Kòdɔ́sìpa 2

¹ N kpɛ̀i nɛ́ n'yá̰á̰-ma mɔ̀ɔ̀di n mɔù-di kú kpekú sá̰á̰-ma. N nì mɔ̀ù nɛ́na kpɛ́mú-dà, nà Dàòdìséè weèdɔɔ̀pa kpɛ́mú, nà mɛ̀m̀pà kú wɛǹni mum pú n dɛ́hà-pa nà pa nɔ̀ǹfa kpɛ́mú. ² N mɔù pa kpɛ́mú, è kpɛ̀i é yahikàna pa wɔ̰̀ǹti-dà, kà pá n'dɔ́sí pa tɔɔ̀pa nà yàma màcɔ̰́, kà pa yam̀màhàdi é pà pa̰a̰ kà pá yá̰dá Weèdi de dɔà-sa k'yè sɔ̀di. Ye mìì de sɔ̀ɔ-sá-dà héé Kídísì. ³ O kú mɛhɛká-dà yaǹfòùma kpààti wɛǹni nà Weèdi yá̰dáma sɔ̀ɔ-má.

⁴ N nɛ cakú miya̰, è pú kpɛ̀i k'òòcɔ̰́ǹ-dà é nɛ yehèna nà wɛpɔmpàma. ⁵ Bá kà n pú nɛ péé-nà n mɔ́nń, n yàma nɛ péé-nà-á-ma. Yè mɛ̀ɛ n naa-á-ma nà niìi wɛǹni pa̰kú-ma k'yè coó nɛ pesá, kà nɛ dandaní kpenì Kídísì hḭ́ǹka.

Nɛ dá teha k'òòcɔ̰́ǹ é nɛ yehèna.

⁶ Nɛ teháà-mà sá̰mà-ní Kídísì è yɔ̀ ò yòǹ nɛ Teó, nɛ́ n'fòù ò kpɛ̀kaàma. ⁷ Nɛ́ tṵná nɛ cɛ̰̀ǹci o mɛhɛká, é madí nɛ fòùmu wɛǹni o hḭ́ǹka. Nɛ dandaní é dɔ̀hà é kpeka pà nɛ biɔhànà-sa hḭ́ǹka, nɛ mɛ̀ɛ tṵ́má n'sɛdí Weèdi sàma.

⁸ Nɛ́ pa̰á̰ yɔkàma k'òòcɔ̰́ǹ dá nɛ cɛ̰dí o máàdi mɛhɛká nà yaǹfòùma wɛmá mɛ̀mà yòǹ-ma nuǹhetí è tṵ́mà yòǹ hécí. Ye kú yaǹfòùmà péé-nà-ní nìpa pa̰á̰ma pesá-dà, nà fòùku seèkpákpààka pesá, mà pú péé-nà-ní Kídísì pesá. ⁹ Kídísì de yòǹ nìi-dà, kà Weèdi yòm̀pu wɛǹni péé o mɛhɛká dɛ́dɛ́í. ¹⁰ Nɛ mɛ̀ɛ ò múń-nà-ma kpɛ́mú-dà tee kà nɛ́ dɛ́tá ye kú niì wɛnnì. Mɛnń-dà mɛ̀ɛ yòǹ mìì kú wɛǹni yòǹ-sa sèka, è káá nɔɔ̀ti nà kpɛ̰́ǹti, ye kpɛ̰́ǹn.

