Tìmɔ̀téè Pɔkàcecetá 1

Pɔ̀kàta Pɔ́dì wà̰haà-ta Tìmɔ̀téè

Dɔɔ̀mu

¹ Mmí Pɔ́dì-d'àà wà̰hu ye pɔ̀kàtà mɛntà-ní. N yòǹ Sèsí-Kídísì tɔntɔndikó-dà, mìì tee-sá Weèdi ti Fḭ́hìnɔ nà Sèsí-Kídísì ti dań-ko, mɛmpá-dà n kɔ̰́ɔ̰̀ nùdi.

² Tìmɔ̀téè, a yòǹ n bíitá mɔ́ntá-dà Weèdi cɔ̀ku mɛhɛká. Ti Báàa Weèdi, nà ti Teó Sèsí-Kídísì áa kóná, áa kɔń séèma, áa pa̰a̰ wɛ̀ɛ̀di.

Paá̰ yɔkàma nà mɛ̀m̀pà biɔhànì-pa nuǹhetí.

³ K'yé n'yònà n d'aa hḭ́mpú è kɛ̰hɛdi Màsèdɔ́nì tempáàku, ní m'péé Èfɛ́sì yɔtí mɛhɛká, è yá̰á̰ nìpa pàcɔ̰́pà-dà yè péé è biɔhànì biɔhànamá tɔɔ̀ma kà mà pú coó. Pà caka kà pá nɛhìna ye kú biɔhànamà. ⁴ Pà caka kà pá nɛhìna hoǹcí wɛmá, nà há̰kádàma pa yààpa yèka hḭ́ǹka kà kà kɔ́ɔ́ nùnì. Yè tɛ̀hu-nà-ní nɔ̀nɔ̀hicí-dà sá̰à̰di, yè pú tempú-nà Weèdi kpɛ̀i é pa̰á̰-sa ti fòùmu mɛhɛká kà ti yè yá̰á̰ nà dandaní kpɛ́mú. ⁵ N hḭ́n á pà caka miya̰, è kpɛ̀i kà pa dɔ́kàma-dà é wɛhika tɔɔ̀pa hḭ́ǹka. Ye dɔ́kàma mɛ̀ɛ yònà é yɛɛ̀ni nà yàma mɛ̀mà weni-má mɛhɛká-dà, nà yam̀màhàsuuká mɛhɛká, nà dandaní nìcɔ̰́ kú mɛhɛká. ⁶ Pàcɔ̰́ yɛdì-í-ma ye cɔ̀kù hḭ́ǹka, é dúú nɔ̀nɔ̀héhécíci mɛhɛká é fédí. ⁷ Pà hḭ́n pà yòǹ Weèdi kpɛ̰́ńtìnùka biɔhànapá-dà, pa mɔ́mpá há̰ pú yá̰á̰ pà cakú-sa. Pà p'éè wekáà-nà sukú, è há̰ yè biɔhànì è dań pa cɔ̰́ɔ̰̀di.

⁸ Ti yá̰á̰-ma è yɔ̀ kpɛ̰́ńtìnùka sudi kà ti kà tṵ̀n yè békáàma kú bookú. ⁹ Tí há̰ yònà é n'yá̰á̰-ma è yɔ̀ kpɛ̰́ńtìnùka pú péé mɛ̀m̀pà coó-pa kpɛ́mú, àmá kà péé niìkpákpààpa kpɛ́mú-dà, nà topúyoupá, nà mɛkatohiká yam̀ma, nà niìsḭ̀m̀ma, nà mɛ̀m̀pà pú cunì-pa Weèdi yoo mìì yòǹ-sa ni kpɛ́ɛsá, nà mɛ̀m̀pà kɔ̀ùdì-pa pa báàpa yoo pa mààpa, nà niìkɔ̀ùpa, ¹⁰ nà dɔ́ɔ́pa, nà daapá mɛ̀m̀pà dɔdi-nà-pa pa datɔɔ̀pa, nà mɛ̀m̀pà yɛdí-pa nìpa, nà nuǹhetí yam̀ma, nà mɛ̀m̀pà hɔ̰́ wɛ̰́ha-pá è há̰ pú kó pa̰ná ye yaǹya̰, nà mɛ̀m̀pà kú wɛnnì pa̰kú-pa kpákpààsa tɔɔ̀sa k'yè pú pɛ́ɛ́-nà biɔhànamá mɔ́mmá. ¹¹ Ye biɔhànamá mɔ́mmá péé Wɛnaamá Weèdi n kɔ̰́ɔ̰̀-ma mɛhɛká-dà, è bɛkú Weèdi mɛ̀nì yòǹ-di wɛ̀ɛ̀di yudí, ni wɛhimú sá̰á̰pu.

