Tìmɔ̀téè Pɔkàcecetá 3

Woò mɔ́ńn-dà kó nɛɛ́ n'yòǹ weèdɔɔ̀-nàmɔ̀ni yìkàǹyìdo?

¹ Wɛmà mɛmà yòǹ bemú-dà. Kà nìi kpɛ̀i é n'yòǹ weèdɔɔ̀-nàmɔ̀ni yìkàǹyìdo, tɔnsuumú-dà ò dɔ́sí-ma. ² Yè békú weèdɔɔ̀-nàmɔ̀ni yìkàǹyìdo fòùmu ní n'suu-ú-ma, kà nìpa dá n'dɛ́ɛ́kú pà kó n'wɛì-sa o hḭ́ǹka. Ò yònà é n'káá poòo òcɔ̰́-dà, é n'nɔn è cɛ̰hú o cɔ̰́ɔ̰̀di, é n'káá yaǹfòùma, é n'nɔn è weǹ nà tɔɔ̀pa. Ò yònà é n'nɔn è coní-ma cà̰m̀ma, é tṵ́má n'nɔn è biɔhànì. ³ Ò pú yònà é n'yòǹ naàyà̰do yoo é n'káá kɔ̰ɔ̰̀ka. Àmá, ò yònà é n'yɔ̀kànì-í-ma, è pú n'kpɛ̀i wɛkú. Ò pú yònà é naaka-nà dífa sàma. ⁴ Ò yònà é m'púsí-ma o hɔ̰́ɔ̰̀ta kpɛ́ɛpá sukú, k'òo bííhí óò n'you-nà toòka dɛ́dɛ́í. ⁵ K'yè pú yòǹ mɛma, nìi mɛ̀ǹǹ pú kó nɛɛ́ púsí-ko o hɔ̰́ɔ̰̀ta kpɛ́ɛpá, ntɛ́ ò kó hḭmà é nɛɛ́ púsí Weèdi hɔ̰́ɔ̰̀ta kpɛ́ɛpá? ⁶ Weèdɔɔ̀-nàmɔ̀ni yìkàǹyìdo pú yònà é n'yòǹ weèdɔɔ̀o pàǹn, kà mɛma dɔ, ò kó dúú fóńfóǹti-dà, ye wɔ̀ni é dɔdi Weèdi sídàma mɛhɛká é n'yònà Wɛɛ̀kupá wódo dɔdi-má ma mɛhɛká. ⁷ Yè békú è yɔ̀ mɛ̀m̀pà pú yòǹ-pa weèdɔɔ̀pa mɛ̀ɛ té n'wɛì o suumá-dà. Mɛma, nìì pú k'óò n'yɔ̰́sí, ò mɛ̀ɛ pú kó dɔdi Wɛɛ̀kupá wódo máàka mɛhɛká.

M̀mɔ́ḿpa-dà kó nɛɛ́ n'yòǹ weèdɔɔ̀-nàmɔ̀ni dehèpa?

⁸ Weèdɔɔ̀-nàmɔ̀ni dehèpa mɛ̀ɛtékà tá, pà yònà é n'coó-ma, é n'yòǹ nìpa pà kɛ̀hi-pá. Pà pú yònà é m'buǹti naàma mɛhɛká, yoo é m'pɛhɛ̀ǹta dící héhécíma. ⁹ Pà yònà é m'púsí-ma dandaní wɛbeèdi Weèdi pà fohìnà-di nà yaǹdɛ́himá. ¹⁰ Kà nɛ kó pà tódá kà pá n'yòǹ weèdɔɔ̀-nàmɔ̀ni dehèpa, yè békú nɛ té dɛnà é pà bɛń-ma é dɛ́há pà yòm̀pu. Kà nɛ pú dɛ́hà kpákpààsa yècḭ́ḭ̀ pa hḭ́ǹka, ye wɔ̀ni kà nɛ́ pà púká ye tɔmú. ¹¹ Poòpa mɛ̀m̀pà mɛ̀ɛ té yòǹ-pa weèdɔɔ̀-nàmɔ̀ni dehèpa tá, nìpa mɛ̀ɛ té yònà é pà n'kɛ̀hi-í-ma. Pà pú yònà é n'dɛ̀i è cɔ̰́hú tɔɔ̀pa yèka. Pá n'nɔn è cɛ̰hú pa cɔ̰́ɔ̰̀di, é n'coó niìi wɛǹni mɛhɛká. ¹² Weèdɔɔ̀-nàmɔ̀ni dehèpa yònà é n'káá poòo òcɔ̰́ òcɔ̰́-dà. Pà mɛ̀ɛ yònà é n'nɔn è púkù-ú-ma sukú pa bííhí nà pa hɔ̰́ɔ̰́hí. ¹³ Weèdɔɔ̀-nàmɔ̀ni dehèpa mɛ̀m̀pà pa̰kú-pa tɔmú sukú, nìpa kó pà n'cùnì-í-ma. Pà kó n'wɛì-í-ma Sèsí-Kídísì wɛmá è pú wani, mìì tee-sá pà dań o hḭ́ǹka.

Sàsa mìì sɔ̀ɔ-sá kà Weèdi éè fohìna.

¹⁴ M'a wa̰à̰hu ye pɔ̀kàtà mɛntà-ní, è dań è yɔ̀ n pú kó yóka é tɛ̀i-ho a pesá. ¹⁵ Há̰kà kà n pú nɛɛ̀ é tɛ̀i-ho sá̰ńsá̰kù-ní, n wa̰à̰haà-sà kó nɛɛ́-ma áa tempanà, k'á n'yá̰á̰ a yònà é n'fòù-ma kú bookú Weèdi kpɛ́ɛpá yìhìka, mɛmpá mɛ̀m̀pà yòǹ-pa Weèdi mɛ̀nì fòù-di hòǹhòni kpɛ́ɛpá, è púsí wɛbeèdi é n'yònà dapèpukú hɔ̰́ m'púsí-ma kú bookú nàmɔ̀ni. ¹⁶ Mɔ́masí hḭ́ǹka, mìì de sɔ̀ɔ-sá è nɔɔ̀-nà ti dandaní kpɛ́ɛsá, kà Weèdi éè ti fohìna, yè wɛhi-í-ma. Mií-dà héé:

Kídísì hḭn nìdo é bɛka o cɔ̰́ɔ̰̀di,

kà Weèdi Sèdi é bɛka è yɔ̀ ò yòǹ niìcoóko,

kà Weèdi tɔntɔndipá óò dɛ́há,

kà pá caka o wɛmá boocí wɛǹni mɛhɛká,

kà nìpa é taàa pa dandaní o hḭ́ǹka teǹka nà ka nùdi,

hḭ́ǹka mɛhɛká, kà Weèdi óò wɛkàna.