¹¹ N'ɔɔ̀ múń-nà-ma kpɛ́mú-dà tee, kà pá nɛ ca̰ntá. Ye kú ca̰ntámà pú yòǹ nìpà ca̰ntáma, àmá mà péé-nà-ní Kídísì pesá-dà è mɛ̀ɛ ti deù ti pa̰á̰kpɛ̰́ɛ̰̀ma mɛ̀mà héè-ma kà ti pa̰kú sḭ̀ḭ̀ma. ¹² Nà cóǹti pà de nɛ pa̰à̰-ti, yè yònà pà de pɛ́ɛ̀ é nɛ dáná-nà-ma-dà nà Kídísì. Àmá, nà n'ɔɔ̀ múń-nà-ma kpɛ́mú, nɛ pɛ́ɛ̀ óò yá̰ńtá-nà-á-ma, mìì tee-sá nɛ dań Weèdi nɔɔ̀ti hḭ́ǹka mɛ̀ǹtì ò yá̰hìnà-ti kpíípa mɛhɛká. ¹³ Nɛ́na, nɛ de kpíi-í-ma Weèdi cɔ̀ku mɛhɛká nà nɛ sḭ̀ḭ̀ma kpɛ́mú, mìì tee-sá nɛ de pú nì yá̰á̰. Àmá sá̰mà-ní, Weèdi nɛ fokànà-á-ma nà Kídísì kpɛ́mú. Ò ti dedà-á-ma ti sḭ̀ḭ̀ma wɛǹni. ¹⁴ Nì kpíà-á-ma pɔ̀kàta pà de wa̰à̰haà-ta kú mɛhɛká ti sḭ̀ḭ̀ma è ti pṵ́ṵ́nì è yɔ̀ ti yeekú-nà kpɛ̰́ńtìnùka. Nì tà kpíà é tà kpɛ̰́ḭ́ kpíidɔkú hḭ́ǹka-dà. ¹⁵ Ma kú bookú-dà Weèdi de hḭn-má, é deèda sèka mɛ̀ǹkà kú wɛnnì de káá-ka nɔɔ̀ti nà kpɛ̰́ǹti, ka kpeèti. Nì kà dènà-ní nìpa wɛǹni yìhìka-dà é kà yɔ́kàna, é kà fuupa è yònà kpenáti ni Bíitá nɛdà-ti. ¹⁶ Ye kú kpɛ́mú, nɛ dá hédá k'òòcɔ̰́ǹ é dɛ́tá nɛ yetádi nɛ yon-sá nà nɛ yɔ̰ǹ-sa kú hḭ́ǹka, yoo ó dɛ́tá nɛ yetádi nɛ kúùka ya̰nkàma hḭ́ǹka, nà nɛ cḭḭ̀pàncí kú kpɛ́ɛká hḭ́ǹka yoo nà nɛ damuhipàka hḭ́ǹka. ¹⁷ Mii kú wɛnnì, yòǹ niìya̰ mìì de yònà é tɛ̀ni-sá-ní dìku-dà, ye mɔ́-mɔ́nyá̰-dà mɛ̀ɛ héé Kídísì. ¹⁸ Nɛ dá teha k'òòcɔ̰́ǹ é n'toó nɛ yèdi è yɔ̀ nɛ pú sudi. N wɛì nìpa mɛ̀m̀pà kpáhìnì-pa-dà pa cɔ̰́ɔ̰̀di cɛ̰́ma Weèdi tɔntɔndipá yìhìka è pà dɔń, è tṵ́mà té kɔ̰́ɔ̰́ pa cɔ̰́ɔ̰̀di tenten pà dɛ́hù-sa pa dɔhàti mɛhɛká. Ye kú yammà, nìpa yam̀màhàka-dà hɔ̰́ pà n'túdí, kà pà wá̰kànì hécí. ¹⁹ Pà pú daàdi-nà Kídísì mɛ̀ǹǹ héé-ko yudí. Yudí-dà há̰ kɔ̰́nì wɔ̰̀ǹku yè kù békú-sa. Mɛní-dà tee kà wɔ̰̀ǹku tukanáma nà ku cɛ̰̀ǹci pɛ́ɛ̀ púsí k'yè sàà, Weèdi-dà mɛ̀ɛ héù kà kù kpɛ̰́ǹ nì kpɛ̀kaàma.

Tí kpíí nà Kídísì é pɛ́ɛ́ óò yá̰ńtá-nà.

²⁰ Nɛ pɛ́ɛ̀ é kpíí-ma nà Kídísì. Ye mìì kú wɛnnì yòǹ-sa sèka è káá kpeèti fòùku mɛhɛká koò kɔ́ɔ́ nɔɔ̀ti nɛ hḭ́ǹka. N'aá pa̰kú k'yè yònà nɛ káà péé-ma-dà ye kú niiyà̰ nɔɔ̀ti mɛhɛká. Badà tee kà pà nɛ pa̰kú nà nɔɔ̀ti kà nɛ tṵ̀n kpɛ̰́ńtìnùkà mɛ̀ǹkà toò-ka: ²¹ Dá tódá miì, dá dɛmpa miì, dá pḭ́ń miì? ²² Ye kú kpɛ̰́ńtìnùkà n'ɛ̀ɛ kú biɔhànamà péé-nà-ní nìpa pesá-dà. Pà kà pa̰à̰ niìya̰ mìì hɔ̰́ sèǹ-sa kpɛ́mú-dà kà p'èè deháà-nà è yɔ̀ɔ. ²³ Mɔ́masí hḭ́ǹka, ye kpɛ̰́ńtìnùkà sém̀ yònà kà toó-ma-dà yaǹfòùma sàma ka mɛhɛká, mìì tee-sá kà békú è yɔ̀ ti té kɔ̰́ɔ̰́ ti cɔ̰́ɔ̰̀di tenten Weèdi duntàma hḭ́ǹka-dà, è té kpáhìna ti cɔ̰́ɔ̰̀di cɛ̰́ma, é diá ti wɔ̰̀ǹku náńkú. Há̰kà, kà pú yòǹ yècḭ́ḭ̀, kà tempú-nà sá̰à̰di nìdo ò kó hḭmpú-dà é m'pa̰kú o wɔ̰̀ǹku kpɛ̀i-sá.