Kòdɔ́sìpa 1

Pɔ̀kàta Pɔ́dì wà̰haà-ta Kòdɔ́sìpa

Dɔɔ̀mu

¹ Mmí Pɔ́dì, Weèdi-dà kpɛ̀i é n yíí kà n yòǹ Sèsí-Kídísì tɔntɔndikó. Mmí nà ti kúcàa Tìmɔ̀téè, tḭ́ńti-dà wà̰hu ye pɔ̀kàtà mɛntà-ní è dɔń, ² nɛ́na mɛ̀m̀pà yòǹ-pa Weèdi kpɛ́ɛpá è péé Kòdɔ́sì yɔtí mɛhɛká. Nɛ yòǹ ti kúcàpa nà ti potɔ̰ɔ̰̀pa-dà, è múń-nà Kídísì, òò tṵ̀n nà yàma màcɔ̰́. Weèdi ti Báàa é nɛ pa̰a̰ pa̰á̰suumá nà wɛ̀ɛ̀di.

Pɔ́dì sɛdí Weèdi Kòdɔ́sìpa kpɛ́mú

³ Ti dɔń-ma Weèdi nɛ kpɛ́mú wɔ̀ka wɛǹni. Ti weèdɔɔ̀mu mɛhɛká mɛ̀ɛkà, ti hɔ̰́ sɛda-á-ma Weèdi mɛ̀nì yòǹ-di ti Teó Sèsí-Kídísì Báàa nà nɛ kpɛ́mú. ⁴ Ti hɔ̰́ nì n'sɛdí mìì tee-sá, ti yeèkaà-á-ma dandaní nɛ káá-di Sèsí-Kídísì hḭ́ǹka, nà dɔ́kàma nɛ káá-ma weèdɔɔ̀pa wɛǹni hḭ́ǹka. ⁵ Ye dandaní n'ɛ̀ɛ dɔ́kàma mɛ̀ɛ yḭncí niìya̰ nɛ daḿma péé-sa kú hḭ́ǹka-dà kà Weèdi yè nɛ hḭ́ḭ́ hḭ́ǹka mɛhɛká. Ye daḿma, nɛ mà yá̰dà pà nɛ cakáà tḭ́ń daadí-dà Weèdi wɛnaamá mɛ̀mà yòǹ-ma wɛbeèdi. ⁶ Ye wɛnaamá mɛ̀ɛ piní-ma teǹka nà ka nùdi, kà nìpa mà tehú è pèni pa pa̰á̰ma. Ma cɔ̰́ɔ̰̀di-dà mà hḭn-má nɛ cɔhɔ̀ka, é tódá daadí nɛ yeèkaà-di cecemá Weèdi pa̰á̰suumá é yá̰dá è yɔ̀ mà yòǹ wɛbeèdi-dà. ⁷ Ti nɔɔ́tɔɔ̀o Èpàfásì ti dɔ́sí-ko sukú, k'ò pɛ́ɛ̀ ti dehú-nà, mɛnń-dà nɛ kɔ̰́ɔ̰̀ ye kú biɔhànamà-ní. Ò yòǹ Kídísì deho mɔ́nń-dà nɛ kpɛ́mú. ⁸ Ò ti cakáà-á-ma dɔ́kàma Weèdi Sèdi nɛ kɔ̰́ɔ̰̀-ma.