Pɔ́dì sɛɛ́ Weèdi nà suumá n'ɔ̀ɔ̀ pa̰à̰-ma kpɛ́mú.

¹² N sɛdí ti Teó Sèsí-Kídísì mɛ̀ǹǹ n pɛ̰ḭ-kó kpeèti è yɔ̀ ń pa̰ná o tɔmú. N ò sɛdí n'ɔ̀ɔ̀ cɔ́ɔ́-ma é n'hɔ̰́tà n cɔ́dí è kó nɛɛ́ pa̰á̰-ma ye tɔmù, k'ó n baàta mu kpɛ́mú, ¹³ mmí mɛ̀ǹǹ de wɛi-kó kpákpààma o hḭ́ǹka, é fá̰kapa o nìku, óò tèùnà. Àmá k'ó n kɔń séèma, mìì tee-sá n de hɔ̰n mɛma è pú yá̰á̰. N de pú káá dandaní o hḭ́ǹka. ¹⁴ Há̰kà, kà ti Teó é n bɛka o pa̰á̰suumá sàma, é n pa̰a̰ dandaní nà dɔ́kàma mɛ̀mà péé-nà-ma-ní Sèsí-Kídísì pesá. ¹⁵ Ǹtɛ wɛmá mɛ̀mà yòǹ-ma wɛbeèdi, k'yè békú nìpa wɛǹni é mà teha: Sèsí-Kídísì tɛ̀ni fòùku mɛhɛká è kó fḭ́hìna niìsḭ̀m̀ma-dà. Mmí-dà há̰ yòǹ sḭ̀ǹǹ mɔ́nń pa wɛǹni mɛhɛká. ¹⁶ Àmá kà Weèdi é n kɔń séèma. Ye wɔ̀ni, kà Sèsí-Kídísì é bɛka o mùyɔ̰ sá̰á̰pu n hḭ́ǹka, mmí mɛ̀ǹǹ yòǹ-ko niìsḭ̀ǹn mɔ́nń niìsḭ̀m̀ma wɛǹni mɛhɛká. Yè yòǹ yohènamá-dà ò kɔ̰́ɔ̰̀-ma mɛ̀m̀pà kó taàa-pá pa dandaní o hḭ́ǹka, é dɛ́tá fòùmu mɛ̀mù bá yɔ̀ɔ-pú. ¹⁷ Weèdi yòǹ wódo mɛ̀ǹǹ kɔ́ɔ́-ko-dà yɔ̀ɔmá, mɛ̀ǹǹ pú kó kpíí-ko daadí yènì, nìi pú mádí-ko, mɛ̀ǹǹ yòǹ-ko Weèdi o cɔ̰́ɔ̰̀di. Nìpa wɛǹni ní nì n'cuunì, é nì n'wɛkànì k'yé n'kɔ́ɔ́ yɔ̀ɔmá. K'yé mà n'yòǹ.

¹⁸ Tìmɔ̀téè n bidà, wɛmá m'a kɔ̰́ɔ̰̀-ma-dà ye pesà-ní. Mà pɛ́ɛ́-ma nà wɛmá Weèdi wɛtɛ̰́nápa de wɛdà-ma-hɔ̰ a hḭ́ǹka. Yḭncí ma hḭ́ǹka é ta̰á̰ ta̰à̰suupú, ¹⁹ ní n'káá dandaní, nà yam̀màhàsuudí. Pàcɔ̰́ yedáà pà kó besí-ma ye kú yàm̀màhàdì-dà, ye wɔ̀ni é féná pa dandaní. ²⁰ Pa mɛhɛká, Yìmɛ̀nɛ́ɛ̀ péé-ma nà Àdɛ̀kìsá̰ńtì. N pà tàà Wɛɛ̀kupá wódo nɔ̀hi mɛhɛká-dà, k'yé teha kà pá biɔha pà kó hḭmpú è koò pú n'tèe Weèdi.