Tìmɔ̀téè Pɔkàcecetá 2

Nɛ́ n'cɔɔ̀hu Weèdi nìpa wɛǹni kpɛ́mú.

¹ Niìya̰ cecesá n nɛ cɔɔ̀hu-sá-dà héé: Nɛ́ n'dɔń Weèdi, é nì n'cɔɔ̀hu, é nì n'sɛ́úkú, é nì n'sɛdí nìpa wɛǹni kpɛ́mú. ² Nɛ́ n'dɔń Weèdi wóópa kpɛ́mú, nà mɛ̀m̀pà kú wɛnnì káá-pa kpɛ̰́ǹti, k'yé teha kà tí n'fòù k'yè bóhi, kà kɔkapàma n'kɔ́ɔ́, kà tí n'tṵ̀n Weèdi, é m'pa̰kú mìì suu-sá. ³ Mií-dà héé suu-sá, kà ti Fḭ́hìnɔ Weèdi yè naanà. ⁴ Nì yè naanà, mìì tee-sá nì kpɛ̀i nìpa wɛǹni-dà é fḭ́tá, é yá̰dá wɛbeèdi, ⁵ è yá̰á̰ Weèdi yòǹ nìcɔ̰́-dà, kà cawà̰do yòǹ òcɔ̰́ nìpa nà Weèdi cɔhàka. Ye cawà̰do yòǹ nìdo-dà, mɛnń-dà mɛ̀ɛ héé Sèsí-Kídísì, ⁶ mɛ̀ǹǹ kɔ̰́ɔ̰̀-ko o fòùmu é bodá yè de békú-sa, é dontá nìpa wɛǹni. Ye kú pa̰á̰mà-dà ò pa̰à̰-ma wɔ̀ni Weèdi de hḭ́nà-di, è kó bɛka nìpa wɛǹni è yɔ̀ Weèdi kpɛ̀i é pà fḭhìna. ⁷ Ye kú kpɛ́mú-dà mɛ̀ɛ tee Weèdi n ta̰kadà-ma, kà n yòǹ ni wɛcako nà ni tɔntɔdikó. Bemú-dà n cakú-ma, n pú báńtí. Nì n púkà è yɔ̀ ń biɔhàna, mìì héé-sa dandaní nà wɛbeèdi wɛmá-dà mɛ̀m̀pà pú yòǹ-pa Sùwífùpa.

⁸ Ye kú kpɛ́mú, n kpɛ̀i kà daapá é n'yoòhu pa nɔ̀hi-dà hḭ́ǹka, é n'cɔɔ̀hu Weèdi páàti wɛǹni. Pá mà n'hɔ̰n nà yaǹwemmá, kà fɔ̰́ɔ̰́di nà kɔ̰ɔ̰̀ka é n'kɔ́ɔ́.

⁹ N mɛ̀ɛ té kpɛ̀i kà poòpa é m'bádì cóńcodí-dà. Pà dá m'bádì è kpɛ̀i é yená pa cɔ̰́ɔ̰̀di. Pa baáma é n'sà-ho. Pa sepàǹku diimá pa yùti fḭḿma hḭ́ǹka dá yetá é ha̰tá-ho, pà mɛ̀ɛ dá n'tɔ̰hù wúdó tomána, yoo é n'yídì pa̰a̰ká, yoo é m'báti díikpecí báatí. ¹⁰ Àmá, pà yònà é m'bɛkú pa suukú pa̰á̰suumá hḭ́ǹka-dà. Mií-dà poòpa mɛ̀m̀pà hḭ́n-pá pà dɔ́sí Weèdi yònà é m'pa̰kú-ma. ¹¹ Biɔhànamá wɔ̀ni, poòpa té kaàdi yɔkàma é m'besí, é n'you-nà mɛ̀ǹǹ biɔhanì-ko toòka. ¹² N pú pɔ̰n nùdi poòpa è yɔ̀ pá biɔhàna daapá, yoo é n'káá kpɛ̰́ǹti pa hḭ́ǹka. Pa yònà é n'yòǹ-ń-ma wá̰mu, ¹³ mìì tee-sá, Weèdi cedí pa̰ná Àdám̀-dà é nɛɛ́ tṵṵ̀na Ɛ́fù. ¹⁴ Yè pú yòǹ Àdám̀-dà Wɛɛ̀kupá wódo de báńtáà-ma óò yehènà, àmá ò de báńtáà poòo-dà, k'ó yetá-nà Weèdi. ¹⁵ Há̰kà, poòo kó m'pɛní-ma bííhí, ò mɛ̀ɛ kó wáńtá dɛ́tá-ma fḭ́táma k'ò sɔ̰ncí è káá dandaní, nà dɔ́kàma, è fòù fòùmu Weèdi kpɛ̀i-pú.