⁹ Ye kú kpɛ́mú-dà tee, nà ti yeèkaà-ma tḭ́ń daadí nɛ wɛmá, kà ti cɔɔ̀hu Weèdi nɛ kpɛ́mú wɔ̀ka wɛǹni. Ti nì cɔ̀hu è yɔ̀ ni Sèdi é nɛ pa̰a̰ yaǹfòùma wɛǹni, é hédá kà nɛ́ m'bahiní niìya̰ pópóí, k'yé teha kà nɛ́ yá̰dá ni dɔ́sí-sa tenten. ¹⁰ Mɛma, nɛ kó nɛɛ́-ma é n'fòù Teó kpɛ̀kaàma, é m'pa̰kú wɔ̀ka wɛǹni ò naanà-sa. Ye wɔ̀ni, nɛ pa̰á̰ma wɛǹni kó n'suu-ú-ma, kà nɛ́ dɔ̀hà é yá̰dá Weèdi. ¹¹ Ti nì cɔ̀hu è yɔ̀ nà nɔɔ̀ti sàti nì káá-ti, ní nɛ pa̰a̰ kpeèti niìya̰ wɛǹni hḭ́ǹka, k'yé teha kà nɛ́ n'káá wɛ̰́ɛ̰́ma é toó ye wɛǹni háá é deèta nà yaǹnaakú. ¹² Nɛ́ sɛda Báàa Weèdi nà yaǹnaakú. Mɛní-dà nɛ pɛ̰ḭ cɔ̀ku kà nɛ kó wáńtá kpàa kááma nì hḭ́ḭ́-ma wenikú péé-sa mɛhɛká, nì mɛ̀ɛ mà hḭ́ḭ́ mɛ̀m̀pà kú wɛnnì yòǹ-pa ni kpɛ́ɛpá kpɛ́mú-dà. ¹³ Nì ti fedà-ní yḭ́ḭ̀pu nɔɔ̀ti mɛhɛká-dà, é ti dúùwa ni Bíidɔ́kàta wóòti mɛhɛká. ¹⁴ Nà mɛntá kú kpɛ́mú-dà Weèdi ti fḭ́hìnà-ma, é ti deèda ti sḭ̀ḭ̀ma.

Kídísì héé-ko n'ɔ̀ɔ tɔná.

¹⁵ Kídísì yònà Weèdi-dà sɛ̰́ɛ̰́ɛ̰́. Mɛnń-dà yòǹ Weèdi pa̰à̰-sa wɛǹni yudí, ¹⁶ è yá̰á̰ Weèdi pa̰à̰ mìì péé-sa wɛǹni hḭ́ǹka nà teǹka mɛhɛká nà mɛnń-dà, ti mádí-sa nà ti pú mádí-sa. Mɛnń-dà pa̰à̰ sèka wɛǹni mɛ̀ǹkà káá-ka kpeèti, nà kpɛ̰́ǹti, nà nɔɔ̀ti, nà wóòti. Ye wɛnnì, Weèdi yè pa̰à̰ nà mɛnń-dà, nì mɛ̀ɛ yè pa̰à̰ o kú kpɛ́mú-dà. ¹⁷ Ò de yè péé-ma kà niìi wɛǹni é nɛɛ́ pa̰ná, mɛnń-dà mɛ̀ɛ yè púsí ye wɛnnì k'yè péé. ¹⁸ Mɛnń-dà héé wɔ̰̀ǹku yudí, ye wɔ̰̀ǹku-dà mɛ̀ɛ dɛɛ̀ weèdɔɔ̀-hòǹhòni. O kú pesá-dà fòùmu cetà-ma. Mɛnń-dà yòǹ cecedó é yá̰ńtá kpíípa mɛhɛká, k'yé teha k'ó n'wɛhinà niìi wɛǹni. ¹⁹ Weèdi-dà ta̰kadà è yɔ̀ nì yòm̀pu wɛǹni, ní m'péé ni Bíitá mɛhɛká tenten. ²⁰ Nà mɛntá-dà mɛ̀ɛ dɛɛ̀ Weèdi kpɛ̀i é tón é naaka-nà-ma niìi wɛǹni nà ni mɔ́nní. Hḭ̀ma ni Bíitá hútà-ma kpíidɔkú hḭ́ǹka kpɛ́mú-dà tee, Weèdi tón é naaka-nà-ma mìì péé-sa wɛǹni hḭ́ǹka nà teǹka.

