m̀ma cɔ̰nà tḭ́ń daadí-dà pa nɔ̀hi a hḭ́ǹka é pa̰á̰ weèdɔɔ̀pu, kà Weèdi wɛtɛ̰́nápa é wɛdá Weèdi kpɛ̀i-sá a hḭ́ǹka. ¹⁵ Ní m'pa̰kú miì kú wɛnnì nà yàma màcɔ̰́, é kɔ̰́ɔ̰́ a cɔ̰́ɔ̰̀di dɛ́dɛ́í ye tɔmú mɛhɛká, mɛma nìpa wɛǹni kó dɛ́há-ma a tahú-ma yìhìka. ¹⁶ Pa̰á̰ yɔkàma, a mɔ́nń fòùmu n'àa biɔhànamá hḭ́ǹka. Ní n'wɛ̰́dì ye kú niì hḭ́ǹka. K'à hɔ̰n mɛma, a kó fḭ́hìna-á-ma a cɔ̰́ɔ̰̀di, nà mɛ̀m̀pà k'áa besí-pa.