²¹ Nɛ́na mɛ̀ɛtékà, nà wɔ̀nì-hɔ̰, nɛ mɛ̀ɛ té de nátá-nà-á-ma Weèdi. Nɛ de yòǹ ni kà̰à̰tɔɔ̀pa-dà, nà yam̀màhàka nɛ de káá-ka kà kà nɛ túdì sḭ̀ḭ̀ma pa̰á̰ma mɛhɛká. ²² Àmá sá̰mà-ní, Weèdi tón é nɛ naaka-nà-á-ma, nà kṵ́mú ni Bíitá kpíi-pú kpɛ́mú kà ta wɔ̰̀ǹti é yekà dɔnkú. Nì hḭn mɛma, è kpɛ̀i nɛ́ wáńtá fodá ni yìhìka è yòǹ ni kpɛ́ɛpá nì cenà-pa-dà, kà pà kɔ́ɔ́ yɔ̰́káma, è kɔ́ɔ́ yècḭ́ḭ̀ nì kó yeda-sá pa fòùmu mɛhɛká. ²³ Há̰kà, nɛ yònà é n'fìci-í-ma é n'kpenì dandaní hḭ́ǹka. Mɛní kú hḭ́ǹka-dà pà nɛ tṵnà-ma. Nɛ mɛ̀ɛ é n'tṵḿ ni hḭ́ǹka tenten, nɛ dá yetá é nátá-nà daḿma Weèdi wɛnaamá ti cakú-ma. Ye wɛnaamá, nɛ yèkaà-á-ma kà pá mà caka nìi bà mɛ̀ǹǹ dɛ̀ɛ̀-ko teǹka hḭ́ǹka. Mmí Pɔ́dì, n mɛ̀ɛ té hḭn ma deho-dà è mà cakú.

Tɔmú Weèdi kɔ̰́ɔ̰̀-pu Pɔ́dì weèdɔɔ̀-hòǹhòni kpɛ́mú.

²⁴ Sá̰mà-ní, yè n naa-á-ma nà n yon-má náńkú nà nɛ kpɛ́mú. Kídísì de dii-kú náńkú weèdɔɔ̀-hòǹhòni kpɛ́mú, mɛní mɛ̀nì yòǹ-di o wɔ̰̀ǹku, n mɛ̀ɛ té yon-kú-dà n wɔ̰̀ǹti mɛhɛká, è kó sṵ́hìna mìì dóńtà-sa. ²⁵ Ye weèdɔɔ̀-hòǹhòni kpɛ́mú-dà mɛ̀ɛ tee Weèdi n kpáhìnà-ma ni deho, é n púká ni tɔmú kà n dehú nɛ kpɛ́mú. Nì n púkà è yɔ̀ n nɛ caka ni wɛmá wɛǹni-dà, ²⁶ nì sɔ̀nà-ma wɔ̀ǹci wɛǹni è pú mà fohìnà nìpa. Àmá sá̰mà-ní, nì mà fohìnà-á-ma pópóí mɛ̀m̀pà kú wɛnnì yòǹ-pa ni kpɛ́ɛpá. ²⁷ Nì hḭn mɛma, è kpɛ̀i pà bɛka ye mìì de sɔ̀ɔ-sá wɛhimú sá̰ma-dà, n'ɛ̀ɛ̀ toó-sa k'yè kó tempanà boocí wɛǹni. Ye mìì de sɔ̀ɔ-sá-dà héé: Kídísì péé nɛ mɛhɛká, è nɛ pɔ̰n daḿma kà nɛ yá̰á̰ è yɔ̀ nɛ kó wáńtá dúú Weèdi wɛhimú mɛhɛká. ²⁸ Ye kú Kídísì wɛmá-dà mɛ̀ɛ dɛɛ̀ ti cakú-ma nìpa, è mà biɔhànì bá pa mɛ̀ǹǹ dɛ̀ɛ̀-ko, è pà teǹ nà yaǹfòùma wɛǹni, è kpɛ̀i kà mɛ̀m̀pà kú wɛnnì múń-nà-pa Kídísì, é kpɛ̰́ń o cɔ̀ku mɛhɛká. ²⁹ Ye kú kpɛ́mú-dà tee kà n dehú, è mɔ̀ù nà kpeèti Kídísì n pɛ̰ḭ-tí kà tì n'tempú-nà tenten ye dehèmu mɛhɛká.